Ke Mū Hoholo Totatou Mālama

¹ Koteā te faka ʼuhiga ʼo te kupu mālama? ʼE fakamahino e te tikisionalio, ko te mālama ʼe “ko he meʼa ʼe ina faka fealagia ke tou sio ki te ʼu meʼa ʼaē ʼe faigataʼa tatatou sio kiai mokā fakapōʼuli.” Kae ʼe mahino ia, logope la te kua laka ki muʼa ʼo te faʼu masini, ʼe mole ʼiloʼi katoa e te tagata te tali ki te fehuʼi ʼaē neʼe lagaʼi e Sehova ʼaē ʼe tuʼu ia Sopo 38:24. ʼE feala koa hatatou maʼuʼuli ʼi te fakapōʼuli? Kapau ʼe mole he mālama, pea ʼe tou mamate. ʼE ʼaoga te mālama ki tatatou sio, pea ʼe ʼui mai e te Tohi-Tapu ʼi te faʼahi fakalaumālie, “ko te ʼAtua ʼe mālama.” (1 Soane 1:⁠5) ʼE tou fakalogo tāfito kia Ia ʼaē ʼe ina “foaki mai te mālama.”—⁠Pes. 118:⁠27.

² Ko te meʼa ʼaia ʼe moʼoni ʼi te faʼahi fakasino, kae ʼe toe moʼoni tāfito age ʼi te faʼahi fakalaumālie. Neʼe fakahalaʼi e te lotu hala te hahaʼi kaugamālie, ʼo ina tuku ia nātou ʼi te fakapōʼuli fakalaumālie, ʼo “nātou haʼele fakataufā ʼo kumi te kaupā ohage ni hahaʼi kivi.” (Is. 59:9, 10) ʼAki tona ʼofa lahi pea mo tona manavaʼofa ‘ ʼe tuku ifo e Sehova tona mālama pea mo tona moʼoni.’ (Pes. 43:⁠3) ʼIo, ko te lauʼi miliona hahaʼi loto fakafetaʼi neʼe nātou tali te faʼahi ʼaia, ʼo nātou mavae “mai te fakapōʼuli ʼo nātou ʼōmai ki tona mālama taulekaleka.”—⁠1 Pe. 2:⁠9.

³ ʼE kau tāfito ia Sesu Kilisito ki te foaki ʼo te mālama ki te malamanei. Neʼe ina ʼui fēnei: “Neʼe ʼau haʼu ohage ko he mālama ki te malamanei, ke ʼaua naʼa nofo ʼi te fakapōʼuli ia ia ʼaē ʼe tui kia te ʼau.” (Soane 12:46) Ko tona temi katoa, tona mālohi katoa, tona ʼu koloā neʼe fakatuʼutuʼu tāfito moʼo fakahā ʼo te mālama ʼo te moʼoni. Neʼe feʼaluʼaki ʼi te ʼu fenua, ʼo fai faka mafola, pea mo faiakonaki ʼi te ʼu kolo lalahi pea mo te ʼu kolo liliki. Neʼe ina kātakiʼi te fakataga mālohi ʼi te ʼu potu fuli pe, kae neʼe ina taupau maʼu tana gāue ʼaē ko te faka mafola ʼo te mālama ʼo te moʼoni.

⁴ Neʼe tokaga tāfito ia Sesu ki te filifili ʼo tana ʼu tisipulo, ki tonatou akoʼi, mo te fakaʼaluʼalu ʼo tonatou maʼuli. Ia Mateo 5:14-16 ʼe tou lau tana fakatotonu ʼo ʼuhiga mo nātou: “Ko koutou ko te mālama ʼo te malamanei. . . . Ke mū tokotou mālama ʼi muʼa ʼo te hahaʼi, koteʼuhi ke nātou mamata ki ʼakoutou gāue lelei pea nātou faka kolōlia ai ki takotou Tāmai ʼaē ʼe ʼi selo.” Ohage pe ko Sesu, neʼe ko nātou “te ʼu mālama ʼo te malamanei,” ʼo nātou faka mafola te mālama ʼo te moʼoni ki te ʼu potu fuli ʼo te kele. (Filp. 2:15) Neʼe nātou tali fakafiafia te maʼua ʼaia, ʼo nātou faka ʼuhiga te faʼahi ʼaia ʼe ko te fakatuʼutuʼu tāfito ʼo tonatou maʼuli. ʼI he kiʼi temi nounou ki muli mai, neʼe feala ke ʼui e Paulo ko te logo lelei “neʼe faka mafola ki te ʼu meʼa katoa ʼaē neʼe fakatupu ʼaē ʼe ʼi te lalo lagi.” (Kol. 1:23) Neʼe logo tahi te kokelekasio faka Kilisitiano katoa ʼi te fakahoko ʼo te gāue lahi ʼaia.

