Te ʼu Mātuʼa ʼAē ʼe Fakafiafia!
1 Kapau ko koutou ko he tūpulaga ʼe koutou nofo ʼi he ʼapi Kilisitiano, ʼe ʼi ai te faʼahiga meʼa makehe ʼe feala ke fakafiafia ai takotou ʼu mātuʼa. Kapau ʼe koutou haga haʼele ʼi te ala ʼo te faitotonu, “ko tau tāmai pea mo tau faʼe ʼe nā fakafiafia anai.” (Taag. 23:22-25) ʼI te agamāhani ʼe loto tau ʼu mātuʼa ke ke maʼu te meʼa ʼaē ʼe lelei ʼosi. ʼE mole he tahi age meʼa ʼe feala ke lahi age tanā leleiʼia mokā ʼe nā sisio ʼe ke leleiʼia te moʼoni pea mo ke foaki tou maʼuli kia Sehova.
2 ʼE feala ke koutou fakamālo ʼi takotou maʼu he ʼu mātuʼa ʼe nofo ʼi te moʼoni. Talu mai takotou tupu, mo tanatou fafaga koutou, mo tanatou fakavala koutou, pea mo tanatou foaki atu tokotou meʼa nofo ʼo feiā aipe mo te temi ʼaē neʼe koutou mahaki ai neʼe tokakaga kia koutou. Ko te meʼa ʼe maʼuhiga age, neʼe nātou faiga ke nātou akoʼi koutou ʼo ʼuhiga mo Sehova pea mo tana ʼu ala faitotonu; ko te ako ʼaia ʼe feala ke koutou ʼiloʼi papau ai te maʼuli heʼegata. (Ef. 6:1-4) ʼE lava feafeaʼi hakotou fakahā tokotou loto fakafetaʼi?
3 Ke Koutou Leleiʼia Te Moʼoni: Neʼe faiga takotou ʼu mātuʼa ke nātou ako koutou ke koutou tokaga fakamalotoloto ki te moʼoni, ke koutou tuputupu ʼi te faʼahi fakalaumālie, pea ke koutou fakatahi mo te kautahi ʼa Sehova. ʼE feala ke koutou fakahā takotou loto fakafetaʼi ʼaki takotou holi ʼi tokotou loto katoa ki te ako faka famili. Koutou fakahā takotou holi ʼaē ke koutou kau ki te ʼu fono, ʼo koutou fai he fakatuʼutuʼu ke koutou teuteu ke feala ai foki he kaku fakatomuʼa ʼa te famili ki te ʼu fono. Koutou heheka ia tafa ʼo takotou ʼu mātuʼa lolotoga te fono, pea ke koutou fakalogo fakalelei ʼaki takotou mulimuli ʼi te ʼu tohi ʼaē ʼe fakaʼaogaʼi ʼi te ʼu fono. Koutou faigaʼi ke koutou kau ki te ʼu fono ʼo fai hakotou ʼu tali. Ke koutou fakahā ko koutou ko ni hahaʼi ʼe ako fakamalotoloto ʼi te Ako ʼo Te Minisitelio Faka Teokalatike, ʼo koutou tali te ʼu akonaki pea mo koutou teuteuʼi fakalelei. Koutou foaki tokotou temi ki te ʼu gāue ʼi te Fale ʼo te Puleʼaga, ʼo tokoni ʼi te faʼahi ʼaē ʼe koutou ʼaoga ai moʼo fai ʼo he gāue. Ko takotou fai te ʼu faʼahiga gāue ʼaia ʼe feala ai ke koutou taupau maʼu ʼi tokotou loto te meʼa ʼaē ʼe lelei ki tokotou faʼahi fakalaumālie.
4 Koutou Fai He ʼu Fakatuʼutuʼu Māmālie: ʼE mole gata pe ʼi takotou kau ki te fai faka mafola, kae ke koutou fakahā te holi ʼaē ke koutou liliu ko he tagata fai faka mafola faiva. Koutou mulimuli ki te polokalama ʼo te vāhaʼa fuli ʼo ʼuhiga mo te lau ʼo te Tohi-Tapu, peʼe ke koutou fakatuʼutuʼu ke koutou lau te Tohi-Tapu katoa. Ke koutou fakatuʼutuʼu ke koutou fai te ʼu aga ʼe ʼaoga ke feala hakotou foaki tokotou maʼuli ki te ʼAtua pea ke koutou papitema. ʼE feala ke tokoni takotou ʼu mātuʼa kia koutou ke koutou tokakaga fakalelei ki takotou ako ke feala ai hakotou maʼu he fealagia ki ʼamuli ke koutou gāue katoa kia Sehova. Ke koutou fakatuputupu ia koutou, ke feala ai he hinoʼi fakavilivili ʼo koutou ki he ʼu pilivilesio makehe ohage ko te gāue pionie peʼe ko te gāue ʼi te Petele. (Gāue 16:1, 2) Koutou fai he ʼu fakatuʼutuʼu ke tokoni kia koutou ke koutou “ ʼiloʼi papau te ʼu meʼa ʼaē ʼe maʼuhiga tāfito, ke feala hakotou liliu ʼo . . . fonu ʼi te fua ʼo te faitotonu.”—Filp. 1:10, 11.
5 Ko te temi tūpulaga, ʼe ko he temi ʼaia moʼo ako, ke maʼu ai te poto pea mo akoʼi ai te maʼuli ʼaē mo te hahaʼi. Ko te temi ʼe feala ai hakotou fakafiafia ki te maʼuli ʼi muʼa ʼo te hoko mai ʼo te ʼu tuʼania pea mo te ʼu maʼua ʼaē ʼe felāveʼi mo te hahaʼi lalahi. Neʼe ʼui fēnei e Salomone: “Ke ke fakafiafia, tama, ʼi tou temi tūpulaga, pea ke fai e tou loto he meʼa ʼe lelei kia te koe ʼi te ʼu ʼaho ʼo tou temi tūpulaga.” (Tnk. 11:9) Kapau kua koutou fakatuʼutuʼu ʼi tokotou loto ke koutou gāue kia Sehova ʼi tokotou temi tūpulaga, ʼe koutou utu anai te ʼu tapuakina heʼegata.—1 Fkma. 28:9.
6 Kapau ʼe koutou “haka kumi te faitotonu” ka mole ko “te ʼu holi ʼo te temi tūpulaga,” ʼe koutou fakafimālieʼi anai takotou ʼu mātuʼa mai te tuʼania pea mo te lotomamahi. (2 Tim. 2:22) ʼE koutou fakafiafia anai tokotou loto. (Taag. 12:25) Ko te meʼa ʼaē ʼe lahi age, ʼe koutou fakafiafia anai tokotou Tupuʼaga, ia Sehova ʼAtua.—Taag. 27:11.