Ko Te Mālama Mai Te ʼAtua ʼe Ina Pulihi Te Fakapōʼuli!
“ ʼE fakamālamaʼi e Sehova toku fakapōʼuli.”—2 Samuele 22:29.
1. ʼE pipiki feafeaʼi te mālama pea mo te maʼuli?
“NEʼE ʼui e te ʼAtua: ‘Ke hā te mālama.’ Pea neʼe hā te mālama.” (Senesi 1:3) ʼAki te ʼu palalau maʼuhiga ʼaia, ko te fakamatala ʼo te fakatupu ia Senesi ʼe ina ʼui ko Sehova te matapuna ʼo te mālama, ʼaē ʼe ʼaoga ke feala ai hatatou maʼuli ʼi te kele. Pea ko Sehova ʼe ko te matapuna ʼo te mālama fakalaumālie ʼaē ʼe toe maʼuhiga moʼo takitaki tatou ʼi totatou maʼuli. (Pesalemo 43:3) Neʼe fakahā e te Hau ko Tavite ʼe pipiki tahi te mālama fakalaumālie mo te maʼuli, ʼi tana tohi fēnei: “ ʼE maʼu ia te koe te matapuna ʼo te maʼuli; ʼaki te mālama ʼaē ʼe haʼu mai ia te koe, ʼe mātou sisio ai ki te mālama.”—Pesalemo 36:9.
2. Ohage ko tona fakahā e Paulo, ʼe pipiki tahi te mālama mo teā?
2 Hili taʼu e afe ki te temi ʼo Tavite, neʼe talanoa te ʼapositolo ko Paulo ki te fakamatala ʼo te fakatupu. ʼI tana faitohi ki te kokelekasio ʼi Kolonito, neʼe ina ʼui fēnei: “Neʼe ko te ʼAtua ʼaē neʼe ina ʼui: ‘Ke gigila te mālama mai te lotolotoiga ʼo te fakapōʼuli.’ ” Pea neʼe fakahā e Paulo ko te mālama fakalaumālie ʼe pipiki tahi mo te ʼatamai mālama mai ia Sehova, ʼi tana hoko atu fēnei: “Neʼe ina fakamālamaʼi totatou ʼu loto ke nātou gigila ʼaki te mālama faka kolōlia ʼo te ʼAtua, ʼaki te fofoga ʼo Kilisito.” (2 Kolonito 4:6, MN ) ʼE tou maʼu feafeaʼi te mālama ʼaia?
ʼE Fakahā e Te Tohi-Tapu Te Mālama
3. ʼAki te Tohi-Tapu, koteā te mālama ʼaē ʼe foaki mai e Sehova?
3 ʼE ʼuluaki foaki mai e Sehova te mālama fakalaumālie ʼaki tana Folafola, ia te Tohi-Tapu. Koia, ka tou ako te Tohi-Tapu pea mo maʼu te ʼatamai mālama ʼo ʼuhiga mo te ʼAtua, ʼe tou tuku ke gigila mai tona mālama kia tatou. ʼI te Tohi-Tapu, ʼe fakahā lelei e Sehova pe koteā tana ʼu fakatuʼutuʼu pea mo ina fakahā mai peʼe feafeaʼi hatatou fai tona finegalo. ʼE foaki ai he ʼuhiga ki totatou maʼuli pea mo tokoni mai ke tou maʼu te ʼu meʼa ʼaē ʼe ʼaoga kia tatou ʼi te faʼahi fakalaumālie. (Tagata Tānaki 12:1; Mateo 5:3) Neʼe fakahā lelei e Sesu ʼe maʼua ke tou tali te ʼu meʼa ʼaē ʼe ʼaoga kia tatou ʼi te faʼahi fakalaumālie, ʼi tana talanoa ki te Lao ʼa Moisese, ʼo ʼui maʼana: “Kua tohi: E mole gata pe ki te pane e mauli ai anai te tagata, kae e mauli anai i te folafola fuape e mavae maia fofoga o te Atua.”—Mateo 4:4; Teutalonome 8:3.