⁵ ʼE tonu ke tou fakafetaʼi ia ʼaho nei ʼi tatatou kau ia nātou ʼaē kua nātou “līaki te ʼu gāue ʼo te fakapōʼuli.” (Loma 13:12, 13) ʼE feala ke tou fakahā tatatou loto fakafetaʼi ʼaki tatatou mulimuli ki te faʼifaʼitaki ʼaē neʼe tuku mai e Sesu pea mo te kau Kilisitiano agatonu ʼi te temi muʼa. ʼE mole kei ʼaoga ke tou fakatuatuai ʼi te fakahā ʼo te moʼoni ki te hahaʼi ʼi te temi ʼaenī, heʼe mole hona fakatatau kua hoko ʼi te hisitolia ʼo te tagata. ʼE mole he tahi age gāue maʼuhiga ʼe feala ke ina foaki mai he ʼu fua lelei ohage ko te gāue fai faka mafola.

⁶ ʼE Lava Feafeaʼi Koa Hatatou Gigila Ohage He ʼu Mālama? Ko te ʼuluaki faʼahi ʼaē ʼe feala ke tou fakagigila ai totatou mālama, ʼe ko te fai faka mafola ʼo te Puleʼaga. Ko te kokelekasio fuli ʼe nātou fai tuʼumaʼu te ʼu fakatuʼutuʼu ʼo ʼuhiga mo te fai faka mafola ʼi te ʼu telituale ʼaē neʼe hinoʼi ke nātou fai. ʼE lahi ʼaupito te ʼu tohi neʼe fai pea ʼe lahi ʼaupito te ʼu lea ʼaē kua fakaliliu ʼaki te ʼu tohi ʼaia. ʼE lahi te meʼa ʼaē ʼe tou ako ʼi te ʼu fono, pea ko nātou ʼaē kua māhani ʼi te fai faka mafola, ʼe nātou tokoni ki niʼihi ʼi te faʼahi fakalaumālie. ʼE lahi te ʼu fealagia kua tuku mai kia tatou tagata, fafine, hahaʼi matutuʼa, pea mo te ʼu tamaliki. ʼE fakaafe te hahaʼi fuli ʼo te kokelekasio ke nātou kau kiai tatau aipe peʼe faka tuʼakoi tonatou ʼu fealagia pea mo tonatou ʼaluʼaga. Ko te ʼu gāue fuli ʼo te kokelekasio ʼe fakatuʼutuʼu ʼo ʼuhiga mo te fai faka mafola, mo te ʼu fakatuʼutuʼu moʼo tokoni kia nātou ʼaē ʼe ʼaoga kiai he tokoni. Ko te fakatahitahi tuʼumaʼu mo te kokelekasio ʼe ko te faʼahi ʼaia ʼaē ka tokoni anai kia tatou ke tou taupau maʼu te gigila ʼo totatou mālama.

