“Koutou Nonofo Fakaonoono”
1 ʼI te temi ʼaē neʼe fai ai e Sesu te ʼu palalau ʼaē ʼe tuʼu ia Mateo 26:38-41, neʼe kua fakaōvi ia ki te temi faigataʼa ʼaupito ʼo tona maʼuli. Ko te temi ʼaia ka hā anai ko te temi maʼuhiga ʼaupito ʼi te hisitolia ʼo te tagata. Neʼe fakalogo leva te hāofaki ʼo te malamanei ki te lakaga ʼaia. Neʼe ʼaoga ki te kau tisipulo ʼa Sesu ke nātou “nonofo fakaonoono.”
2 Ia ʼaho nei ʼe tou teuteu atu ki te haʼu ʼa Sesu ʼi tona tuʼulaga ʼaē ko te tagata hāofaki pea mo te tagata fakaʼauha. Mai tona ʼaluʼaga ʼaē ko tatou ko te kau Kilisitiano ʼe nonofo fakaonoono, ʼe tou tokagaʼi te maʼuhiga ʼo te temi, koia ʼe mole tou nonofo pe ʼo fakatalitali ki totatou hāofaki ka mole tou fai he meʼa. ʼE tou ʼiloʼi ʼe tonu ke tou nonofo teuteu ʼi te temi fuli pe. ʼE ʼaoga ke tou haga “faʼa gāue pea mo faʼafai” ʼi tatatou tauhi ʼaē kia Sehova. (1 Tim. 4:10) ʼE feafeaʼi anai kia tatou takitokotahi? ʼE tou nonofo fakaonoono koa?
3 Tou Sivi Ia Tatou Totonu: Neʼe fai foki e Sesu te fakatokaga ʼaenī: “Ke koutou tokaga kia koutou totonu.” (Luka 21:34, 35) ʼE tonu ke tou tokakaga kia tatou totonu, ke tou ʼiloʼi papau “ ʼe mole tukugakoviʼi ai [tatou] ʼi he meʼa pea ke [tou] maʼa . . . ʼi te lotolotoiga ʼo he taʼiake aga fakalialia pea mo fakapikopiko.” (Filp. 2:15) ʼE tou maʼuʼuli koa ʼi te ʼaho fuli ohage ko he kau Kilisitiano, ʼo tou faʼifaʼitaki kia Sesu pea mo tou mulimuli ki te ʼu lekula ʼaē ʼe tuʼu ʼi te Folafola ʼa te ʼAtua? ʼE tonu ke tou tekeʼi te aga heʼe faka Kilisitiano ʼaē ko he fakaʼiloga ʼo te mālama ʼaenī ʼe “takoto ia ʼi te mālohi ʼo te agakovi.” (1 Soane 5:19; Lom. 13:11-14) Ka ʼe tou sivi ia tatou totonu ʼaki te Tohi-Tapu, ʼe tou nonofo fakaonoono moʼoni koa ohage ko te meʼa neʼe akoʼi e Sesu?
4 ʼE tonu ke nofo tokaga te kau tagata ʼāfea ke nātou fakahoko fakalelei tonatou ʼu maʼua ʼaē ʼi te kokelekasio, ke mahino kia nātou ʼe nātou huʼi maʼua anai ʼo ʼuhiga mo tanatou faʼahiga tokakaga ʼaē ki te faga ōvi. (Hep. 13:17) Ko te ʼu pule famili ʼe nātou maʼu te maʼua makehe, ʼaē ko te takitaki ʼo tonatou ʼu famili ʼi te ʼu ala ʼo Sehova. (Sen. 18:19; Sos. 24:15; vakaʼi ia 1 Timoteo 3:4, 5.) Pea tahi ʼaē meʼa, ʼe maʼuhiga tāfito ke tou mulimuli fuli ki te fakatotonu ʼa te Tohi-Tapu ʼaē ke tou feʼofaniʼaki! ʼE ko te fakaʼiloga ʼaia ʼo te kau Kilisitiano moʼoni.—Soane 13:35.
5 Tou Fakatokagaʼi Niʼihi: Ko te nofo fakaonoono ʼe mole gata pe ʼi tatatou tokaga ʼaē kia tatou totonu. Ko totatou maʼua ko te fai ʼo te ʼu tisipulo. (Mat. 28:19, 20) Ko te ʼofa ki totatou tatau ʼe tonu ke ina uga tatou ke tou fakatokagaʼi niʼihi ke feala hanatou hāo ʼi te fakaʼauha ʼaē ka hoko ki te mālama ʼaenī. Ko te maʼua ʼaia ʼo te kau Kilisitiano fuli. ʼE ko te koga tāfito ʼaia ʼo tatatou tauhi. (Lom. 10:9, 10; 1 Ko. 9:16) ʼI te agamāhani ʼe tou felāveʼi mo te hahaʼi ʼe mole fia logo peʼe ko ʼihi ʼe fakafeagai ki te gāue hāofaki ʼaia. ʼE maʼua ke tou haga fai te gāue, māʼiape la mo kapau ʼe tokolahi ia nātou ʼaē ʼe nātou meʼa noaʼi tatatou gāue fakatokaga. (Esk. 33:8, 9) Ko totatou ʼofa moʼoni ki te ʼAtua pea mo totatou tatau ʼe ina uga anai tatou ke tou haga fai te gāue ʼaia.
6 ʼE mole ko he temi ʼaenī ke tou fakafīfīmālie ai. ʼE mole tonu ke tou faka fealagia ki te ʼu tuʼania ʼo te maʼuli ʼo te ʼaho fuli ke nātou fakahēʼi tatou, peʼe ke tou kau ki te ʼu fakafiafia ʼo te mālama ʼaenī, ʼaē ʼe feala ke nātou liliu ko he ʼu hele. (Luka 21:34, 35) Ko te temi ʼaenī, ʼe ko te temi ʼe maʼuhiga ʼaupito age ia. Ko te temi kua fakaōvi ki te temi ʼaē ka fakahoko ai e Sesu Kilisito tana fakamāu ki te tuʼu agakovi ʼaenī. ʼE gata pe kia nātou ʼaē ʼe nonofo ʼalaʼala, mo nonofo tokaga, pea mo nonofo fakaonoono ʼe maʼuʼuli anai. Kapau ʼe tou fakalogo ki te ʼu fakatotonu ʼa Sesu pea ʼe tou “hāo mai te ʼu meʼa fuli ʼaia,” pea ʼe tou fakafetaʼi anai ki ai!—Luka 21:36.