Tou Fai ʼAki Totatou Nefesi Katoa!
1 ʼE lahi te ʼu meʼa ʼe tonu ai ke tou loto fakafetaʼi kia Sehova. ʼE kau kiai te ʼu meʼa ʼaē neʼe ina fai ʼi te temi muʼa, mo te ʼu meʼa ʼaē ʼe ina lolotoga fai ʼi te temi nei, pea mo te ʼu meʼa ʼaē ka ina fai anai maʼa tatou ʼi te temi ka haʼu. Koteā te meʼa ʼaē ʼe tonu ke uga ai tatou e tatatou loto fakafetaʼi ke tou fai? ʼE tali fēnei e te pesalemo neʼe fai e Tavite: “ ʼE ʼau vikiviki anai kia Sehova ʼi te temi fuli pe; ko tana fakavikiviki ʼe nofo tuʼumaʼu anai ʼi toku gutu.”—Pes. 34:1.
2 ʼE fakahā lelei mai e te Tohi-Tapu neʼe fakatotonu mai ke tou ʼolo ʼo fai faka mafola. Ko te gāue ʼaia ʼe tou fai “ ʼaki totatou nefesi katoa maʼa Sehova.” (Kol. 3:23) ʼE feafeaʼi anai tatatou fai te minisitelio mo kapau ʼe tou fai ʼaki totatou nefesi katoa? Ka tou tokagaʼi te ʼofa ʼaē ʼa Sehova kia tatou, ʼe mahino papau ia ʼe uga ai tatou e totatou loto ke tou talanoa fakamalotoloto ki te hahaʼi ʼo ʼuhiga mo ia pea mo tana ʼu fakatuʼutuʼu taulekaleka! ʼE uga ai tatou ke tou fai te meʼa ʼaē ʼe feala ke tou fai.
3 ʼE mahino ia ko he tahi ʼe tauhi ʼaki tona nefesi katoa, ʼe fia tokaga tāfito ki te gāue taputapu. Ko te tagata fai pesalemo, ʼaē neʼe feiā tana manatu, neʼe ina ʼui fēnei: “Tuʼa fitu ʼi te ʼaho neʼe ʼau vikiʼi koe.” (Pes. 119:164) Ko nātou ʼaē ʼe manatu tahi mo te tagata fai pesalemo, ʼe nātou kumi te ʼu faigamālie moʼo fakavikiviki ʼo Sehova. Kapau ʼe nātou maʼu he ʼu fealagia, pea ʼe nātou fakalahi tanatou gāue faiva.
4 ʼE Lahi Te ʼu Faigamālie ʼe Tou Maʼu Moʼo Fakavikiviki ʼo Sehova: ʼE mole tonu anai ke tou talitali ke hoki tou ʼolo pe ʼo fai faka mafola ʼi te ʼu ʼapi, pea tou fakahā ai te logo lelei. Ko ʼotatou ʼu kaugā gāue, ʼotatou ʼu kaugā ako, ʼotatou ʼu famili, pea mo ʼotatou ʼu kaumeʼa fuli ʼe tonu ke nātou fagono ki te logo ʼo te Puleʼaga. Ka tou folau, ʼe feala ke tou kamata he ʼu fai palalau ke feala ai hatatou fagonogono ki te kau gāue ʼo te otele, ki te kau gāue ʼo te fale kai, kia nātou ʼe gāue ʼi te ʼutuʼaga penisini, peʼe kia nātou ʼaē ʼe fai takisi. ʼI te temi ʼaē ʼe tou nonofo ai ʼi totatou ʼapi, ʼe feala ke tou fagonogono ki ʼotatou ʼu vāhaʼa fale peʼe ko te ʼu hahaʼi faifakatau. Kapau ʼe ʼave tatou ki te lopitali, ʼe ʼi ai te ʼu afilimie, te ʼu tōketā, pea mo ʼihi kau mahaki ʼe feala ke tou fai faka mafola kia nātou.
5 Ko Te Fagonogono Faigamālie ʼe Fua Lelei: ʼI te tahi ʼaho neʼe haʼele te ʼu Fakamoʼoni e toko lua ʼi te ʼōloto, pea neʼe nā kamata fai palalau mo te tagata ʼe ʼevaʼeva mo tana tamasiʼi. Ki muli age neʼe tali e te tagata ʼaia pea mo tona ʼohoana ia te moʼoni. Pea neʼe fakahā e te tagata ʼaia, ʼi he kiʼi temi nounou ʼi muʼa ʼo tana ʼuluaki felāveʼi mo te ʼu Fakamoʼoni, neʼe faikole ia ki te ʼAtua, ʼo ina kole fēnei ki ai, ‘Kapau ʼe ke maʼuli, pea tokoni mai ke ʼau ʼiloʼi ia koe.’ Neʼe ina ʼui ko tana felāveʼi mo te ʼu Fakamoʼoni ʼi te ʼōloto neʼe ko te tali ʼaia ʼa Sehova ki tana faikole.
6 Ko nātou ʼaē ʼe nātou holi ʼaki tonatou nefesi katoa ke nātou tokoni ki te hahaʼi ʼi te faʼahi fakalaumālie, ʼe nātou fiafia lahi. ʼE nātou ʼiloʼi ko te fai ʼo te gāue ʼaia, “ ʼaki he loto katoa,” ʼe leleiʼia e Sehova.—1 Fkma. 28:9.