Ko Te ʼu Meʼa ʼOfa ʼe Lagolago Ki Te Gāue Faka Malamanei ʼa Te Sosiete
Ohage ko tona fakakikite ia Isaia 54:2, 3, ko te tauhi maʼa ʼa Sehova ʼe hoholo atu tona tuputupu ʼi te kele. Ko te meʼa ʼaia ʼe hoko ʼi te ʼu fenua kehekehe ʼo Afelika pea mo te ʼu motu ʼe ōvi mai kiai. Lolotoga te ʼu taʼu e hogofulu ki muʼa atu, neʼe fakagata te tapuʼi ʼo te gāue ʼo ʼuhiga mo te Puleʼaga ʼi te ʼu fenua ohage ko Angola, Cameroun, Guinée équatoriale, Etiopea, Madagascar, Malawi, Mozambique, pea mo Togo. ʼI te ʼu fenua ʼaia pea mo ʼihi age ʼu fenua ʼaē kua lahi ai te tānaki ʼo te gāue ki te taʼukai, ko te kau misionea ʼo Kalaate ʼe lauʼi teau, te kau maʼu pepa ʼo te Ako ki te teuteu faka minisitelio, te famili ʼo te Petele, pea mo ʼihi, kua nātou gāue nei ʼi te gāue ʼaē neʼe hinoʼi nātou kiai.—Mat. 9:37, 38.
ʼE mahino ia ko te tuputupu ʼo te kau atolasio moʼoni ʼa te kautahi ʼa Sehova, ʼe fakamaʼua kiai te laga ʼo te ʼu lauʼi teau Fale foʼou ʼo te Puleʼaga. Tahi ʼaē meʼa neʼe toe ʼaoga foki ke fakatuʼutuʼu te laga ʼo he ʼu Fale Fakatahi pea mo laga he ʼu filiale foʼou peʼe fakalahi. ʼI te falā ʼaē ʼe foaki ki te gāue faka malamanei ʼa te Sosiete, neʼe lahi te falā ʼaē neʼe fakaʼaogaʼi ki te ʼu fakatuʼutuʼu ʼaia ohage ko te gāue ʼo te Puleʼaga, ʼo mole gata pe ʼi Afelika kae neʼe toe feiā pe foki mo te tahi ʼu potu ʼo te malamanei.
Ko te ʼu paki ʼaē ʼe tuʼu ʼi te ʼu pasina e lua ʼo te pepa ʼaenī, ʼe ina fakahā atu kia koutou te ʼu meʼa ʼaē neʼe fia fai e te Sosiete ʼo ʼuhiga mo te gāue ʼi Afelika. Ko te ʼu paki ʼaenī ʼe nātou fakahā atu te ʼu gāue ʼaē kua kamata fai, pea mo te ʼu gāue ʼaē ka ʼamanaki hoko.
Kapau ʼe koutou vakaʼi te tānaki gāue ʼi te Annuaire 1996, ʼe koutou fakatokagaʼi lelei anai te gāue ʼaē ʼe fai ʼi te minisitelio, e te ʼu kaugā fai faka mafola ʼo te ʼu fenua ʼaia ʼi te minisitelio. ʼE lahi te ʼu fenua neʼe lahi ai te tuputupu ʼo te gāue, pea ʼe hā ʼaki ai te kaugamālie ʼo te hahaʼi ʼaē neʼe kau ki te ʼAho Fakamanatu, ʼe toe lahi anai te tuputupu ʼo te gāue ʼi te ʼu fenua ʼaia. Kapau ʼe tou fakakaukauʼi te ʼu fua ʼo te faka mafola ʼo te Puleʼaga ʼi te malamanei katoa, pea mo te fai ʼo ni ʼu tisipulo ʼi te tahi ʼu fenua, pea ʼe tou mahino ai ʼe ko he pilivilesio hatatou lagolago ʼi te faʼahi faka paʼaga ki te tauhi moʼoni.—Luka 16:9; 1 Tim. 6:18.
[Paki ʼo te pasina 3]
Te Fale ʼo te Puleʼaga ʼi KwaZulu-Natal, ʼi te Potu Toga ʼo Afelika, neʼe laga ia ʼaho e 9
[Paki ʼo te pasina 3]
Te Fale ʼo te Puleʼaga ʼi Nigéria, neʼe totogi kovi tona laga
[Paki ʼo te pasina 3]
Te Fale Fakatahi ʼi Mozambique ko tona ʼu hekaʼaga e 1 500, pea ʼe ʼosi anai tona laga ʼi te fakaʼosi ʼo te taʼu 1996
[Paki ʼo te pasina 3]
Te ʼu fale ʼo te filiale ʼo Mozambique, ʼe teuteuʼi ke nofoʼi ʼi te fasiga taʼu fakatōlau 1996
[Paki ʼo te pasina 3]
Te filiale ʼo Sierra Leone, neʼe fakatuʼutuʼu ke fakaʼosi ʼi te fasiga taʼu māfana ʼaenī
[Paki ʼo te pasina 4]
Te Fale Fakatahi ʼe mole hona ʼu kaupā ʼi te Ile Maurice, mo te ʼu fale ʼo te filiale, ʼe fakaʼosi anai ʼi te taʼu 1997
[Paki ʼo te pasina 4]
Te laga ʼo te filiale ʼi Zimbabwe
[Paki ʼo te pasina 4]
Te Fale Fakatahi ʼe mole hona ʼu kaupā pea mo te filiale foʼou ʼe laga ʼi Sénégal
[Paki ʼo te pasina 4]
Te filiale foʼou ʼo Kenia ʼi te kolo tāfito ʼo Nairobi
[Paki ʼo te pasina 4]
Kua vave ʼosi te laga ʼo te filiale ʼo Madagascar
[Paki ʼo te pasina 4]
Te filiale ʼe fakatuʼutuʼu ke laga ʼi Malawi