4. ʼE liliu feafeaʼi ia Sesu ko “te malama o te malama-nei”?
4 ʼE kau mo Sesu ki te mālama fakalaumālie. Neʼe ina ʼui ʼo ʼuhiga mo ia, “ko au te malama o te malama-nei” pea neʼe ina toe ʼui fēnei: “Ko ae e mulimuli mai ia te au, e mole haele anai ia i te fakapouli, kae e ina maù anai te malama o te mauli.” (Soane 8:12) Ko te palalau ʼaia ʼe tokoni mai ke tou mahino ki te tuʼulaga maʼuhiga ʼo Sesu moʼo foaki te moʼoni ʼa Sehova ki te malamanei. Kapau ʼe tou fia tekeʼi te fakapōʼuli pea mo haʼele ʼi te mālama ʼa te ʼAtua, pea ʼe tonu ke tou fakalogo kia meʼa fuli neʼe ʼui mai e Sesu, pea mo tou mulimuli fakalelei ki tana faʼifaʼitaki pea mo tana ʼu akonaki ʼaē ʼe tohi ʼi te Tohi-Tapu.
5. Koteā te maʼua neʼe maʼu e te kau tisipulo ʼa Sesu ʼi te hili ʼo tana mate?
5 ʼI te ʼu ʼaho ʼi muʼa ʼo tana mate, ko Sesu, ʼi tana ʼui ʼaē ko ia te mālama, neʼe ina toe ʼui fēnei ki tana kau tisipulo: “Ko te mālama ʼe toe nofo anai ʼi he kiʼi temi siʼipe ʼi te lotolotoiga ʼo koutou. Koutou haʼele ʼi takotou kei maʼu te mālama, naʼa tō te pōʼuli kia koutou; pea ko ʼaē ʼe haʼele ʼi te fakapōʼuli, ʼe mole ina ʼiloʼi ia peʼe ʼalu kifea. ʼI takotou kei maʼu te mālama, koutou tui ki te mālama, ke koutou liliu ai ko te ʼu foha ʼo te mālama.” (Soane 12:35, 36, MN ) Ko nātou ʼaē neʼe liliu ko he ʼu fānau ʼo te mālama, neʼe nātou ako “te faʼifaʼitaki ʼo te ʼu folafola ʼo te maʼuli” ʼo te Tohi-Tapu. (2 Timoteo 1:13, 14, MN ) Pea ʼe nātou fakaʼaogaʼi te ʼu folafola ʼaia ʼo te maʼuli, moʼo taki mai te tahi ʼu hahaʼi loto moʼoni mai te fakapōʼuli ki te mālama ʼa te ʼAtua.
6. Koteā te moʼoni maʼuhiga ʼo ʼuhiga mo te mālama pea mo te pōʼuli ʼe tou maʼu ia 1 Soane 1:5?
6 Neʼe tohi fēnei e te ʼapositolo ko Soane: “Ko te Atua e ko te malama, e mole mau he fakapouli o te u fakapouli ia te ia.” (1 Soane 1:5) Koutou tokagaʼi ʼi henī te kehekehe ʼo te mālama pea mo te pōʼuli. Ko te mālama fakalaumālie ʼe haʼu mai ia Sehova, pea ko te pōʼuli fakalaumālie ʼe mole feala ke maʼu ia te ia. Ko ai koa te matapuna ʼo te pōʼuli?
