Ke Koutou Fakatupu Lotomālohi
1 Mai tona ʼaluʼaga ʼaē ʼe tou maʼuʼuli “ ʼi te ʼu temi maʼuhiga ʼaupito mo faigataʼa,” ʼe ʼaoga ke fakaloto mālohiʼi tatou fuli. (2 Tim. 3:1) ʼI te mahino lelei kia Paulo te ʼaoga ʼo te faʼahi ʼaia ʼi tona temi, neʼe tokaga ia ke ina fakaʼaogaʼi tana ʼu felāveʼi ʼaē mo tona ʼu tēhina ohage ko he ʼu faigamālie ki te “fefakaloto mālohiʼaki.” Neʼe ina uga tona ʼu tēhina ke nātou “haga kumi te ʼu meʼa . . . ʼaē ʼe kau ki te fefakaloto mālohiʼaki.” (Lom. 1:11, 12; 14:19) Ko te ʼu fakatuʼutuʼu ʼaia ʼe fakatupu ai te “fakamālohiʼi ʼo te ʼu nefesi ʼo te kau tisipulo, ʼo fakaloto mālohiʼi ia nātou ke nātou nofo maʼu ʼi te tui.” (Gāue 14:22) ʼE lahi ʼaupito te ʼaoga ʼo te taʼi fakaloto mālohi ʼaia ia ʼaho nei.
2 ʼE feala ke tou fakatupu lotomālohi ki niʼihi ʼaki te ʼu palalau ʼaē ʼe tou fai. Ka ʼe tou fakaʼaogaʼi tatatou ʼu palalau ʼi tona temi tonu ʼe feala ke liliu “ohage ko he ʼu foʼi ʼapo aulo ʼi he pa siliva neʼe togi.” (Taag. 25:11) ʼAki tatatou ʼu tali ʼaē ʼi te ʼu fono, ʼe tou “fefakaloto mālohiʼaki.” (Hep. 10:25) Ko totatou ʼalelo ʼe feala ke fakaʼaogaʼi ʼi he faʼahi ʼe lelei, mokā tou fai he ʼu fakamatala, mokā tou fai he fakavikiviki, peʼe ko tatatou palalau ki he ʼu meʼa fakalaumālie. Ko te faʼahiga fakaʼaogaʼi fakalelei ʼaia ʼo te ʼalelo ‘ ʼe lelei moʼo hikihiki, moʼo foaki kia nātou ʼaē ʼe fagono he meʼa ʼe lelei.’—Ef. 4:29.
3 Koutou Palalau Ki Te ʼu Meʼa ʼAē ʼe Fakatupu Lotomālohi: Ia Filipe 4:8, neʼe foaki e Paulo te ʼu tokoni ʼo ʼuhiga mo tatatou ʼu palalau. Neʼe ina ʼui ʼe tonu anai ke tou tokagaʼi te meʼa fuli ʼe moʼoni, te meʼa fuli ʼe tāu mo he fakaʼapaʼapa, te meʼa fuli ʼe faitotonu, te meʼa fuli ʼe maʼa, te meʼa fuli ʼe fakavikiviki, te meʼa fuli ʼe lelei tona talanoaʼi, te meʼa fuli e vilitute, pea ʼe tau ke vikiʼi. ʼE feala ke tou tokakaga tuʼumaʼu ki te meʼa ʼaē ʼe tou talanoa kiai ke moʼoni pea mo ʼaoga ki niʼihi mo kapau ʼe fakatafito ki te Folafola ʼa te ʼAtua. (Soane 17:17) Ko te foaki ʼo totatou maʼuli faka Kilisitiano ki te ʼAtua, ko te ʼu meʼa ʼaē ʼe tou ako ʼi te ʼu fono ʼo te kokelekasio, ko tatatou faʼahiga fakahoko katoa ʼo tatatou minisitelio, pea mo ʼihi ʼatu ʼu faʼahi ʼe ko te ʼu meʼa ʼaia ʼe tāu mo he fakaʼapaʼapa. Ko te ʼu fai palalau ʼe ʼaoga ʼo ʼuhiga mo te ʼu lekula pea mo te ʼu pelesepeto ʼo te Folafola ʼa te ʼAtua, ʼe mahino papau ia ʼe nātou tokoniʼi tatou ke tou liliu ʼo “poto ki te maʼuli.” (2 Tim. 3:15) ʼE feala ke tou fakahā tatatou leleiʼia te aga maʼa ʼaē ʼa te hahaʼi ʼo te kautahi maʼa ʼa Sehova. ʼE feala ke tou vikiʼi te ʼu gāue fakavikiviki ʼaē neʼe fai e totatou ʼu tēhina. (Soane 13:34, 35) Ko te ʼu meʼa ʼaē ʼe lelei hona talanoaʼi, ko te ʼu kalitate lelei faka Kilisitiano ʼo ʼuhiga mo te tui, mo te fiafia, mo te tokalelei pea mo te kātaki fualoa ʼaē ʼe tou tokagaʼi ʼi ʼotatou ʼu tēhina. Ko te palalau ki te ʼu taʼi meʼa ʼe vilitute pea mo te ʼu meʼa ʼe tāu ke vikiʼi ʼe ‘lelei moʼo fakatupu lotomālohi’ ʼo niʼihi.—Lom. 15:2.
4 ʼI te ʼaho fuli pe, ʼe tou felāveʼi mo te lotovaivai ʼuhi ko te ʼu tuʼania ʼo te mālama. ʼE ko he meʼa fakaloto fīmālie tatatou tauʼi te ʼu tuʼania ʼaia pea mo tou fakatahitahi mo totatou ʼu tēhina! Ko te temi maʼuhiga ʼaē ʼe tou fakaʼaogaʼi fakatahi, ʼe ko te koloā ʼe tonu ke tou faka maʼuhigaʼi. Kapau ʼe tou fai tuʼumaʼu he palalau fakaloto mālohi, ʼe ʼui moʼoni anai e ʼihi ʼo ʼuhiga mo tatou: “Neʼe nātou fakafimālie toku ʼatamai.”—1 Ko. 16:18.