Ko Te ʼu Fakamanatu ʼa Sehova ʼe Nātou Uga Koa Tatou ʼi Te Faʼahi Fakalaumālie?
1 Neʼe fakavikiviki te tagata fai pesalemo kia Sehova, ʼo ina ʼui fēnei: “ ʼE ʼau fakatokagaʼi tau ʼu fakamanatu.” (Pes. 119:99) Ko te kupu faka Hepeleo ʼaē ʼo ʼuhiga mo te kupu ʼaē ko te “fakamanatu” ʼe ina fakaliliu te manatu ʼaē ko Sehova ʼe ina fakamanatuʼi mai kia tatou te meʼa ʼaē ʼe tuʼu ʼi tana ʼu lao, ʼi tana ʼu fakatotonu, ʼi tana ʼu lekula, ʼi tana ʼu folafola pea mo tana ʼu pelesepeto. Kapau ʼe tou tali te ʼu fakamanatu ʼaia, pea ʼe nātou uga anai tatou ʼi te faʼahi fakalaumālie pea ʼe tou maʼu ai te fiafia.—Pes. 119:2.
2 ʼUhi ko tatou ko te hahaʼi ʼa Sehova, ʼe tou maʼu tuʼumaʼu te fakatotonu pea mo te tokoni. ʼE lahi te ʼu fakatotonu neʼe kua tou logo pe kiai ʼi muʼa atu. Logope la tatatou leleiʼia te fakaloto mālohi ʼaia, ʼe feala pe ke tou galoʼi. (Sake 1:25) ʼAki te loto faʼa kātaki ʼe foaki mai e Sehova te ʼu fakamanatu fonu ʼi te ʼofa. Neʼe tohi e te ʼapositolo ko Petelo ʼihi ʼu fakamanatu ʼi te ʼu fakamanatu ʼaia moʼo ‘uga ʼo tatatou ʼu fealagia ʼaē ki he fakakaukau ʼe lelei ʼo ʼuhiga mo hatatou fakamanatuʼi te ʼu fakatotonu ʼa te ʼAliki.’—2 Pe. 3:1, 2.
3 ʼE fakamanatuʼi tuʼumaʼu mai kia tatou te maʼuhiga ʼaē ʼo te ako takitokotahi pea mo te kau ʼaē ki te ʼu fono. ʼE fai te fakamanatu ʼaia koteʼuhi ʼe maʼuhiga ʼaupito ki totatou maʼuli fīmālie ʼi te faʼahi fakalaumālie.—1 Tim. 4:15; Hep. 10:24, 25.
4 ʼE faigataʼa ki niʼihi tanatou mulimuli ki te fakatotonu faka Kilisitiano ʼaē ʼo ʼuhiga mo te fai faka mafola. ʼE fakamaʼua kiai he faiga, he fakatuʼutuʼu mālohi, pea mo he faʼa kātaki. Logope la ʼe fakamaʼuaʼi ʼaupito tatou kiai, neʼe tokoniʼi tatou ke tou “pipiki maʼu” ʼaki hatatou “tui ʼi [ʼotatou ʼu] vaʼe te teu ʼo ʼuhiga mo te logo lelei.”—Ef. 6:14, 15.
5 ʼAua naʼa tou fai tatatou gāue ʼuhi pe heʼe tou ʼiloʼi te ʼu fakatotonu ʼaē ʼa Sehova. ʼE fakamanatuʼi mai e te ʼapositolo ko Paulo, ʼe uga tatou e te loto ke tou fai te meʼa ʼaē ʼe ʼaoga moʼo “fakahā ia muʼa ʼo te hahaʼi ʼo ʼuhiga mo te fakamaʼuli.” (Lom. 10:10) Kapau ʼe mālohi tatatou tui pea kapau ʼe falele totatou loto ki te ʼu fakamanatu ʼa Sehova, ʼe tou fia fai anai he ʼu palalau moʼo fakavikiviki ʼo tona huafa.—Pes. 119:36; Mat. 12:34.
6 Ka ʼe tou gāue mālohi moʼo fakahoko ʼo he ʼu gāue ʼe lelei, ʼe tou ʼamanaki pe anai ʼe ko he faʼahi ia ʼe fakatupu fiafia kia tatou. (Tnk. 2:10) ʼE fakahā e Paulo ko te fiafia ʼe ko te fua ʼo te laumālie maʼoniʼoni ʼo Sehova, pea ʼe tonu anai ke tou faiga ke lahi ia tatou te kalitate ʼaia. (Kal. 5:22) Neʼe toe hilifaki atu kiai e Petelo ko he “faiga fakamalotoloto” ʼe fakapale anai ʼaki te minisitelio ʼe fua lelei, pea ʼe ina fakatupu te fiafia.—2 Pe. 1:5-8.
7 Ka ʼe tou felāveʼi mo he fihifihia, ʼe tonu anai ke tou manatuʼi te pipiki maʼu ʼa te kau ʼapositolo ohage ko tanatou ʼui ʼaenī: “Kae kia mātou, ʼe mole feala ke tuku tamatou palalau ki te ʼu meʼa ʼaē neʼe mātou sisio kiai pea mo fagono kiai.” (Gāue 4:20) ʼE tou lotomālohi ʼi te fai ʼo te meʼa ʼaia mokā ʼe tou manatuʼi ‘ ʼaki te meʼa ʼaia, ʼe tou hāofaki anai ia tatou, pea mo nātou ʼaē ʼe fakalogo mai kia tatou.’—1 Tim. 4:16.
8 ʼE mole tou ʼiʼita anai ʼi tatatou maʼu tuʼumaʼu te ʼu fakamanatu. Kae, ʼe loloto anai tatatou leleiʼia te ʼu meʼa maʼuhiga ʼaia. (Pes. 119:129) ʼI te ʼu temi faigataʼa ʼaupito ʼaenī, ʼe tou fakafetaʼi kia Sehova ʼi tana foaki mai te ʼu fakamanatu moʼo uga ʼo tatou ʼi te faʼahi fakalaumālie pea ke tou gāue mālohi ʼi te ʼu gāue ʼaē ʼe lelei!—2 Pe. 1:12, 13.