Te Matapuna ʼo Te Fakapōʼuli Fakalaumālie
7. Ko ai te matapuna ʼo te fakapōʼuli fakalaumālie ʼo te malamanei, pea koteā ʼaē ʼe ina fai?
7 Neʼe talanoa te ʼapositolo ko Paulo ʼo ʼuhiga mo “te atua o te malama-nei.” Neʼe talanoa ʼo ʼuhiga mo Satana te Tevolo. Neʼe ina toe ʼui ko ia ʼaia neʼe ina “fakakivi . . . te u fakakaukau a te hahai e mole tui, naa natou mamata ki te huhulu o te malama o te Evaselio o te kololia o Kilisito, iaʼia ko te fakatata o te Atua.” (2 Kolonito 4:4) Ko te hahaʼi tokolahi ʼe nātou ʼui ʼe nātou tui ki te ʼAtua; kae tokolahi ia nātou ʼaia ʼe mole nātou tui ki te Tevolo. Koteā tona tupuʼaga? Heʼe mole nātou fia tali te manatu ʼaē ʼe ʼi ai moʼoni te mālohi agakovi mo fakapulipuli, ʼe feala ke malave ki tanatou ʼu fakakaukau. Kae ohage ko tona fakahā e Paulo, ʼe maʼuli moʼoni te Tevolo, pea ʼe ina fakaneke te hahaʼi ke mole nātou sio ki te mālama ʼo te moʼoni. Ko te lava fakaneke e Satana te fakakaukau ʼa te hahaʼi, ʼe hā ʼi te fakamatala faka polofeta ʼo ʼuhiga mo ia, ʼaē ʼe ʼui “ ʼe ina fakahēʼi te kele katoa.” (Apokalipesi 12:9, MN ) ʼE hā te fua ʼo te ʼu gāue ʼa Satana ʼi te fakakikite fēnei ʼa te polofeta ko Isaia: “Koʼeni, ko te fakapōʼuli ʼe ina ʼaofi anai te kele, pea ko te fakapōʼuli mātolu te ʼu puleʼaga,” pea ʼe faka ʼuhiga ʼi te temi nei ki te malamanei katoa, kae mole kau ai ia nātou ʼaē ʼe tauhi kia Sehova.—Isaia 60:2.
8. ʼE hā feafeaʼi te kua hēʼia ʼo nātou ʼaē ʼe nonofo ʼi te fakapōʼuli fakalaumālie?
8 Ka fakapōʼuli ʼaupito pea ʼe mole feala hakita sio ki he meʼa. ʼE hēʼia gafua ai he tahi peʼe mole kei ina ʼiloʼi peʼe ʼifea. ʼO toe feiā pe, ko nātou ʼaē ʼe nonofo ʼi te fakapōʼuli fakalaumālie, ʼe mole kei nātou maʼu te fakasiosio tonu pea ʼe nātou hēʼia ʼi te faʼahi fakalaumālie. ʼE mole kei nātou lava fakakeheʼi te moʼoni mo te loi, te aga ʼaē ʼe lelei pea mo te aga ʼaē ʼe kovi. Neʼe talanoa te polofeta ko Isaia kia nātou ʼaia ʼi te fakapōʼuli ʼi tana tohi fēnei: “Malaʼia kia nātou ʼaē ʼe nātou ʼui ko te meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei, kia nātou ʼaē ʼe nātou ʼui ko te fakapōʼuli ʼe ko te mālama pea ko te mālama ʼe ko te fakapōʼuli, pea kia nātou ʼaē ʼe nātou ʼui ko te meʼa ʼaē ʼe kona ʼe malie, pea ko te meʼa ʼaē ʼe malie ʼe kona.” (Isaia 5:20) Ko nātou ʼaē ʼe nonofo ʼi te fakapōʼuli fakalaumālie, ʼe nātou mulimuli ki te ʼatua ʼo te fakapōʼuli, ia Satana te Tevolo, pea ʼe nātou mamaʼo ai mai te matapuna ʼo te mālama pea mo te maʼuli.—Efeso 4:17-19.
Te ʼu Faigataʼaʼia ʼo Te Haʼu Mai Te Fakapōʼuli Ki Te Mālama
9. Koutou fakamahino peʼe feafeaʼi te leleiʼia ʼa te kau agahala ia te fakapōʼuli moʼoni pea mo te fakapōʼuli fakalaumālie.