⁷ ʼI te tahi ʼu faʼahi, ʼe mole lagi ʼaoga anai ke tou fai he ʼu palalau ʼo ʼuhiga mo te moʼoni. Kae ʼe feala ke tou uga niʼihi ʼaki pe tatatou aga. Neʼe ko te faʼahi ʼaia ʼaē neʼe fia talanoa kiai te ʼapositolo ko Petelo ʼi tana ʼui ʼaē: “Koutou taupau maʼu takotou agalelei ʼi te lotolotoiga ʼo te ʼu puleʼaga, koteʼuhi . . . ʼaki te fua ʼo takotou ʼu agalelei ʼaē neʼe nātou sio mata kiai, ʼe feala ke nātou faka kolōliaʼi te ʼAtua.” (1 Pe. 2:12) Tokolahi ʼe nātou fakamāu he gāue peʼe ko he kautahi ʼuhi ko te aga ʼa nātou ʼaē ʼe kau kiai. Ka fakatokagaʼi e ʼihi te ʼu hahaʼi ʼaē ʼe lelei tanatou ʼu aga, mo faitotonu, mo tokalelei pea mo fakaʼapaʼapa ki te ʼu lao, ʼe nātou ʼui ʼe kehe te hahaʼi ʼaia, pea mo nātou ʼui ʼe mulimuli te hahaʼi ʼaia ki te ʼu lekula ʼe māʼoluga age ʼi te ʼu lekula ʼaē ʼe mulimuli kiai te kaugamālie. Koia ko he tagata ʼohoana ʼe ina fakagigila tona mālama mokā ʼe ina faka maʼuhigaʼi tona ʼohoana pea mo ʼofa ki ai; ʼo feiā aipe mo te fafine ʼe ina fakagigila tona mālama mokā ʼe fakaʼapaʼapa ki te ʼuhiga pule ʼo tona ʼohoana. Ko te fānau ʼe nātou fakahā tanatou kehekehe mo te tahi ʼu fānau ʼo te mālama, koteʼuhi ʼe nātou fakalogo ki tanatou ʼu mātuʼa pea mo nātou fakamamaʼo mai te aga ʼaē ʼe heʼeʼaoga pea mo te fakaʼaogaʼi ʼo te toloke. Ko he tahi ʼe gāue ʼe ina fai fakalelei tana gāue, mo faitotonu pea mo agalelei ki te hahaʼi, ʼe ko he tagata gāue ʼe leleiʼia ʼaupito e te hahaʼi. ʼI te fakahā ʼo te ʼu kalitate faka Kilisitiano ʼaia, ʼe tou tuku anai totatou mālama ke gigila, ʼo tou tokoni ki niʼihi ke nātou maʼu te faʼahiga maʼuli ʼaia.

⁸ Ko te fai faka mafola ʼe ko te akoʼi ʼo ʼihi ʼo ʼuhiga mo te ʼu meʼa ʼaē ʼe tou ako ʼi te Folafola ʼa te ʼAtua. Ko te faʼahi ʼaia ʼe fakahoko ʼaki te ʼu akonaki ʼaē ʼe fai mai muʼa, peʼe ʼi te fagonogono ʼi te ʼu ʼapi, kae ʼe mole fakagata ʼaki pe te ʼu lakaga ʼaia. ʼE lahi te ʼu hahaʼi ʼe felāveʼi mo tatou ʼi te ʼu faʼahiga meʼa ʼaē ʼe tou fai ʼi te ʼaho fuli. Ko temi koa e fia ʼi te ʼaho ʼe koutou palalau ai mo ʼokotou ʼu vāhaʼa fale? ʼE ʼōmai koa niʼihi ʼo fisifisi tokotou matapā? Ko hahaʼi ʼe fia ʼaē ʼe koutou faka mafola ki ai mokā koutou ʼolo ʼo faifakatau, mokā koutou ʼolo ʼi te kā, peʼe ʼi takotou fale gāue? Kapau ko koutou ko he tūpulaga ʼe kei ako, ʼe feala koa ke koutou ʼui pe ko te tokofia ʼaē ʼe koutou faka mafola ki ai ʼi te ʼaho fuli? ʼI te ʼu temi mālōlō, ʼe feala ke koutou maʼu he ʼu fealagia kehekehe ke koutou palalau ai ki niʼihi peʼe ko tokotou ʼu kāiga. ʼO feiā aipe mokā koutou folau ki he tahi fenua, ʼe feala ke koutou ʼave he ʼu kiʼi pepa lotu ʼi te lea ʼo te fenua ʼaia. Ko te ʼu faigamālie moʼo palalau ki niʼihi ʼe mole hona tuʼakoi. Ko te meʼa ʼaē ʼe ʼaoga tāfito ke koutou maʼu, ko te manatuʼi ʼo he ʼu vaega faka Tohi-Tapu, ke koutou ʼave he Tohi-Tapu pea mo he ʼu kiʼi pepa lotu, pea ke koutou fai he puleʼaki ke koutou palalau mokā ʼe koutou maʼu he faigamālie.

