ʼE Haʼele Ki Muʼa Te Polokalama ʼo Te Laga ʼo Te ʼu Fale ʼo Te Puleʼaga
1 ʼI te taʼu 1983, ʼi te ʼu Fakatahi Faka Tisitilike ko tona kupu tāfito ko “Te Logo Tahi ʼi Te Puleʼaga,” neʼe tala ai ʼe tānaki anai he ʼu meʼa ʼofa makehe moʼo lagolago ki te ʼu laga fale pea mo te toe gaohi ʼo te ʼu Fale ʼo Te Puleʼaga ʼi Amelika pea mo Kanata. Neʼe mole tou ʼiloʼi te ʼu tapuakina ʼaē ka hoko ʼaki te kamata veliveli ʼaia. Neʼe tou kamata mahino lelei ai ki te Pesalemo 92:4, ʼaē ʼe ina ʼui fakalelei ai: “Koteʼuhi neʼe ke fakafiafia ia ʼau, Ê Sehova, ʼuhi ko tau gāue; neʼe ʼau kalaga fakafiafia ʼuhi ko te gāue ʼo tou ʼu nima.”
2 ʼI te temi nei ʼe tou fiafia ʼaupito ʼi te ʼu gāue ʼaē kua fai. Ia ʼaho nei, ʼi te malamanei katoa, ʼe fai te polokalama ʼo te laga fakavilivili ʼo te ʼu Fale ʼo Te Puleʼaga. ʼI he faʼahiga ʼaluʼaga pe, ʼe tou maʼu fuli te pilivilesio ke tou kau ki te gāue ʼaia. ʼE tou kau kiai ʼo tou lagolago ʼaki he ʼu meʼa ʼofa lalahi peʼe veliveli, moʼo tokoni ʼi te faʼahi faka paʼaga ki te laga ʼo te tahi ʼu fale fono ʼi te malamanei katoa. ʼE lahi te ʼu tēhina ʼe nātou tali lelei ke nātou fakaʼaogaʼi tanatou ʼu meʼa gāue, tonatou temi, tonatou ʼu fealagia, pea mo tanatou faiva ke nātou kau ki te ʼu laga fale ʼaia. ʼE fua lelei te fakatuʼutuʼu ʼaia ʼuhi ko te takitaki ʼa Sehova, tana lagolago kiai, pea mo tana ʼu tapuakina lahi ki tatatou gāue ʼi te logo tahi.—Pes. 127:1.
3 ʼE lahi te ʼu filiale neʼe nātou mulimuli ki te fakatuʼutuʼu ʼaē neʼe fai ʼi te kamata maʼa te ʼu kokelekasio ʼi Amelika. ʼE lahi te ʼu fenua, ʼe maʼu ʼi te ʼu Fale ʼo Te Puleʼaga te ʼu kiʼi kesi ʼe lava momono kiai e te kokelekasio tanatou ʼu meʼa ʼofa ki te Falā Ki Te ʼu Fale ʼo Te Puleʼaga. ʼI te tahi ʼu fenua, ko te kiʼi kesi ʼaiʼaga meʼa ʼofa, ʼe momono kiai te ʼu meʼa ʼofa moʼo huʼi te lue ʼo te Fale ʼo Te Puleʼaga, ʼo faka fealagia ai ki te Sosiete ke toe tokoni ʼi te faʼahi faka paʼaga ki te tahi ʼu laga fale. ʼI Amelika, neʼe fakahā ʼi Te Minisitelio ʼo Te Puleʼaga (Fakapilitānia) ʼo Malesio 1997, te fetogi ʼi te polokalama ʼaia. Neʼe ʼui fēnei: “Talu mai te 1983 ʼaē neʼe fakatuʼutuʼu ai Te Falā ʼa Te Sosiete Ki Te ʼu Fale ʼo Te Puleʼaga, neʼe lagolago lahi te ʼu tēhina ki te faʼahi ʼaia, ʼo faka fealagia ai ke fakaʼaogaʼi he falā moʼo laga ʼaki te ʼu Fale ʼo Te Puleʼaga. ʼI Amelika nei, kua ʼosi fakaʼaogaʼi te fakatuʼutuʼu ʼaia ki te ʼu kokelekasio e 2 700 ʼi te fenua ʼaia. ʼE lahi te ʼu kokelekasio ʼe mole feala ke nātou laga he ʼu Fale foʼou ʼo Te Puleʼaga, peʼe fakafoʼou te ʼu fale fono ʼaē ʼe tonu ke toe gaohi. ʼE ʼaoga ʼi te temi nei ke foimo fakaʼaogaʼi he koga ʼo te ʼu meʼa ʼofa ʼaia moʼo foaki he falā ki te ʼu kokelekasio ʼo te ʼu fenua ʼaē ʼe faigataʼaʼia ʼi te faʼahi faka ekonomika. Ko te Sosiete pea mo te ʼu kokelekasio ʼaē ʼe fakaʼaoga kiai te ʼu meʼa ʼofa ʼaia, ʼe nātou fakamālo atu ki takotou lagolago tuʼumaʼu ki te fakatuʼutuʼu ʼaia.”