9 Neʼe fakahā lelei e te tagata agatonu ko Sopo ʼe leleiʼia e te kau agahala te fakapōʼuli moʼoni, ʼi tana ʼui fēnei: “Ki te mata ʼo te tagata tono, neʼe ina lamalama te pōʼuli, ʼo ina ʼui: ‘ ʼE mole sio mai anai he tahi!’ Pea ʼe ina pūlouʼi tona fofoga ʼaki he kie.” (Sopo 24:15) Ko te kau agahala ʼe nātou toe nonofo foki ʼi te fakapōʼuli fakalaumālie, pea ʼe feala ke tou mavae mai te fakapōʼuli ʼaia. Neʼe ʼui e te ʼapositolo ko Paulo ko te ʼu felāveʼi fakasino heʼeʼaoga, te kaihaʼa, te mānumānu, te konahia, te leakovi, pea mo te faʼao ʼa he meʼa kae mole ʼa kita, ʼe ko te ʼu agamāhani ʼaia ʼe fai e nātou ʼaē neʼe puleʼi e te fakapōʼuli ʼaia. Kae ko ia ʼaē ʼe haʼu ki te mālama ʼa te Folafola ʼa te ʼAtua ʼe feala ke fetogi. ʼE fakahā lelei e Paulo ʼi tana tohi ki te kau Kolonito ʼe feala ke hoko te fetogi ʼaia. Tokolahi te kau Kilisitiano ʼo Kolonito neʼe nātou fai te ʼu gāue ʼo te fakapōʼuli, kae neʼe ʼui fēnei e Paulo kia nātou: “Kae kua fakamaʼa koutou, kua fakamaonioniʼi koutou pea kua fakatonuhia koutou i te huafa o te Aliki ko Sesu Kilisito aki te Laumalie o totatou Atua.”—1 Kolonito 6:9-11.
10, 11. (a) Neʼe fakahā feafeaʼi e Sesu tana loto tokaga ki te tagata kivi ʼaē neʼe ina fakamālōlō? (b) He koʼe ʼe mole tokolahi te hahaʼi ʼaē ʼe nātou fili te mālama?
10 Ka haʼu he tahi mai te fakapōʼuli mātolu ki te mālama, pea ʼe tonu ke fakamāmāhani māmālie tona ʼu mata ki te mālama. ʼI Petesaita, neʼe fakamālōlō e Sesu te tagata kivi, pea neʼe ina fai māmālie te faʼahi ʼaia. “Nee ina too te nima o te tagata kivi o taki ia ki te tua kolo, pea nee ina anuhi ona mata mo hilifaki ki ai ona nima, nee ina fakafehui ia: ‘Pe e ke sio ki he mea?’ I tana sio ake nee ui maʼana: ‘E au sio ki te hahai, e au sio e hage he vaoʼakau e haele.’ Pea ina toe hili ona nima ki ona mata, nee malama tana sio pea nee lelei ai mo sio lelei ki te meafuape.” (Maleko 8:23-25) ʼE hā mai, neʼe foaki e Sesu te sio ki te tagata, ʼo ina fai māmālie, ke feala ki te tagata ke fakamāmāhani mo te mālamagia ʼo te laʼā. ʼE mahino ia neʼe fiafia ʼaupito te tagata, ʼi tana kua lava sio.
11 Kae ko nātou ʼaē ʼe tokoni māmālie ke nātou ʼōmai mai te fakapōʼuli fakalaumālie ki te mālama ʼo te moʼoni ʼe lahi age tanatou fiafia ʼi te fiafia ʼa te tagata ʼaia. Ka tou tokagaʼi tanatou fiafia, ʼe lagi tou feʼekeʼaki pe koʼe ʼe mole hahaʼi age nātou ʼaē ʼe fia ʼōmai ki te mālama. ʼE fakahā e Sesu tona tupuʼaga: “Koeni te fakamau: nee haele mai te malama ki te malama-nei pea nee lahiʼage te ofa o natou tagata ki te fakapouli i tonatou ofa ki te malama: koteuhi ko te kovi o anatou gaue. Ko ae e ina fakahoko te kovi e fehia ki te malama pea e mole laka ki te malama naʼa ha ana gaue.” (Soane 3:19, 20) Ei, tokolahi te hahaʼi ʼe nātou leleiʼia “te kovi o anatou gaue”—ohage ko te aga heʼeʼaoga, tanatou puleʼi fefeka te hahaʼi, te loi, tanatou kākāʼi te hahaʼi, te kaihaʼa—pea ʼi te pōʼuli fakalaumālie ʼa Satana ʼe nātou maʼu ai te ʼu meʼa fuli ʼaē ʼe nātou loto kiai.
