ʼE Koutou To Fakalahi Koa?
1 ʼE ʼui fēnei: “Ka e lahi takotou faiga ki he meʼa, e lahi ai takotou maʼu.” Ko te faʼahi ʼaenī ʼe moʼoni tāfito ʼi tatatou tauhi. Kapau ʼe lahi te temi pea mo te faiga ʼaē ʼe tou fakaʼaogaʼi moʼo teuteuʼi ʼo te ʼu fono, ʼi te faka mafola ʼo te logo ʼo te Puleʼaga, pea mo te fakahā ʼo totatou ʼofa ki ʼotatou ʼu tēhina, ʼe lahi ai anai tatatou tuputupu ʼi te faʼahi fakalaumālie. ʼE toe feiā foki mokā ʼe mole tou fai te meʼa ʼaia. Kapau ʼe tou fai he gāue fakakinau peʼe mole tou fiafia ʼi te meʼa ʼaē ʼe tou fai, ʼe feala koa la hatatou maʼu he ʼu fua ʼe lelei?
2 Neʼe talanoa te ʼapositolo ko Paulo ki te manatu ʼaia ia 2 Kolonito 9:6: “Koia, ʼo ʼuhiga mo te meʼa ʼaia, ko ʼaē ʼe ina to fakaveliveli ʼe ina toe utu fakaveliveli anai, pea ko ʼaē ʼe ina to fakalahi ʼe ina toe utu fakalahi anai.” ʼE koutou to fakalahi koa?
3 Te Ako Takitokotahi ʼo Te Tohi-Tapu: Ke tou liliu ko he ʼu minisi ʼe fua lelei, ʼuluaki ʼe ʼaoga ke lahi tatatou ako takitokotahi. ʼE tonu ke tou holi mālohi ki te meʼa kai fakalaumālie. (Pes. 119:97, 105; Mat. 5:3) ʼAki te ʼu maʼua ʼaē ʼe nātou toʼo totatou temi ʼi te ʼaho fuli, ʼe ʼaoga ke tou faiga ke lahi he temi ʼe tou maʼu ʼo ʼuhiga mo te meʼa fakalaumālie. Ki te tokolahi ia tatou, ʼe maʼua ke tou “totogi maʼa tatou te temi faigamālie.” (Ef. 5:16) Ko ʼihi ʼe nātou fakatuʼutuʼu ke nātou ʼala uhu ʼi he ʼu ʼaho moʼo fai ʼo tanatou ako takitokotahi. Ko ʼihi ʼe nātou leleiʼia te ʼu afiafi moʼo fai ʼo te faʼahi ʼaia. E feafeaʼi koa tatatou utu fakalahi? ʼE tou maʼu ai he tui mālohi, he ʼamanaki fakaloto fiafia, pea ʼe tou fakatuputupu he ʼatamai lelei.—Lom. 10:17; 15:4; 1 Pe. 1:13.
4 Te ʼu Fono ʼo Te Kokelekasio: Ia Pesalemo 122:1, neʼe ʼui e Tavite: “Neʼe ʼau fakafiafia ʼi te ʼui mai ʼaē: ‘Tou ʼolo ki te fale ʼo Sehova.’ ” ʼE koutou logoʼi koa te faʼahi ʼaia? Ko te to fakalahi ko tona faka ʼuhiga ko te kau tuʼumaʼu ki ʼatatou ʼu fono e nima ʼi te vāhaʼa. Koutou fai hakotou fakatuʼutuʼu ke ʼaua naʼa koutou tōtō ʼi te ʼu fono ʼuhi pe ko te tuʼu kovi ʼo te lagi. ʼI te agamāhani, kapau e lahi tatatou tauʼi te ʼu faigataʼaʼia, pea e lahi ai tatatou maʼu te ʼu tapuakina.
5 Ke koutou ʼolo fakatomuʼa ki te ʼu fono pea ke koutou nonofo ʼi te ʼosi ʼo te fono ke feala ai hakotou fai palalau mo ʼokotou ʼu tēhina. Ke lahi te ʼu hahaʼi ʼe koutou fakatahitahi mo nātou. Koutou teuteu fakalelei ia te ako ʼo Te Tule Leʼo pea mo ʼihi ʼu fono ke feala ai hakotou to fakalahi ʼaki takotou tali mokā ʼe faka fealagia atu. Ko takotou “fakavai fakalahi” ʼo niʼihi ʼi te ʼu fono, ʼe “lahi ai anai tokotou fakavai.”—Taag. 11:25.
6 ʼI Te Minisitelio: E lagi ʼe mole ʼi ai he tahi age faʼahi ʼe feala ke to fakalahi ai, ʼe gata pe ki te minisitelio. Kapau e lahi te temi ʼe tou fakaʼaogaʼi ʼi te minisitelio, e lahi ai tatatou felāveʼi mo te ʼu hahaʼi ʼe fia logo, ʼo fai te ʼu ʼaʼahi ʼe ʼaoga, pea mo te ʼu ako faka Tohi-Tapu ʼe tuputupu.
7 Ko te to fakalahi ʼi te minisitelio ʼe kau kiai tona lelei pea mo tona lahi. Ko te tohi Comment raisonner ko he tokoni lelei ʼaia kia tatou ke haʼele lelei ai totatou minisitelio. ʼI te ʼu pasina 9 ki te 15 ʼe tou maʼu ai te ʼu ʼuluaki palalau e 40 ʼi te ʼu talanoa e 18 moʼo tokoni kia tatou ke tou fakatuputupu ia te fia logo ʼa te hahaʼi ʼe tou maʼu ʼi tonatou ʼu ʼapi. Kapau ʼe fia logo he tahi, ke koutou tokaga ʼo tohi ki he pepa ia tona higoa pea mo te ʼaluʼaga fuli ke feala ai hakotou liliu pea ke koutou utu te ʼu fua ʼo te meʼa ʼaē neʼe koutou to. Ko takotou faiga ʼe feala ai ke koutou kamata he ako faka Tohi-Tapu, pea ʼe feala ai takotou akoʼi ki niʼihi peʼe feafeaʼi te to fakalahi.
8 Kapau ʼe tou to fakalahi, ʼe feala ke tou maʼu he ʼu tapuakina lahi mai ia Sehova.—Mal. 3:10.