⁹ Logope la te faigafua ʼo te fagonogono faigamālie, ko ʼihi ʼe nātou tuʼaniaʼi tanatou kau ki te gāue ʼaia. ʼE mole lagi nātou gutu palalau, mo nātou umiuminoa peʼe nātou tuʼaniaʼi te palalau mo he tahi ʼu hahaʼi. E lagi nātou matataku ʼi te palalau mo te hahaʼi peʼe nātou matataku naʼa fai age he ʼu palalau fefeka kia nātou. Ko nātou ʼaē kua māhani ʼi te fagonogono faigamālie, ʼe feala ke nātou ʼui atu ʼe tahitahiga tanatou felāveʼi mo he ʼu meʼa ʼe fakatupu tuʼania. ʼE hage pe te hahaʼi ko tatou; ʼe tatau te ʼu meʼa ʼaē ʼe ʼaoga kia nātou mo te ʼu meʼa ʼaē ʼe ʼaoga kia tatou, ʼo feiā mo te ʼu meʼa ʼaē ʼe nātou logoʼi ʼi tonatou loto, pea mo te ʼu meʼa ʼaē ʼe ʼaoga kia nātou pea mo tonatou famili. Tokolahi ʼe nātou tali lelei anai ʼo nātou malimali peʼe nātou fakamālo lelei mai anai. Moʼo kamata, ʼe ʼaoga ke koutou maʼu ‘te lototoʼa.’ (1 Tes. 2:⁠2) Pea, ʼi takotou ʼosi fai te faʼahi ʼaia, ʼe koutou punamaʼuli anai pea mo koutou fiafia ʼi tona ʼu fua lelei.

¹⁰ ʼE Tapuakina Tatou Mokā ʼe Tou Fakamū Totatou Mālama: Koʼeni te ʼu faʼifaʼitaki fakaloto fīmālie neʼe hoko ʼi te fagonogono faigamālie: Ko te fafine ʼe taʼu 55 neʼe fia fakalaka ʼi te ala. Neʼe meihiʼi pe ke tukiʼi ia e te motokā, kae neʼe haʼu te tuagaʼane ʼo fā ki tona nima pea neʼe ina hāofaki ia ia, ʼo ʼui maʼana: “Tokaga. ʼE tou maʼuʼuli nei ʼi te ʼu temi faigataʼa!” Pea neʼe ina fakamahino age pe koʼe ʼe faigataʼa te ʼu temi ʼaenī. Neʼe fehuʼi age e te fafine, “Ko koe ko he Fakamoʼoni ʼa Sehova?” ʼI tana maʼu te tohi ʼi tatatou ʼu tohi mai tona taʼokete, neʼe loto te fafine ke felāveʼi mo he kau Fakamoʼoni ʼa Sehova, pea neʼe ʼaʼahi ia ia e te kau Fakamoʼoni ʼa Sehova.

¹¹ Ko te tuagaʼane neʼe kamata fai palalau mo te fafine ʼi te koga fale ʼaē ʼe fakatalitali ai ki te tōketā. Neʼe fakalogo fakalelei te fafine pea ina ʼui fēnei age: “ ʼI ʼihi temi, neʼe ʼau felāveʼi mo te kau Fakamoʼoni ʼa Sehova; kae kapau ʼi te temi ka haʼu ʼe ʼau liliu ko he Fakamoʼoni ʼa Sehova, ʼe hoko anai ʼuhi ko te meʼa ʼaē neʼe ke ʼui mai. Ko taku fakalogo atu ki tau palalau ʼe hage ko haku kamata sio ki te mālama ʼi he faʼahi ʼe fakapōʼuli.”