Tou Haʼele Ki Muʼa ʼi Te Mālama Fakalaumālie
12. Koteā te ʼu lelei neʼe tou maʼu ʼi tatatou ʼōmai ki te mālama fakalaumālie?
12 ʼI tatatou maʼu te ʼatamai mālama, koteā te ʼu fetogi ʼaē neʼe tou fai? ʼE lelei ke tou fakakaukauʼi pea mo sivisivi tatatou tuputupu ʼi te faʼahi fakalaumālie. Koteā te ʼu aga ʼaē ʼe kovi neʼe tou līaki? Koteā te ʼu fihifihia ʼi totatou maʼuli kua feala ke tou fakatonutonuʼi? Neʼe fetogi feafeaʼi tatatou ʼu fakatuʼutuʼu ʼo ʼuhiga mo te ka haʼu? ʼAki te mālohi ʼa Sehova pea mo te tokoni ʼo tona laumālie maʼoniʼoni, ʼe feala ke tou haga fai he ʼu fetogi ʼo totatou ʼulugaaga pea mo tatatou faʼahiga manatu, ʼaē ka fakahā ai anai ʼe tou tali te mālama. (Efeso 4:23, 24) ʼO ʼuhiga mo te faʼahi ʼaia, ʼe ʼui fēnei e Paulo: “I te temi mua nee koutou mauli i te fakapouli, kae i te lakaga-nei, e koutou malama i te Aliki. Koutou mauli o hage ko te u fanau o te malama. Koteuhi ko te fua o te malama e ko [te]: ofa fuape mo [te] faitotonu pea mo [te] mooni.” (Efeso 5:8, 9) Kapau ʼe tou tuku ke takitaki tatou e te mālama ʼa Sehova pea ʼe tou maʼu ai he ʼamanaki pea mo he fakatuʼutuʼu, pea ʼe toe fakafiafia ai mo te maʼuli ʼa te hahaʼi ʼi ʼotatou tafa. Pea ʼe tou fakafiafia lahi ai mo te loto ʼo Sehova ʼuhi heʼe kua tou fetogi!—Tāʼaga Lea 27:11.
13. ʼE lava feafeaʼi hatatou fakahā tatatou loto fakafetaʼi ki te mālama ʼa Sehova, pea koteā ʼaē ʼe ʼaoga ki te faʼahi ʼaia?
13 ʼE tou fakahā tatatou loto fakafetaʼi ki tatatou kua maʼuli fiafia, ʼi tatatou fakahā te mālama ʼa Sehova—ʼo tou vaevae te ʼu meʼa neʼe tou ako ʼi te Tohi-Tapu mo totatou famili, mo totatou ʼu kaumeʼa, pea mo te ʼu vāhaʼa fale. (Mateo 5:12-16; 24:14) Kia nātou ʼaē ʼe mole fia logo, ʼe liliu tatatou fai faka mafola pea mo totatou faʼahiga maʼuli ko he fakatonutonuʼi ʼo nātou. ʼE fakamahino fēnei e Paulo: “Koutou haga ʼiloʼi te meʼa ʼaē ʼe leleiʼia e te ʼAliki; pea ʼaua naʼa koutou toe kau mo nātou ki te ʼu gāue ʼaē ʼe mole hona fua ʼa te fakapōʼuli, kae ke koutou fakatonutonuʼi.” (Efeso 5:10, 11, MN ) ʼE tonu ke tou lototoʼa mokā tou tokoni ki te hahaʼi ke nātou līaki te fakapōʼuli pea ke nātou fili te mālama. Kae tāfito, ʼe tonu ke tou loto mahino pea mo tou loto tokaga ki te hahaʼi pea ke tou fia vaevae moʼoni te mālama ʼo te moʼoni mo nātou, ke fua lelei kia nātou ʼo heʼegata.—Mateo 28:19, 20.