4 Ko te logo ʼaia, ʼe ko he fakaafe kia tatou ke tou kau ki te polokalama ʼo te laga fakavilivili ʼo te ʼu Fale ʼo Te Puleʼaga. Neʼe toe fakaʼaogaʼi te Falā Ki Te ʼu Fale ʼo Te Puleʼaga, moʼo totogi te ʼu meʼa ʼaē ʼe ʼaoga ki totatou ʼu tēhina ʼi te tahi ʼu fenua, pea mo hoko atu te foaki ʼa he falā ki te laga ʼo he Fale ʼo Te Puleʼaga ʼi te ʼu fenua ʼaia. Ki muli age, neʼe tā te alatike ʼi Te Minisitelio ʼo Sepetepeli 1997 ʼe ʼui fēnei ai: “ ʼE ʼaoga ʼaupito ke laga he ʼu Fale ʼo Te Puleʼaga ʼi te malamanei katoa. Lolotoga te taʼu gāue ʼaenī kua ʼosi, neʼe fakatuʼu te ʼu kokelekasio foʼou e 3 288. ʼE lahi te ʼu kokelekasio neʼe fakatuʼu ʼi Afelika, ʼi Asia, ʼi Amelika ʼo te Lotomalie pea mo te Potu Saute, pea mo te Eulopa ʼo te Potu Esite.”
5 Koteā tona ʼu fua talu mai te temi ʼaia? Neʼe ʼui fēnei e te Annuaire 2001: “ ʼAki te fakatuʼutuʼu ʼaia, ʼi te ʼu fenua e 30, neʼe fakaʼosi te laga ʼo te ʼu Fale ʼo Te Puleʼaga e 453, pea ʼe kei lolotoga laga te ʼu fale e 727. Neʼe faka maʼuhigaʼi te laga fale māhani ʼo te ʼu Fale ʼo Te Puleʼaga, ke fakaʼaogaʼi te ʼu meʼa gāue pea mo te ʼu faʼahiga fai ʼo te ʼu fenua ʼaia. ʼI Kenia, ʼe fakaʼaogaʼi te ʼu maka ʼo te ʼu keliʼaga maka; ʼi Togo ʼe fakaʼaogaʼi te piliki; ʼi Cameroun ʼe fakaʼaogaʼi te ʼu piliki pea ʼe ʼai faka fetefete te fakamomole ʼo te ʼu kaupā. ʼAki te faʼahiga fai ʼaia, ʼe maʼu vave ai e te ʼu tēhina ʼo te ʼu fenua ʼaia, te ʼu fealagia moʼo fakahoko ʼi tonatou fenua, he ʼu gāue maʼuhiga ʼi te polokalama ʼaia.”
6 ʼE tou ʼiloʼi ʼe tapuakina e Sehova te fakatuʼutuʼu ʼaia, mokā tou sio ki te foʼi fenua lahi ko Afelika. Ka koutou sio ki te ʼu paki ʼo te laga ʼa ʼihi Fale ʼo Te Puleʼaga, pea ʼe koutou mahino ai anai ʼe malave mālohi te ʼu laga fale ʼaia ki te gāue ʼa te kau Fakamoʼoni ʼa Sehova! ʼE moʼoni te faʼahi ʼaia ʼi te ʼu ʼaluʼaga kehekehe e tolu—te logo tahi fakatautehina ʼi te malamanei katoa, tona ʼu fua lelei ki te hahaʼi ʼo te fenua ʼaia, pea mo te tuputupu ʼa te kaugamālie ʼaē ʼe ʼōmai ki te ʼu fono. Ko te pepa ʼaenī ʼe ina fakahāhā lelei mai te ʼu Fale ʼo Te Puleʼaga ʼaē neʼe laga ʼi Afelika, kae ʼe tā anai te tahi ʼu pepa ʼo Te Minisitelio ʼo Te Puleʼaga, ʼe talanoa ai ki te haʼele ki muʼa ʼo te polokalama laga fale ʼi te ʼu tahi ʼu potu fenua ʼo te malamanei.
[Paki ʼo te pasina 3]
Bimbo, Bangui
[Paki ʼo te pasina 3]
République Centrafricaine
[Paki ʼo te pasina 3]
Begoua, Bangui
[Paki ʼo te pasina 4]
Ukonga, Tanzanie
[Paki ʼo te pasina 4]
Accra, Ghana
[Paki ʼo te pasina 4]
Salala, Liberia
[Paki ʼo te pasina 4]
Allada, Bénin—Te Fale ʼāfea ʼo Te Puleʼaga
[Paki ʼo te pasina 4]
Allada, Bénin—Te Fale foʼou ʼo Te Puleʼaga
[Paki ʼo te pasina 4]
Karoi, Zimbabwe
[Paki ʼo te pasina 5]
Kpémé, Togo
[Paki ʼo te pasina 5]
Sokodé, Togo
[Paki ʼo te pasina 5]
Fidjrosse, Bénin
[Paki ʼo te pasina 6]
Lyenga, Zambie—Te Fale ʼāfea ʼo Te Puleʼaga
[Paki ʼo te pasina 6]
Lyenga, Zambie—Te Fale foʼou ʼo Te Puleʼaga
[Paki ʼo te pasina 6]
Kinshasa, Congo
[Paki ʼo te pasina 6]
Musambira, Rwanda