Ko Te Kau Tuʼumaʼu Ki Te ʼu Fono—ʼE Ko He Faʼahi Maʼuhiga Ke Tou Nonofo Mālohi Ai
1 ʼE fakaloto mālohiʼi tatou e te ʼapositolo ko Paulo ke tou nonofo “mālohi ʼi te tui.” (Tito 1:9, 13) ʼI te ʼu fono ʼo te kokelekasio ʼe tou vakaʼi ai te ʼu manatu ʼe ʼaoga ki te maʼuli pea ʼe akoʼi ai tatou peʼe feafeaʼi tatatou kofuʼi katoa te teu tau fakalaumālie, ke feala ai hatatou “tuʼu mālohi ʼo fakafeagai ki te ʼu kākā ʼa te Tevolo.”—Ef. 6:11; Filp. 4:8.
2 ʼE Foaki Mai e Te ʼu Fono Te ʼu Meʼa ʼAē ʼe ʼAoga Kia Tatou: Ko te kau tuʼumaʼu ki te ʼu fono ʼo te kokelekasio ʼe ko he faʼahi maʼuhiga ke tou nonofo mālohi ai. (1 Ko. 16:13) Ko te ʼu faikole ʼaē ʼe fai ʼi te ʼu fono ʼe ko he fakamālo pea mo he fakavikiviki ki te ʼAtua, pea ʼe ko te ʼu kole mamahi ʼe fai kia ia ʼo ʼuhiga mo te kokelekasio pea mo te ʼu meʼa ʼaē ʼe ʼaoga kiai. (Filp. 4:6, 7) Ko tatatou kau ki te ʼu katiko ʼi te Fale ʼo Te Puleʼaga ʼe ina hikihiki ai tatou, pea ʼe faka fealagia ai kia tatou ke tou fakahā tatatou ʼu manatu pea mo te ʼu meʼa ʼi totatou loto, ʼi tatatou tauhi ʼaē kia Sehova. (Ef. 5:19, 20) Ko tatatou fakatahitahi mai ki te Fale ʼo Te Puleʼaga, ʼi muʼa ʼo te kamata ʼo te ʼu fono pea mo te hili ʼo te ʼu fono, ʼe fakaloto mālohiʼi ai tatou, ke tou tuputupu ai, pea ʼe fakafimālieʼi ai tatou.—1 Tes. 5:11.
3 ʼI ʼApelili ʼo te taʼu ʼaenī, ko te akonaki makehe ʼaē, “Ko Te Fakaʼauha ʼo Te Lotu Loi Kua Ōvi Mai,” neʼe ina fakaloto mālohiʼi ia nātou ʼaē ʼe ʼoʼofa ki te moʼoni ke nātou foimo mavae mai Papiloni Lahi. (Fkhā. 18:4) Lolotoga te māhina ʼo Sūnio pea mo Sūlio, neʼe fakaloto mālohi tatou e te ʼu alatike ʼo Te Tule Leʼo ʼaē neʼe tou ako ai te ʼu faka mālamagia ʼo ʼuhiga mo te ala ʼo te faitotonu! (Taag. 4:18) Tou fakakaukauʼi age muʼa pe neʼe feafeaʼi age la mokanapau neʼe mole tou kau ki te ʼu fono ʼaia.
4 ʼI tatatou Fakatahi Faka Tisitilike “Tou Vikiviki Fakafiafia,” neʼe fakahā lelei ai te maʼuhiga ʼaē ke tou ako ke hikihiki totatou minisitelio. Ohage ko tona fakahā ʼi te tohi Organisés pour bien remplir notre ministère ʼi te pasina 73, ko te Ako ʼo Te Minisitelio Faka Teokalatike ʼe ko he fakatuʼutuʼu moʼo tokoni ki te tuputupu ʼo te kokelekasio katoa. Neʼe hoki ʼosi atu nei te tufa ʼo te polokalama ʼaē ʼe tokoni kia tatou ke tou fakamāmāhani mo te ʼatamai mālama loloto ʼo te Tohi-Tapu ʼaki tatatou fakaʼaogaʼi te tohi Unis dans le culte. ʼE mole tou loto anai ke tou tōtō ʼi te ako ʼaia.
5 Ko tatatou Fono Gāue ʼe tokoni kia tatou ke ʼāsili age tatatou faiva ʼi te minisitelio. Ko te meʼa ʼaia neʼe fakahā ʼi te fono ʼaē neʼe fakahā mai ai kia tatou te ʼu meʼa ʼaē ʼe tonu ke tou fai, ʼo ʼuhiga mo te tufa ʼo te ʼu Logo ʼo Te Puleʼaga n° 34. Ko te ʼu tapuakina ʼa Sehova ki te gāue ʼaia neʼe lahi ʼaupito, ohage ko tatatou sio ki tona ʼu fua makehe ʼi te malamanei katoa. (Vakaʼi 2 Kolonito 9:6, 7.) Ko nātou ʼaē ʼe kau tuʼumaʼu ki te ʼu fono neʼe fakaloto mālohiʼi nātou, pea neʼe tokoniʼi nātou ke nātou lagolago ki te gāue ʼaē ʼe fai.
6 ʼI te ʼu Ako Tohi ʼo te kokelekasio, ko tatatou mahino ki te ʼu fakatuʼutuʼu ʼa te ʼAtua ʼe fakatuputupu ʼaki te ʼu meʼa ʼaē ʼe tou ako ʼaki te kaupepa ʼE tokaga moʼoni koa te ʼAtua kia tatou? Pea ʼe tou ako anai te kaupepa ʼaē ko Te Kau Fakamoʼoni ʼa Sehova. ʼE mahino papau ia, ko te ako ʼo te kaupepa ʼaia ʼe tokoni anai kia tatou ke tou ako fakalelei ia nātou ʼaē ʼe ako mo tatou, ke nātou ʼiloʼi te Kautahi ʼo te ʼAtua pea mo te gāue ʼaē ʼe ina fai ia ʼaho nei, ʼaē ʼe fakatafito ki te Tohi-Tapu.
7 Tou Fakamuʼamuʼa Tatatou Kau Tuʼumaʼu ʼAē Ki Te ʼu Fono: ʼE lahi te ʼu fenua ʼaē ʼe felāveʼi ai ʼotatou ʼu tēhina mo te ʼu mamahi, ʼe kei mahino kia nātou ʼe maʼuhiga tanatou fakatahitahi ʼi te vāhaʼa fuli. Ohage la, ʼi Burundi, Rwanda, Lipelia, pea mo Bosnie pea mo Herzegovine, tokolahi te ʼu hahaʼi foʼou ʼe nātou kau ki te ʼu fono pea neʼe tuʼa lua peʼe tuʼa tolu tanatou hahaʼi age ʼi te kau fai faka mafola. ʼI te faʼahi ʼaia ʼe tokoni Sehova ki te ʼu tēhina ke nātou nonofo mālohi ʼo nātou logo tahi.—Filp. 1:27; Hep. 10:23-25.
8 Ko ʼaē ʼe ina meʼa noaʼi te kau tuʼumaʼu ʼaē ki te ʼu fono, ʼe tonu ke ina fakatonutonuʼi tana aga ʼaia ʼi te temi nei. (Tnk. 4:9-12) Ke feala hatatou nonofo mālohi, ʼe ʼaoga ke tou fakatahitahi mo te ʼu hahaʼi ʼaē kua fakapotopoto, ohage ko nātou ʼaē ʼe tou maʼu ʼi te ʼu fono ʼo te kokelekasio.—Loma 1:11.