Tou Tokaga Ki Te ʼu Mālama Loi!
14. ʼO ʼuhiga mo te mālama, koteā ʼaē ʼe tonu ke tou tokaga kiai?
14 Kia nātou ʼaē ʼe feʼoloʼaki ʼi te tai ʼi te ʼu hola ʼo te pōʼuli, ʼe nātou fiafia mokā nātou sio ki he mālama. ʼI muʼa atu, neʼe tutu te ʼu afi ʼi te ʼu fuga moʼuga ʼo Pilitania moʼo fakahā te faʼahi ʼaē ʼe feala ke nātou ʼolo kiai ke nātou hāo mai te ʼu afā. Neʼe loto fakafetaʼi te hahaʼi ʼo te ʼu vaka ki te takitaki ʼaia ʼo nātou e te ʼu mālama ʼaia ki he ʼu taulaga. Kae ko ʼihi ʼu afi neʼe ko he ʼu kākā. Neʼe lahi te ʼu vaka neʼe mole nātou maʼu he ʼu taulaga, kae neʼe kākāʼi nātou pea neʼe nātou ʼī ki te ʼu foʼi maka, pea kaihaʼa ai tonatou ʼu koloā. ʼI te mālama loi ʼaenī, ʼe tonu ke tou tokakaga ke ʼaua naʼa tou mulimuli ki he ʼu mālama loi ʼe feala ke tou tuʼutāmaki ai ʼi te faʼahi fakalaumālie. ʼE ʼui fēnei mai kia tatou: “Ko Satana totonu ʼe ina fakaliliu tuʼumaʼu pe ia ia ko he ʼaselo ʼo te mālama.” ʼO toe feiā pe, ko tana ʼu kaugana, ʼaē ʼe kau kiai te kau ʼaposita, ʼe “ko he kau gāue fakakākā . . . ʼe nātou fakaliliu tuʼumaʼu aipe ia nātou ko he ʼu minisi ʼo te faitotonu.” Kapau ʼe tou fakalogo ki te ʼu fakakaukau hala ʼa te hahaʼi ʼaia, ko tatatou falala ki te Folafola moʼoni ʼa Sehova, te Tohi-Tapu, ʼe liliu anai ʼo vaivai pea feala ke puli tatatou tui.—2 Kolonito 11:13-15, MN; 1 Timoteo 1:19.
15. Koteā ʼaē ka tokoni mai anai ke tou haga haʼele ʼi te ala ʼaē ʼe ina taki ki te maʼuli?
15 Neʼe tohi fēnei e te tagata fai pesalemo: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.” (Pesalemo 119:105) Ei, ko ‘te ala fāveliveli ʼaē ʼe ina taki ki te maʼuli’ ʼe fakamālamaʼi lelei ʼaki totatou ʼofa kia Sehova ʼAtua, ʼaē “ko tona finegalo ke fakamauli te tagata fuape, pea ke natou kaku ki te iloi o te mooni.” (Mateo 7:14; 1 Timoteo 2:4) Ko te maʼuliʼi ʼo te ʼu pelesepeto ʼa te Tohi-Tapu ʼe ina hāofaki anai tatou, ke mole tou mavae ʼi te ala fāveliveli ʼo haʼele ʼi te ala ʼo te fakapōʼuli. Neʼe tohi fēnei e Paulo: “E fakamalamai e te Atua te Tohi-tapu katoa, pea e aoga ia ki te faiʼakonaki, mo te fakailoilo o te hala, mo te fakatonutonu, pea mo te fakaʼako i te susitisia.” (2 Timoteo 3:16) ʼI tatatou tuputupu ʼi te faʼahi fakalaumālie, ʼe akoʼi tatou e te Folafola ʼa te ʼAtua. ʼAki te mālama ʼo te Folafola ʼa te ʼAtua, ʼe tou lava fakatonutonuʼi ia tatou totonu, pea kapau ʼe ʼaoga, ʼe fakatonutonuʼi tatou e te ʼu tēhina taupau ʼofa ʼo te kokelekasio. ʼO toe feiā pe, ʼe feala ke tou fakatokatoka he ʼu ʼaluʼaga pea mo tou tali ʼaki he agavaivai ke akonakiʼi tatou ʼi te faitotonu, ke tou haga haʼele ai ʼi te ala ʼo te maʼuli.