¹² Ko he agalelei ʼe feala ke liliu ko he meʼa moʼo tokoni ki niʼihi ke nātou ako te moʼoni. ʼI te haʼele ʼa te ʼu tuagaʼane ʼi tanā fai faka mafola, neʼe nā tokagaʼi te finematuʼa ʼe hage ʼe mahaki ʼi tana hifo mai te kā. Neʼe nā tutuʼu pea neʼe nā fehuʼi age ki te finematuʼa peʼe feala hanā tokoni age ki ai. Neʼe punamaʼuli te finematuʼa, he mole ina ʼiloʼi ia nāua, pea neʼe ina fia ʼiloʼi ai te tupuʼaga ʼo tana agalelei ʼaia. Neʼe liliu te faʼahi ʼaia ko he faigamālie ki te tuagaʼane moʼo fagonogono. Neʼe fakatoʼo age e te finematuʼa tona tuʼasila pea mo ina fakaafe fakafiafia ia nāua ke nā ʼolo age ʼo ʼaʼahi ia ia. Neʼe kamata ai tana ako Tohi-Tapu. Mole fualoa pea neʼe kamata kau te fafine ʼaia ki te ʼu fono pea ʼi te temi nei kua ina faka mafola te ʼu moʼoni ki niʼihi.

¹³ Ko te tuagaʼane kua finematuʼa ʼe ina fakaʼaogaʼi te fealagia ʼaē ko te ʼalu ʼo fagonogono ʼi te matatai ʼi te kei māfoatā. ʼE felāveʼi ia mo te ʼu fafine ko tanatou gāue ko te fakamaʼa ʼapi, mo te ʼu fafine taupau fānau, mo te ʼu hahaʼi ʼe gāue ʼi te ʼu fale paʼaga, pea mo ʼihi ʼe ʼevaʼeva. ʼE ina fai ai te ʼu ako Tohi-Tapu, ʼo heka ʼi te ʼu hekaʼaga ʼe ōvi ki te matatai. Tokolahi te hahaʼi neʼe nātou maʼu te moʼoni ʼuhi ko ia pea ʼi te temi nei kua nātou liliu ko te kau Fakamoʼoni ʼa Sehova.

¹⁴ ʼI tona fale gāue, neʼe logo te tuagaʼane ki tona kaugā gāue ʼe talanoa ʼo ʼuhiga mo te kautahi faka politike pea ʼe feala anai ki te kautahi ʼaia ke ina fakatokatoka te ʼu fihifihia ʼo te malamanei. Neʼe fakahā age e te tuagaʼane tana manatu, ʼo ʼuhiga mo te ʼu fakapapau ʼaē ka fakahoko anai e te Puleʼaga. Ko te fai palalau ʼaia ʼi te fale gāue neʼe iku ai ki te ako Tohi-Tapu ʼi tona ʼapi, pea ki muli age neʼe liliu te fafine ʼaia mo tona ʼohoana ko te ʼu Fakamoʼoni ʼa Sehova.

¹⁵ Ke ʼAua Naʼa Galo Kia Koutou Ko Koutou Ko Te Kau Fakamoʼoni! ʼI te ʼui ʼa Sesu ko tana ʼu tisipulo ʼe ko nātou “te mālama ʼo te malamanei,” neʼe loto ia ke mahino kia nātou ʼe tonu ke nātou tokoni ki te hahaʼi, ke nātou maʼu he ʼu fua lelei mai te mālama fakalaumālie ʼo te Folafola ʼa te ʼAtua. Kapau ʼe tou mulimuli ki te tokoni ʼa Sesu, ʼe feafeaʼi anai tatatou faka ʼuhigaʼi totatou minisitelio?

¹⁶ Ka nātou kumi gāue, ko ʼihi ʼe nātou fili he gāue vaeluaʼi temi. ʼE nātou faka tuʼakoi te temi pea mo tanatou faiga ʼi te gāue ʼaia, koteʼuhi ʼe nātou fia fakaʼaogaʼi tonatou temi moʼo fakahoko ʼo he ʼu gāue ʼe maʼuhiga age ʼi te totogi ʼaē ka nātou maʼu ai. ʼE feiā koa tatatou faka ʼuhigaʼi totatou minisitelio? Tatau aipe peʼe hage kia tatou ko he maʼua ke tou fakaʼaogaʼi totatou temi ki te minisitelio, peʼe ko he meʼa ʼe tou lotolelei kiai, kae ʼe mole ko totatou maʼua tāfito koa la ʼaia?

