Tou Fakahoko Tatatou Fakapapau ʼi Te ʼAho Fuli
1 Neʼe uga te tagata fai pesalemo ko Tavite ke ina ʼui kia Sehova: “ ʼE ʼau fai anai he ʼu hiva ki tou huafa ʼo talu ai, ke feala haku fakahoko taku ʼu fakapapau ʼi te ʼaho fuli.” (Pes. 61:8) Neʼe ʼiloʼi e Tavite ko te fai ʼo he fakapapau ʼe ko he meʼa neʼe kita fili totonu ke kita fai ʼaki tokita loto katoa. Kae, neʼe toe mahino kia ia, kapau ʼe ina fai he fakapapau, pea neʼe tonu ke ina fakahoko katoa. Kae, neʼe ina fakavikiviki kia Sehova ʼo ʼuhiga mo te fealagia ʼaē ke ina fakahoko tana ʼu fakapapau ʼi te ʼaho fuli.
2 ʼI te temi ʼaē neʼe tou foaki ai totatou maʼuli kia Sehova, ʼaki he loto katoa neʼe tou fakapapau ke tou fai tona finegalo. Neʼe tou fakafisi kia tatou totonu pea neʼe tou fakatuʼutuʼu ʼi totatou maʼuli, ke tou fakamuʼamuʼa tatatou tauhi kia Sehova. (Luka 9:23) Koia, ʼe tonu ai foki ke tou fakahoko tatatou fakapapau ʼi te ʼaho fuli. (Tnk. 5:4-6) Ko te foaki ʼo totatou maʼuli ki te ʼAtua ʼi muʼa ʼo te kaugamālie, ʼaē neʼe fai ʼi te temi ʼo te papitema, ʼe tonu ke hā ʼi totatou maʼuli katoa, koteʼuhi ʼe tou ʼiloʼi “ ʼaki te gutu e kita tala ia muʼa ʼo te kaugamālie ʼo ʼuhiga mo te fakamaʼuli.” (Loma 10:10) ʼE kau kiai te faka mafola ʼo te logo lelei. (Hep. 13:15) ʼE lahi ʼaupito te kehekehe ʼo totatou ʼu fealagia takitokotahi, kae ʼi te ʼaho fuli ʼe feala ke tou tokaga tāfito ki te maʼuhiga ʼaē ʼo te fakahā ʼo te logo lelei ki te hahaʼi.
3 Tou Kumi He ʼu Fealagia Ke Tou Fai Faka Mafola ʼi Te ʼAho Fuli: Ko te vaevae ʼo te logo lelei mo he tahi kehe ʼe ko he meʼa fakatupu fiafia. Moʼo fai ʼo te faʼahi ʼaia ʼi te ʼaho fuli, ʼe tonu ke tou maʼu he ʼu faigamālie moʼo fai faka mafola ʼo mulimuli ki totatou ʼu fealagia. Tokolahi ʼe nātou fiafia he neʼe nātou faka mafola ki te hahaʼi gāue, ki te hahaʼi ʼo te ʼu faleako pea mo ʼonatou ʼu vāhaʼa fale peʼe ko te hahaʼi ʼaē ʼe nātou felāveʼi mo nātou ʼi te ʼaho fuli. ʼO toe feiā aipe mo te ʼu tohi peʼe ko te fakaʼaogaʼi ʼo te telefoni, ʼe ko he ʼu faigamālie ʼaia moʼo fai faka mafola ki te hahaʼi. Ko tatatou fakaʼaogaʼi te ʼu faigamālie fuli ʼaia, ʼo kau ai mo te fai faka mafola ʼi te ʼu ʼapi, pea mo te fai ʼo te ʼu ʼaʼahi, ʼe feala ke iku ki te fiafia lahi ʼaē ko te fai ʼo he ʼu ako Tohi-Tapu. ʼIo, ʼi te ʼaho fuli ʼe feala ke tou kumi he ʼu faigamālie moʼo fai faka mafola.
4 Neʼe kamata lau e te tuagaʼane te kiʼi kaupepa ʼaē Tou Vakaʼi Te Tohi-Tapu ʼi Te ʼAho Fuli lolotoga tona temi mānava ʼi te gāue. Neʼe ina fakaafe tona kaugā gāue ke ina lau te koga tohi ʼo te ʼaho mo ia, pea mole fualoa pea ina kamata te ako Tohi-Tapu mo te fafine ʼaia. ʼI te ʼu ʼaho e nima ʼi te vāhaʼa, neʼe nā fai tanā ako ʼi te vaeluaʼi hola ʼi te ʼaho fuli. Neʼe tokagaʼi e te tahi kaugā gāue te faʼahi ʼaia. Neʼe ko te tēhina neʼe kua vaivai ʼi te faʼahi fakalaumālie. Neʼe lave ki tona loto te gāue mālohi ʼa te tuagaʼane, koia neʼe faka felogoi ai te tēhina ʼaia mo te tagata ʼāfea ke toe kau ki te gāue fai faka mafola. Neʼe toe maʼu te ʼu fua lelei e te tuagaʼane ʼaia, he neʼe ina toe maʼu te tahi ʼu ako e lua, koteʼuhi neʼe ina fakahoko tana fakapapau ʼi te ʼaho fuli.
5 Mokā uga tatou e totatou loto ke tou fakafetaʼi ki te ʼu meʼa lelei fuli ʼaē neʼe fai e Sehova maʼa tatou, ʼe mahino ia ʼe tou fiafia anai pea mo fīmālie, mokā tou fakahoko lelei tatatou fakapapau ʼi te ʼaho fuli. Ohage ko te tagata fai pesalemo, ʼe feala ke tou ʼui fēnei: “ ʼE ʼau fakavikiviki anai kia te koe, Ê Sehova, toku ʼAtua, ʼaki toku loto katoa, pea ʼe ʼau faka kolōlia anai tou huafa ʼo aʼu ki he ʼu temi ʼe mole ʼiloʼi honatou gataʼaga.”—Pes. 86:12.