Tou Haʼele ʼi Te Mālama ʼAki He Loto Fakafetaʼi
16. ʼE tou lava fakahā feafeaʼi tatatou loto fakafetaʼi ki te mālama fakatalakitupua ʼaē ʼe foaki mai e Sehova?
16 ʼE tou lava fakahā feafeaʼi tatatou loto fakafetaʼi ki te mālama ʼaē ʼe foaki fakaʼofa mai e Sehova? Ia Soane kapite 9, ʼe ʼui ai ʼi te ʼosi fakamālōlō e Sesu te tagata kivi, neʼe fakahā e te tagata ʼaia tana loto fakafetaʼi. ʼO feafeaʼi? Neʼe ina faka tui ko Sesu te ʼAlo ʼo te ʼAtua pea ia muʼa ʼo te hahaʼi neʼe ina fakahigoaʼi Sesu ko “he polofeta.” Tahi ʼaē meʼa, neʼe palalau ʼaki he lototoʼa kia nātou ʼaē neʼe nātou fia meʼa noaʼi te milakulo ʼaē neʼe fai e Sesu. (Soane 9:17, 30-34) Ko te ʼapositolo ko Petelo ʼe ina fakahigoaʼi te kau fakanofo ʼi te kokelekasio faka Kilisitiano, ko “he hahaʼi kua tuku ke liliu ko [he] koloā makehe.” Koteā tona tupuʼaga? Heʼe nātou maʼu te loto fakafetaʼi ʼaē neʼe maʼu e te tagata ʼaē neʼe tupu kivi pea neʼe fakamālōlō. ʼE nātou loto fakafetaʼi kia Sehova, Ia ia ʼaē ʼe ina tapuakina nātou, ʼo nātou ‘faka mafola te ʼu kalitate ʼo ia ʼaē neʼe ina pāui nātou mai te fakapōʼuli ki tona mālama fakatalakitupua.’ (1 Petelo 2:9, MN; Kolose 1:13) Ko nātou ʼaē ʼe ʼamanaki ke nātou maʼuʼuli ʼi te kele, ʼe nātou toe loto fakafetaʼi mo nātou, pea ʼe nātou lagolago ki tonatou ʼu tēhina fakanofo ʼi te tala ki te hahaʼi “te ʼu kalitate” ʼo Sehova. Ko he toe pilivilesio lahi ʼaē ʼe foaki e te ʼAtua ki te hahaʼi agahala!
17, 18. (a) Koteā totatou maʼua takitokotahi? (b) Ohage ko tona fai e Timoteo, koteā ʼaē ʼe fakaloto mālohiʼi te kau Kilisitiano ke nātou tekeʼi?
