Tou Muliʼi Totatou Faʼifaʼitakiʼaga ʼi Totatou ʼUhiga Kau Toʼo ʼo Te Mālama
1 Neʼe ʼui e Sesu ʼo ʼuhiga mo ia totonu: “Ko ʼau ko te mālama ʼo te malamanei.” ʼO mulimuli pe ki tana faʼifaʼitaki, ko te kau tisipulo ʼa Sesu neʼe “ko te mālama ʼo te malamanei.” (Mat. 5:14) ʼI tona ʼuhiga “mālama ʼo te malamanei,” neʼe feala ke ʼui e Sesu ko nātou fuli ʼaē ʼe nātou mulimuli ia te ia ʼe nātou maʼu anai “te mālama ʼo te maʼuli.” (Soane 8:12) ʼAki te faʼahi ʼaia ʼe tou liliu ai ko te kau toʼo ʼo te mālama ʼi te faʼahi fakalaumālie, ʼo mole tonu ʼi he temi ke tou fakagafua ki he meʼa ke ina ūgia te mālama ʼaia.
2 Ko te kautahi ʼa Sehova ʼe ina ako tatou ke feala hatatou liliu ko he kau toʼo ʼo te mālama faiva. Kapau ʼe tou muliʼi lelei te tokoni pea mo te taki ʼaē ʼe tou maʼu, ʼe feala anai ke tou fakaloto mālohiʼi te hahaʼi kehekehe ʼo ʼuhiga mo te moʼoni ʼo te Puleʼaga. (1 Tim. 4:6) Ko te kaugana ʼaē ohage ko ni kau toʼo ʼo te mālama, ko tona faka ʼuhiga ke tou palalau ʼo ʼuhiga mo te moʼoni ʼi te ʼu fealagia fuli pea mo tou fakahā tuʼumaʼu he aga ʼe lelei ʼi totatou ʼuhiga Kilisitiano. ʼO ʼuhiga mo te aga, neʼe mole maʼu he hala ʼi totatou Faʼifaʼitakiʼaga ʼaē ko Sesu. Mai tona ʼuhiga ʼaē ko tatou ko tana kau tisipulo, ʼe tonu ke tou fakahā ko te Lotu Faka Kilisitiano ʼe ko totatou faʼahiga maʼuli ʼaia ʼi te ʼaho fuli pe. (Ef. 5:9; Tito 2:7, 8, 10) ʼE tonu ke tou fakatupu he ʼu gāue ʼe lelei ke feala ke sio kiai niʼihi, ʼo uga ai nātou ke nātou faka kolōliaʼi te ʼAtua.—Mat. 5:16.
3 ʼI te lolotoga fai faka mafola ʼa te Fakamoʼoni ʼi te ʼu ʼapi, neʼe kole age kia ia ke ina fai te meʼa ʼe mole fai māhani. Ko te tagata ʼo te loto fale pea mo tona ʼohoana ʼaē neʼe ina fai kiai tana gāue neʼe nā mahahaki, kae ʼi te ʼaho ʼaia neʼe tonu ke nā tuku tanā falā ki te fale paʼaga. Neʼe nā kole age ki te Fakamoʼoni peʼe feala la hana ʼalu ʼo fai te faʼahi ʼaia. Neʼe tali e te Fakamoʼoni, pea neʼe nā foaki age te 200 000 F CFP ke ʼalu ʼo tuku ki te fale paʼaga. ʼI tana liliu mai kia nāua, neʼe ina fehuʼi fēnei age: “He koʼe neʼe koulua falala feiā kia ʼau kae mole tou feʼiloʼiʼaki lelei?” Pea nā tali fēnei age: “ ʼE ma ʼiloʼi, ʼo toe feiā pe mo te hahaʼi fuli, ko te kau Fakamoʼoni ʼa Sehova ko nātou tokotahi pe ʼe feala ke falala ki ai.” ʼE tou fakafetaʼi ʼi tatatou maʼu ʼaē ʼo te ʼu taʼi logo ʼaia ʼo fakavikiviki aipe ki te ʼAtua ʼuhi ko tatatou pipiki ʼāteaina ki te ʼu pelesepeto ʼo te aga ʼaē ʼe tonu ke fai!
4 Ko te fafine faiako ʼo te ʼu kalasi liliki neʼe ina fakamatalatala ki tana kalasi he koʼe ko te Fakamoʼoni ʼe taʼu ono neʼe mole kau ki te pena ʼo te ʼu fai paki ʼo te Halloween. Neʼe ʼui e te fafine faiako neʼe ina leleiʼia ʼaupito te lototoʼa ʼa te kiʼi taʼahine ʼi tana makehe ia nātou ʼuhi ko te ʼu meʼa ʼaē ʼe tui kiai. Kapau ʼe tou tui mālohi ki he meʼa, ko te ʼui ʼaia ʼa te fafine faiako, ʼe tonu ke tou lototoʼa ʼo taupau maʼu te tui ʼaia. ʼI te po pe ʼaia ko te fafine faiako neʼe ina fakasiosioʼi te ʼu meʼa ʼaē ʼe tui totonu kiai pea neʼe mahino lelei kia ia neʼe mole ina maʼu te lototoʼa ʼaia moʼo taupau maʼu te ʼu meʼa ʼaē ʼe tui kiai. ʼI te ʼaho ki muli age neʼe ina fakahā ʼe mole ina fakamaʼua tana kalasi ki te ʼu lafeti ʼaē ka hoko mai, pea ko ʼihi pe la ʼaho lalahi neʼe mole faka tui mo ia kiai!
5 Ko te hahaʼi ʼa Sehova ʼe nātou holi ʼaupito ke nātou fakamū te gigila ʼo te mālama, ʼi te ʼu faʼahi ʼaē ʼe nātou ʼi ai. Ko te faʼifaʼitaki lelei ʼa te kau tūpulaga ʼaē ʼi te faleako neʼe malave lahi ki tonatou ʼu kaugā ako pea mo te kau faiako. Ko te kau Fakamoʼoni ʼaē kua fotufotuʼa ʼe nātou fakahā te faʼifaʼitaki lelei ki tonatou ʼu vāhaʼa fale ʼo nātou uga ai ʼihi ke nātou palalau lelei ʼo ʼuhiga mo te logo ʼo te Puleʼaga. Ko te fagonogono faigamālie ʼi tona ʼu faʼahiga ʼaluʼaga kehekehe ʼe ina faka fealagia kia tatou ke tou maʼu te hahaʼi fia fagono fakamalotoloto ʼaē ʼe lahi tanatou fia ako. Tatau aipe la mo tatatou lototokaga pea mo tatatou agatonu ʼaē ʼi ʼatatou ʼu gāue fakamālama, ʼe ko he tahi pe ʼaia faʼahiga fagonogono. ʼIo, ʼi he faʼahi pe ʼe tou ʼi ai peʼe koteā te meʼa ʼe tou lolotoga fai, ʼe feala ke tou fakatupu te fia logo ʼa te hahaʼi ki te moʼoni.
6 ʼAki tatatou tuku ʼo tatatou sio ki te faʼahiga maʼuli haohaoa ʼo totatou Faʼifaʼitaki lahi, ʼe feala ke tou haga hikihiki tatatou ʼu fealagia ʼi totatou ʼuhiga ʼaē ko tatou ko tana kau tisipulo. ʼAki hatatou mulimuli ki tana faʼifaʼitaki, ʼe tou ʼiloʼi papau ai anai ko tatatou mālama ʼe ina “fakamālama ia nātou fuli.”—Mat. 5:15; 1 Pe. 2:21.