Ko He ʼu Tokoni ʼo ʼUhiga Mo Te ʼAho Fakamanatu

Ko te ʼAho Fakamanatu ʼe tō ʼi te ʼAhotapu, ʼaho 23 ʼo Malesio. ʼE tonu anai ke tokakaga te ʼu tagata ʼāfea ki te ʼu meʼa ʼaē ka hoa mai:

◼ ʼI te teuteu ʼo te fono, koutou tokakaga ke ʼaua naʼa feʼāveʼaki te pane pea mo te vino ka mole heʼeki tō te laʼā.

◼ ʼE tonu ke fakahā ki te hahaʼi fuli, ʼo kau kiai mo te tēhina ʼaē ka ina fai te akonaki, te hola totonu pea mo te potu totonu ʼaē ka fai ai te toʼotoʼoga ʼaia.

◼ ʼE tonu ke maʼu pea mo teuteuʼi te faʼahiga pane mo te faʼahiga vino ʼaē ʼe ʼalutahi mo te toʼotoʼoga ʼaia.​—Vakaʼi Te Tule Leʼo Fakafalani, ʼo te ʼaho 15 ʼo Fepualio 1985, ʼi te pasina 19.

◼ ʼE tonu ke ʼaumai pea mo teuteuʼi fakatomuʼa ʼi te Fale fono he laupapa, he kie fola laupapa ʼe maʼa, he ʼu pa pea mo he ʼu ipu. Ko te ʼu meʼa ʼaia ʼe tonu ke tau mo te ʼAho Fakamanatu.

◼ ʼE tonu ke fakamaʼa te Fale ʼo te Puleʼaga peʼe ko te potu ʼaē neʼe fakatuʼutuʼu ke fai ai te fono.

◼ ʼE tonu ke vakaʼi pe ko ai te ʼu tēhina ʼaē ka kau ki te gāue fakatalitali pea mo te ʼu tēhina ʼaē ka nātou feʼāveʼaki te pane mo te vino, pea mo fakamahino fakatomuʼa kia nātou te gāue ʼaē ka nātou fai.

◼ ʼE tonu anai ke fai he ʼu fakatuʼutuʼu moʼo ʼave ʼo te pane pea mo te vino ki te ʼu Kilisitiano fakanofo ʼaē ʼe mahahaki peʼe mole feala anai tanatou ʼōmai ʼi te ʼaho ʼaia.

◼ Kapau ʼe lahi te ʼu kokelekasio ʼaē ka nātou fakaʼaogaʼi te Fale ʼo te Puleʼaga ʼi te ʼaho ʼaia, pea ʼe tonu anai ke felogoi te ʼu kokelekasio ke mole fakapupu te hahaʼi ʼi te ʼu muʼa matapā pea mo te ala ʼaē ʼe hū mai ki te Fale Fono ʼi te taulaga motokā, te ala ʼaē ʼe taki ki te Fale Fono mo te ʼu kau ala ʼi tuʼa pea mo te taulaga motokā.