‘Ke Mū Tokotou Mālama’
1. Koteā te meʼa ʼofa ʼaē ʼe tonu ke tou fakahā ki te hahaʼi?
1 Mai te mafoa ʼo te ʼaho ʼo aʼu ki te tō ʼo te laʼā, ko te taulekaleka ʼo te mālama ʼo te ʼaho ʼe ina fakavikiviki ia Sehova ʼAtua. Kae neʼe ko te tahi faʼahiga mālama ʼaē neʼe fakaafe e Sesu ke maʼu e tana ʼu tisipulo—ko “te mālama ʼo te maʼuli.” (Soa. 8:12) Ko tatatou maʼu te mālama fakalaumālie ʼaia ʼe ko he toe meʼa ʼofa makehe, ʼe tou maʼu ai mo he ʼu maʼua maʼuhiga. Neʼe fakatotonu fēnei e Sesu: “Ke . . . mū . . . tokotou mālama ʼi muʼa ʼo te hahaʼi,” ko tona fakaʼuhiga ke toe maʼu e ʼihi te ʼu lelei ʼo te mālama ʼaia. (Mat. 5:16) ʼI te pōʼuli gaogao fakalaumālie ʼaenī, ʼe tonu ke mū te mālama ʼaia, pea kua ʼaoga tāfito age ʼi te temi nei! Ohagē ko Kilisito, ʼe feafeaʼi hatatou fakamū totatou mālama?
2. Neʼe fakahā feafeaʼi e Sesu te maʼuhiga ʼaē kiā te ia ke ina fakahā te mālama fakalaumālie?
2 ʼI Tatatou Fai Fakamafola: Neʼe fakaʼaogaʼi e Sesu tona temi, mo tona mālohi pea mo tona ʼu fealagia moʼo fakahā ia te mālama ʼo te moʼoni ki te hahaʼi ʼi ʼonatou loto fale, ʼi te ʼu koga meʼa ʼaē neʼe kaugamālie ai, ʼi te ʼu fuga moʼuga—ʼi te ʼu potu fuli pē ʼaē neʼe ina maʼu ai te hahaʼi. Neʼe mahino kiā ia te maʼuhiga ʼaupitō ʼaē ke ina fakahā te mālama moʼoni fakalaumālie. (Soa. 12:46) Ke aʼu te mālama ʼaia ki he hahaʼi ʼe tokolahi age, neʼe akoʼi e Sesu tana ʼu tisipulo ke natou liliu ko “te mālama ʼo te mālamanei.” (Mat. 5:14) ʼE natou fakamū tonatou mālama ʼaki tanatou fai te meʼa ʼaē ʼe lelei ki te hahaʼi pea ʼaki tanatou fakahā kiā nātou te ʼu moʼoni fakalaumālie.
3. ʼE feafeaʼi hatatou fakahā ʼe tou loto fakafetaʼi ki te mālama ʼo te moʼoni?
3 ʼE maʼuhiga ʼaupitō ki te hahaʼi ʼa te ʼAtua tonatou maʼua ʼaē ke natou “haga haʼele ohagē ko ni fānau ʼo te mālama,” pea ʼe natou fai fakamafola ʼi te ʼu potu fuli pē ʼaē ʼe natou maʼu ai te hahaʼi. (Efe. 5:8) Kapau ʼe kotou lau te Tohi-Tapu peʼe ko he ʼu tohi Fakatohi-tapu ʼi he ʼu faʼahi ʼe hahaʼi ai pea mo natou lava sio atu, mokā kotou manava ʼi takotou gāue peʼe ʼi te faleako, pea ʼe ko he ʼu faigamālie ʼaia ke kotou fai palalau ai mo nātou ki te Tohi-Tapu. Ko te tuagaʼane neʼe ina fai te puleʼaki ʼaia, pea neʼe ina kamata ai te ako Tohi-Tapu pea mo tuku te ʼu tohi e 12 ki tona ʼu kaugā ako.
4. He koʼē ʼe tou toe ‘fakamū totatou mālama’ ʼaki tatatou aga ʼaē ʼe lelei?
4 ʼAki Tatatou ʼu Gāue Lelei: ʼE tou toe fakamū totatou mālama ʼaki tatatou aga ʼaē ʼi te ʼaho fuli. (Efe. 5:9) ʼI te agamāhani, ʼi te fale ʼaē ʼe tou gāue ai, mo te faleako, pea mo te ʼu faʼahi ʼaē ʼe hahaʼi ai, ʼe natou tokagaʼi tatatou aga Fakakilisitiano. Pea ʼe feala ai ke tou fakahā kiā nātou te ʼu moʼoni ʼo te Tohi-Tapu. (1 Pet. 2:12) Koʼenī te faʼifaʼitaki: ʼuhi ko te aga poto ʼa te kiʼi tama e taʼu nima, neʼe tupu ai te fia felāveʼi ʼo tana fafine faiako mo tana ʼu mātuʼa. Neʼe ʼui fēnei e te fafine: “Neʼe mole heʼeki au sio ki he tamasiʼi ʼe aga poto fēia ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi!” ʼEī, ko tatatou minisitelio pea mo tatatou aga ʼaē ʼe lelei ʼe taki mai ai te hahaʼi ki “te mālama ʼo te maʼuli” pea mo fakavikiviki ki totatou ʼAtua.
[ʼU Fehuʼi ʼo te ako]