Ka Lahi Tatatou To Pea ʼe Tapuakina Lahi Anai Tatou
1 ʼE tou talitali fuli ki te fakahoko ʼo te ʼu fakapapau lahi ʼaē ʼe tuʼu ʼi te Folafola ʼa te ʼAtua. Māʼia pe la ʼi te temi nei, ʼe foaki lahi mai e Sehova te ʼu tapuakina ʼe fakafiafia ai ki totatou maʼuli. Kae ko te lahi ʼo te ʼu tapuakina ʼaē ʼe tou maʼu ʼe fakalogo ki te lahi ʼo te ʼu faiga ʼaē ʼe tou fai. Ohage ko tona ʼui e te ʼapositolo ko Paulo, “ko ae e lahi tana to, e toe lahi anai tana utu.” (2 Ko. 9:6) Tou vakaʼi te ʼu faʼahi e lua ʼe feala ke tou maʼuliʼi te pelesepeto ʼaenī.
2 Tatatou Minisitelio Takitokotahi: ʼE tou maʼu he ʼu tapuakina lahi mokā tou vaevae te logo lelei mo te hahaʼi ʼi te ʼu temi ʼaē ʼe tou lava fai faka mafola ai. (Taag. 3:27, 28) ʼE vikiʼi te hahaʼi tokolahi ʼaē ʼe lahi tanatou to ʼaki te lahi ʼo tanatou kau ki te minisitelio, ʼo nātou kau ki te pionie vaeluaʼi temi peʼe nātou pionie katoa. Ko tatou fuli ʼe feala ke lahi tatatou to mokā tou toe liliu ki te ʼu hahaʼi fuli ʼaē neʼe nātou fia logo, pea mo tou fakaafe ke nātou ako te Tohi-Tapu ʼi te temi ʼaē ʼe feala ai. (Loma 12:11) Kapau ʼe tou faiga ʼi te ʼu faʼahi ʼaia pea ʼe hoko anai he ʼu meʼa fakaloto mālohi pea mo tuputupu ai tatatou fiafia ʼi te minisitelio.
3 Tou Lagolago Ki Te Puleʼaga ʼa Te ʼAtua: Neʼe fai e Paulo tana tokoni ke ‘to lahi’ ʼo ʼuhiga mo te foaki ʼo he ʼu koloā. (2 Ko. 9:6, 7, 11, 13) Ia ʼaho nei, ʼe lahi te ʼu meʼa ʼe feala ke tou fai moʼo lagolago ki te Puleʼaga, ʼi te faʼahi fakasino pea mo te faʼahi ʼo te ʼu koloā. ʼE feala ke tou tokoni ki te laga ʼo te ʼu Fale ʼo Te Puleʼaga pea mo te ʼu Fale Fakatahi. ʼE feala ke tou fakatuʼutuʼu totatou temi ke feala hatatou kau ki te fakamaʼa pea mo te gaohi ʼo te ʼu koga meʼa ʼaia ʼo te tauhi moʼoni. Pea ʼe feala ke tou foaki he falā ki te ʼu meʼa ʼe totogi e totatou kokelekasio pea ki te gāue fai faka mafola ʼo te Puleʼaga ʼi te malamanei katoa pea mo te fai ʼo he ʼu tisipulo. ʼUhi he tou fai e tatou fuli totatou maʼua, ʼe tou fiafia lahi ʼi tatatou sisio ki te tapuakina lahi ʼa Sehova ki te gāue ʼaia neʼe ina fakatotonu mai!—Mala. 3:10; Luka 6:38.
4 ʼE tokoniʼi tatou e te Folafola ʼa te ʼAtua ke tou ‘gāue ki te fai ʼo te meʼa ʼaē ʼe lelei, mo tou maʼu meʼa ʼi he ʼu gāue lelei, ke tou agaʼofa, lotolelei ki te vahevahe.’ Kapau ʼe tou tali te tokoni ʼaia, pea ʼe tou maʼu ʼi te temi nei he ʼu tapuakina lahi. Pea ʼe tou toe ‘tānaki ai maʼa tatou, ohage he koloā moʼoni, he fakatafito taulekaleka ki te temi ka haʼu pea mo te maʼuli moʼoni’ ka hoko mai.—1 Tim. 6:18, 19.