¹⁷ ʼI tatatou mahino ʼaē ʼe mole feala ke tou Kilisitiano faka vaelua pe, neʼe tou foaki ai totatou maʼuli ki te ʼAtua, ʼo tou ‘fakafisi kia tatou totonu’ pea neʼe tou tali ke tou mulimuli “tuʼumaʼu” kia Sesu. (Mat. 16:24) ʼE tou fakaʼamu ke tou hoko tuʼumaʼu atu te faʼahi ʼaia ʼaki totatou “nefesi katoa,” ʼo tou fakaʼaogaʼi te ʼu faigamālie fuli ke tou fakamū totatou mālama ki te hahaʼi ʼaē ʼe nonofo ʼi te potu fuli pe. (Kol. 3:23, 24) ʼE tonu ke tou fakafisi ki te ʼu aga ʼo te malamanei, ʼo tou taupau maʼu tatatou lotomālohi ʼaē neʼe tou maʼu ʼi te kamata, pea ke tou tokakaga ki totatou mālama ke hoholo atu tona gigila. Ko ʼihi kua nātou fakavaivai pea kua mū veliveli tonatou mālama, ʼo faigataʼa ai hanatou sio mamaʼo. Ko te faʼahiga hahaʼi ʼaia ʼe ʼaoga kia nātou he tokoni, ke nātou toe maʼu tonatou lotomālohi ʼo ʼuhiga mo te minisitelio.

¹⁸ Ko ʼihi ʼe mole nātou fia kau ki te minisitelio, ʼuhi ʼe tokolahi ia nātou ʼe mole nātou tali tatatou logo. Neʼe ʼui e Paulo ko te logo ʼo ʼuhiga mo Kilisito neʼe “ko he meʼa fakavale kia nātou ʼaē ʼe mamate.” (1 Ko. 1:18) Kae, logope la te ʼu meʼa ʼaē neʼe lau age e te hahaʼi, neʼe ina ʼui fēnei ʼaki he lotomālohi: “ ʼE mole ʼau ufiufi ki te logo lelei.” (Loma 1:16) Ko ia ʼaē ʼe ufiufi ʼe hage kia ia ʼe fakamālaloʼi ia ia, peʼe manatu ia ʼe mole tāu mo ia ke ina fai te gāue ʼaia. ʼE tonu koa ke tou ufiufi mokā tou palalau ʼo ʼuhiga mo te Tuʼi Māʼoluga ʼo te ʼatulaulau, pea mo tana ʼu fakatuʼutuʼu fakatalakitupua ʼaē neʼe ina fai ke tou maʼu ai te fiafia heʼegata? ʼE mole tonu ke tou manatu ʼe ko he fakamālaloʼi ʼo tatou peʼe mole tāu mo tatou, mo kapau ʼe tou fakahā te ʼu moʼoni ʼaia ki te hahaʼi. Kae, ʼe tonu ke tou uga ia tatou ke tou fai fakamalotoloto, ʼo tou fakahā lelei ʼe mole tou “ufiufi ki he meʼa.”—⁠2 Tim. 2:⁠15.

¹⁹ ʼI te temi nei, ko te mālama ʼo te moʼoni ʼaē ʼe gigila ʼi te ʼu fenua ʼo te malamanei katoa, ʼe ina foaki ki te hahaʼi te maʼuli heʼegata ʼi te mālama foʼou ʼaē ka liliu ko he palatiso. Tou fakahā ʼe tou mulimuli ki te tokoni ʼaē ke mū hoholo totatou ʼu mālama! Kapau ʼe tou fai te faʼahi ʼaia, ʼe tou fiafia anai ohage ko te kau tisipulo ʼaē ʼi te ʼaho fuli neʼe nātou ako “tuʼumaʼu pea mo tala te logo lelei ʼo ʼuhiga mo Kilisito Sesu.”—⁠Gāue 5:⁠42.