17 ʼE maʼuhiga ke tou loto fakafetaʼi ki te mālama ʼo te moʼoni. Koutou manatuʼi, ʼe mole he tahi ia tatou neʼe tupu ake kua ina ʼiloʼi te moʼoni. Ko ʼihi neʼe nātou ako ʼi tanatou kua lalahi, pea neʼe nātou mahino atu aipe ki te māʼoluga ʼo te mālama fakalaumālie ʼi te fakapōʼuli. Ko ʼihi ʼe nātou maʼu te pilivilesio lahi ʼaē ko te lahilahi ake ʼi te moʼoni he neʼe manavasiʼi tanatou ʼu mātuʼa ki te ʼAtua. Kia nātou ʼaia, ʼe feala ʼaki te temi, ke mole kei nātou sio ki te maʼuhiga ʼo te moʼoni. Ko te tuagaʼane, neʼe tauhi tana ʼu mātuʼa kia Sehova ʼi muʼa ʼo tana tupu, ʼe ina ʼui neʼe ʼaoga kia ia he temi lahi pea mo he ʼu faiga mālohi ke feala hana mahino katoa ki te ʼu moʼoni ʼaē neʼe akoʼi age kia ia ʼi tana kei veliveli, pea mo sio ki tonatou maʼuhiga. (2 Timoteo 3:15) Peʼe tou tūpulaga peʼe tou matutuʼa, kae ko tatou fuli ʼe tonu ke tou maʼu he loto fakafetaʼi lahi ki te moʼoni ʼaē neʼe fakahā mai e Sehova.
18 Neʼe akoʼi age “te Tohi tapu” ki te tūpulaga ko Timoteo talu mai tana kei veliveli, kae neʼe liliu ko he Kilisitiano fakapotopoto he neʼe faiga ʼi tana minisitelio. (2 Timoteo 3:15) Pea neʼe feala ai ke lagolago ki te ʼapositolo ko Paulo, ʼaē neʼe ina fai te tokoni ʼaenī kia ia: “Faigai ia koe, o hage ko he tagata kua tuha ke ke tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.” ʼOfa pe ke tou liliu fuli ohage ko Timoteo, ke ʼaua naʼa tou fai he meʼa ʼe feala ke tou ufiufi ai—peʼe ufiufi ai Sehova!—2 Timoteo 2:15.
19. (a) Ohage ko Tavite, koteā te ʼu palalau ʼe tonu ke tou fai e tatou fuli? (b) Koteā ʼaē ka tou talanoa anai kiai ʼi te alatike ka hoa mai?
19 ʼE lahi te ʼu tupuʼaga ke tou vikiʼi ai ia Sehova, ʼaē neʼe ina foaki mai te mālama ʼo tana moʼoni. Ohage ko te Hau ko Tavite, ʼe tou ʼui fēnei: “Ko koe ko toku mālama, Ê Sehova, pea ʼe fakamālamaʼi e Sehova toku fakapōʼuli.” (2 Samuele 22:29) Koia, ʼe mole tou fia liliu ʼo fakafīfīmālie, heʼe feala ai ke tou toe liliu ki te fakapōʼuli ʼaē neʼe tou mavae mai ai. Koia, ko te alatike ka hoa mai ʼe tokoni mai anai ke tou ʼiloʼi peʼe kei tou faka maʼuhiga ʼi totatou maʼuli ia te moʼoni mai te ʼAtua.
Koteā ʼAē Neʼe Koutou Ako?
• ʼE foaki feafeaʼi e Sehova te mālama fakalaumālie?
• Koteā ʼaē ʼe feala ke faigataʼa kia tatou ʼuhi ko te fakapōʼuli fakalaumālie ʼaē ʼi totatou ʼu tafa?
• Koteā te ʼu tuʼutāmaki ʼe tonu ke tou tekeʼi?
• ʼE tou lava fakahā feafeaʼi tatatou loto fakafetaʼi ki te mālama ʼo te moʼoni?
[Paki ʼo te pasina 8]
Ko Sehova te matapuna ʼo te mālama ʼo te ʼaho pea mo te mālama fakalaumālie
[Paki ʼo te pasina 10]
Ohage ko te fakamālōlō māmālie e Sesu te tagata kivi, ʼe toe tokoni mai ke tou mavae mai te fakapōʼuli fakalaumālie
[Paki ʼo te pasina 11]
ʼE tou tuʼutāmaki ʼi te faʼahi fakalaumālie mo kapau ʼe kākāʼi tatou e te mālama loi ʼa Satana