Tou Teuteuʼi Ia Nātou ʼAē ʼe Ako Tohi-Tapu Ki Te Minisitelio
1 Ko te tupuʼaga tāfito ʼo te fai ʼo te ʼu ako Tohi-Tapu ko te fai ʼo he ʼu tisipulo foʼou, ke nātou fakatahi anai mo tatou ki te akoʼi ʼo niʼihi. (Mat. 28:19, 20) Koia ko te fakatuʼutuʼu ʼo te ako ʼo te Tohi-Tapu ʼe mole gata ʼaki pe ia te fakahā ʼo te moʼoni; ʼe tonu ke ina uga ia nātou ʼaē ʼe ako Tohi-Tapu mo tatou, ke nātou tui ʼi tonatou loto pea mo teuteuʼi ia nātou ke nātou vaevae tanatou ʼamanaki mo niʼihi. (2 Ko. 4:13) Ko te ʼu faʼahi fea koa ʼaē ʼe feala ke tou tokoni ai kia nātou ke nātou faiva ʼi te akoʼi ʼo ʼihi?—2 Tim. 2:2.
2 Koutou Fakatuʼutuʼu Te Minisitelio Ko He Meʼa Tāfito: ʼI te kamataʼaga, ʼe ʼaoga ke koutou fakahā fakalelei age ko te tauhi moʼoni ʼe kau kiai mo te “fakahāhā ki te hahaʼi ʼo te hāofaki.” (Lom. 10:10) Ko totatou higoa, ʼaē ko te kau Fakamoʼoni ʼa Sehova, ʼe fakamaʼuaʼi ai tatou ke tou palalau ki niʼihi. Tou tokoni kia nātou ʼaē ako, ke mahino kia nātou ko tanatou ako ʼe mole gata ʼaki aipe tonatou hāofaki. Kapau ʼe nātou liliu ko ni hahaʼi faiako, ko te hahaʼi ʼaē ʼe fakalogo age kia nātou ʼe feala ai foki ke hāofaki mo nātou.—1 Tim. 4:16.
3 Toe Fakamanatu Te Meʼa ʼAē Neʼe Akoʼi: Ko te ʼu fakamanatu ʼo te meʼa ʼaē neʼe akoʼi ʼe ko he faʼahi maʼuhiga ʼaia ʼo te ako. ʼE tokoni kia ia ʼaē ʼe ako ke tuputupu ʼi te faʼahi fakalaumālie ke lave te ʼu moʼoni ʼaē neʼe hoki ina akoʼi ki tana fakakaukau pea mo tona loto. Neʼe tou fai ia te faʼahi ʼaia ʼi tatatou tali ki te ʼu fakamanatu ʼo te Ako ʼo Te Tule Leʼo. Koutou teuteuʼi he ʼu fehuʼi ʼe mātala, mo fakahagatonu ke feala ai hana tali mai ʼaki tana ʼu palalau māhani.
4 Ko takotou fakamanatu ʼe feala ke fai ʼi te fai faka mafola. Koutou fai he fehuʼi peʼe koutou fakakaukauʼi he faʼahi ʼe hoko māhani mokā koutou fai faka mafola ki niʼihi. ʼI takotou fai te faʼahi ʼaia, koutou tuku he temi kia ia ʼaē ʼe ako mo koutou ke ina fakahā atu tana manatu. Koutou fakamālo ki ai ʼo ʼuhiga mo te meʼa lelei ʼaē ʼe ina fai, pea koutou foaki age he ʼu manatu ʼaoga ʼe tokoni anai ki ai ke faiva ʼi te temi ka haʼu. Ko te tokoni ʼaia ʼe ina akoʼi age anai peʼe feafeaʼi tana fakaʼaogaʼi te meʼa ʼaē neʼe ina akoʼi pea mo fakatuputupu anai tana faiva ʼi te fakaʼaogaʼi ʼo te Tohi-Tapu.
5 Te Tohi Comment raisonner: Koutou tokaga ke ʼi ai he tohi Comment raisonner ʼa ia ʼaē ʼe ako mo koutou, pea koutou fakahā ki ai peʼe feafeaʼi tona fakaʼaogaʼi. Koutou fakahā ki ai ko te tohi ʼaia ʼe ina foaki mai he ʼu manatu ʼo ʼuhiga mo te faʼahiga kamata ʼaē ʼo te ʼu palalau, te tali ʼaē ki te ʼu fehuʼi faka Tohi-Tapu, peʼe ko te tali ki te ʼu fehuʼi ʼaē ʼe fai mai. Koutou fakaʼaogaʼi te tohi ʼaia ʼi te ako moʼo fakahā ki ai te ʼu faʼahiga palalau ke fai. Ko te tohi ʼaenī ʼe feala ke ina fakaloto mālohiʼi tana falala, mo ina fakatuputupu tana fakahā ia te logo ʼo te Puleʼaga.
6 Koutou Fakahāhā Te Maʼuhiga ʼo Te ʼu Fono: Ko te ʼu fono ʼo te kokelekasio, tāfito ia te Fono Gāue pea mo te Ako ʼo te Minisitelio faka Teokalatike, neʼe fakatuʼutuʼu moʼo teuteuʼi ʼo tatou ki te gāue fai faka mafola. Ko te ʼu faʼahi tāfito ʼe ʼaoga ke lelei te fai faka mafola ʼe toe vakaʼi pea mo fakaʼaogaʼi ʼi he ʼu faʼifaʼitaki e nātou fuli ʼaē kua faiva pea mo fakapotopoto. Koutou fakamahino ki ai ia te maʼuhiga ʼo te ʼu fono, pea ke koutou fai te meʼa ʼe feala ke koutou fai moʼo tokoni ki ai ke kau ki te fono. Ko te kau tuʼumaʼu ki te fono ʼe feala ke uga ai ia ia ʼaē ʼe ako mo koutou ke ina ʼiloʼi te meʼa ʼaē ʼe ʼaoga kia ia ke liliu ai ko he tisipulo moʼoni ʼa Sesu.
7 Ke ʼaua naʼa koutou meʼa noaʼi takotou faʼifaʼitaki takitokotahi. Ko takotou lotolelei pea mo takotou kau tuʼumaʼu ʼaē ki te gāue fai faka mafola ʼe fakahā ʼaki ai tokotou loto fakafetaʼi ki te moʼoni. Ko te taʼi aga ʼaia ʼe ina fakaloto mālohiʼi ai ia ia ʼaē ʼe ako mo koutou ke lahi tana fakahā ʼo tana tui. (Luka 6:40) Ko te ʼu meʼa fuli ʼaia ʼe tokoni ai ki he tahi kei foʼofoʼou ke ina sioʼi te minisitelio ohage he pilivilesio pea ke ia ia te loto fakafetaʼi ʼo kau ki ai.—1 Tim. 1:12.