Tou Faʼifaʼitaki Ki Tanatou Tui
1 Neʼe talanoa te ʼapositolo ko Paulo ki te tui ohage ko “he ʼamanaki moʼoni ki he ʼu meʼa ʼe tou falala kiai, ko te fakamoʼoni lelei ʼo te ʼu moʼoni logope la ʼe mole tou sisio kiai.” Neʼe ina toe ʼui fēnei “kapau ʼe mole ʼi ai he tui pea ʼe mole feala ke kita lelei ki te [ʼAtua].” (Hep. 11:1, 6) Neʼe uga tatou e Paulo ke tou tui, ke tou fonu ʼi te tui, pea ke tou haga kumi te tui.—2 Ko. 4:13; Kol. 2:7; 2 Tim. 2:22.
2 ʼE lahi te ʼu faʼifaʼitaki maʼuhiga ʼo te tui neʼe talanoa kiai te Tohi-Tapu. Ia Hepeleo kapite 11, ʼe foaki mai e Paulo te lisi loaloaga ʼo te kau fakamoʼoni ʼaē neʼe nātou fakahā tanatou tui mālohi. ʼI te lisi ʼaia ʼe kau ai ia Apele, te ʼuluaki tagata ʼaē neʼe mate faka maletile ʼuhi ko tana tui. ʼE kau ai mo Noe, koteʼuhi ʼaki tana tui neʼe ina fakahā te manavasiʼi faka lotu ʼaē neʼe ʼaoga moʼo hāofaki ʼo tona loto fale. ʼE vikiʼi ia Apalahamo ʼuhi ko tana tui pea mo tana fakalogo. ʼE vikiʼi ia Moisese koteʼuhi neʼe nofo agatonu ohage neʼe sio kia Ia ʼaē ʼe fakapulipuli. Ko te lisi ʼo te hahaʼi agatonu ʼaia ʼe loaloaga, koia neʼe ʼui ai e Paulo ʼe mole maʼu he temi feʼauga moʼo talanoa kia nātou fuli ʼaia. ʼE tou loto fakafetaʼi koteʼuhi ʼe feala ke tou fakamālohiʼi tatatou tui ʼaki tatatou toe vakaʼi tanatou “ ʼu aga fakamaʼoniʼoni pea mo [tanatou] aga faka lotu”!—2 Pe. 3:11.
3 ʼI te ʼuluaki sēkulō, neʼe fai e Sesu te fehuʼi ʼaenī: “Ka haʼu anai te Foha ʼo te tagata, ʼe ina maʼu moʼoni anai koa te tui ʼi te kele?” (Luka 18:8) ʼE ʼi ai koa he ʼu faʼifaʼitaki ʼo he ʼu hahaʼi tui ʼi te temi ʼaenī? ʼE tou sisio koa ki he ʼu tagata mo he ʼu fafine, ki he kau tūpulaga pea mo he kau matutuʼa, ʼe nātou fakahā tanatou tui mālohi kia Sehova ohage ko te ʼu kaugana ʼa te ʼAtua ʼo te ʼu temi faka Tohi-Tapu?
4 Te ʼu Hahaʼi Tui Ia ʼAho Nei: Ia ʼaho nei ʼe tou toe maʼu te ʼu faʼifaʼitaki maʼuhiga ʼo te tui! Ko te tui ʼa te kau tagata taupau ʼaē ʼe nātou takitaki tatou, ʼe tonu ke tou faʼifaʼitaki ki ai. (Hep. 13:7) Kae ʼe mole ko nātou pe ʼaia ʼaē ʼe nātou tuku mai he faʼifaʼitaki lelei ʼo ʼuhiga mo te tui. ʼI te ʼu kokelekasio fuli, ʼe ʼi ai te ʼu tēhina mo te ʼu tuagaʼane ʼe nātou nonofo agatonu ʼi tanatou tauhi kia Sehova, logope la ʼi ʼihi temi ʼe tau mo nātou te ʼu ʼaluʼaga faigataʼa.
5 ʼE tonu ke tou faka maʼuhigaʼi totatou ʼu tuagaʼane agatonu, ʼaē neʼe nātou kātakiʼi lolotoga ni ʼu taʼu te fakafeagai ʼo tonatou ʼu ʼohoana. Ko ʼihi tāmai pea mo ʼihi faʼe, ʼe tau mo te fihifihia ʼaē ko te taupau tokotahi ʼo tanatou fānau. ʼE ʼi ai ʼihi ʼu tuagaʼane kua mamate tonatou ʼu ʼohoana, kae ʼe nātou kau tuʼumaʼu ki te ʼu gāue ʼo te kokelekasio, logope la ʼe mole he tahi ʼi tonatou famili ʼe ina fakaloto mālohiʼi nātou. (Vakaʼi ia Luka 2:37.) ʼE tou ōfo ʼi tatatou sisio ki te tui ʼo totatou ʼu tēhina mo tuagaʼane ʼaē ʼe tau mo he ʼu fihifihia ʼo ʼuhiga mo te mahaki fakasino. Ko te tokolahi ʼe hoko atu tanatou tauhi agatonu, logope la te ʼu meʼa ʼaē ʼe faka tuʼakoi ai tanatou fai he tahi ʼu gāue. ʼE ʼi ai te kau Fakamoʼoni tūpulaga ʼe nātou haga tui mālohi, logope la te ʼu fakafeagai ʼaē ʼe hoko kia nātou ʼi te faleako. ʼE toe ʼāsili mālohi tatatou aga faka lotu, mokā tou fakatokagaʼi te ʼu pionie agatonu ʼaē ʼe faʼa kātaki ʼi te taʼu fuli ʼo nātou tauʼi te ʼu fihifihia lahi ʼaē ʼe hoko kia nātou. Ohage ko Paulo, ʼe mole feʼauga anai te temi ke tou talanoa kia nātou fuli ʼaē ʼe gāue ki te Puleʼaga, pea mo te ʼu gāue ʼaē ʼe hā ai te tui ʼo te ʼu tēhina pea mo te ʼu tuagaʼane ʼaia!
6 Ko te ʼu faʼifaʼitaki ʼa te ʼu hahaʼi agatonu ʼaia, ʼe nātou foaki mai kia tatou te fīmālie pea mo te fakaloto mālohi. (1 Tes. 3:7, 8) ʼE tonu ke tou faʼifaʼitaki ki tanatou tui koteʼuhi ko “nātou ʼaē ʼe nātou fai he gāue faitotonu ʼe ko he meʼa fakafiafia ia kia [Sehova].”—Taag. 12:22.