‘Ke Mū Tokotou Mālama’
1 Ko te mālama ʼaē ʼe tou maʼuʼuli ai, kua aga fakalialia pea ʼe fakapōʼuli ʼi te faʼahi fakalaumālie. Ko te mālama ʼo te moʼoni ʼe ina fakahā mai “te u gaue paʼa” ʼo te fakapōʼuli ke ʼaua naʼa tou tūkia ai. Koia neʼe uga fēnei ai e te ʼapositolo ko Paulo te kau Kilisitiano: “Koutou mauli o hage ko te u fanau o te malama.”—Ef. 5:8, 11.
2 Ko “te fua o te malama” ʼe kehekehe ia mo te fakapōʼuli ʼo te malamanei. (Ef. 5:9) Ke feala hatatou maʼu te fua ʼaia, ʼe maʼua kia tatou kau Kilisitiano, te faʼahiga hahaʼi ʼaē ʼe tali e Sesu, ke tou tuku he faʼifaʼitaki lelei. Tahi ʼaē meʼa, ʼe tonu ke tou maʼu te ʼu kalitate ohage ko te fakamalotoloto, pea mo te fia gāue mālohi ki te moʼoni. ʼE maʼua ke tou fakahā te fua ʼaia ʼi te ʼaho fuli ʼo totatou maʼuli pea mo totatou minisitelio.
3 Tou Fakamū ʼi Te Faigamālie Fuli: Neʼe tala fēnei e Sesu ki tana ʼu tisipulo: ‘Ke mū tokotou mālama ʼi muʼa ʼo te hahaʼi.’ (Mat. 5:16, MN ) Moʼo faʼifaʼitaki kia Sesu, ʼe tou fakamū te mālama ʼa Sehova ʼo tou faka mafola te Puleʼaga ʼo te ʼAtua pea mo tana ʼu fakatuʼutuʼu. ʼE tou fakamū te mālama ʼaia, mokā tou ʼolo ki te ʼu ʼapi ʼo te hahaʼi, pea mokā tou faka mafola te moʼoni ʼi te ʼu fale gāue, ʼi te ʼu faleako, ki totatou ʼu vāhaʼa fale, peʼe ʼi he faʼahi ʼe tou maʼu ai he faigamālie.—Filp. 2:15.
4 Neʼe ʼui e Sesu ko ʼihi ʼe nātou fehiʼa anai ki te mālama. (Soa. 3:20) Koia ʼe mole tou lotovaivai anai mokā fakafisi te tokolahi ke fakamū age kia nātou “te mālama gigila ʼo te logo lelei faka kolōlia ʼo ʼuhiga mo Kilisito.” (2 Ko. 4:4, MN ) ʼE ʼiloʼi e Sehova te meʼa ʼaē ʼi te loto ʼa te hahaʼi, pea ʼe mole ina loto ke maʼu ʼi te lotolotoiga ʼo tana hahaʼi, he ʼu hahaʼi ʼe nātou aga heʼe faitotonu.
5 Ka tou mulimuli ki te ʼu ala ʼa Sehova pea mo tou nonofo ʼi te mālama fakalaumālie, pea ʼe tokagaʼi te faʼahi ʼaia e te hahaʼi. Kapau ʼe nātou sio ʼi tatatou aga ʼe tou ‘maʼu te mālama ʼo te maʼuli,’ pea ʼe feala anai mo nātou ke nātou fetogi tonatou maʼuli ke feala hanatou liliu ko he ʼu hahaʼi ʼe nātou fakamū te mālama.—Soa. 8:12.
6 ʼI tatatou fakamū tatatou mālama, ʼe tou fakavikiviki ai ki totatou Tupuʼaga, pea mo tou tokoni ai ki te hahaʼi fakamalotoloto ke nātou ʼiloʼi ia ia, pea mo nātou maʼu te ʼamanaki ʼo te maʼuli heʼegata. (1 Pet. 2:12) ʼE tou maʼu te mālama, koia ʼe tonu ai ke tou fakaʼaogaʼi moʼo tokoni ki te hahaʼi, ke nātou mavae mai te fakapōʼuli fakalaumālie, ʼo fai te ʼu gāue ʼo te mālama.