Te Tali Ki ʼAkotou ʼu Fehuʼi

◼ Kapau ʼe fakaʼui ki te kokelekasio ke kau ki te fakatuʼutuʼu ʼo he ʼavaifo, ʼe feala ke lagaʼi ai te ʼu fehuʼi ʼaenī:

Ko ai ʼaē ʼe tonu ke ina fai te akonaki ʼo te ʼavaifo? Ko te tonu ʼaia ʼe fai e te famili ʼo ia ʼaē kua mate. ʼE feala ke nātou fili he tēhina ʼe ina tuku he faʼifaʼitaki lelei. Kapau ʼe kole ki te kolesi ʼo te kau tagata ʼāfea he tēhina ke ina fai te akonaki, ʼi te agamāhani ʼe nātou fili anai he tagata ʼāfea ke ina fai te akonaki ʼo fakatafito ki te plan ʼa te Sosiete. Logope la ʼe mole tou fakavikiviki fakavale anai ia ia ʼaē kua mate, kae ʼe feala ke tou talanoa ki tona ʼu kalitate.

ʼE feala koa ke fakaʼaogaʼi te Fale ʼo te Puleʼaga? ʼE feala ke fakaʼaogaʼi mo kapau ʼe fakagafua e te kolesi ʼo te kau tagata ʼāfea, pea mo kapau ʼe mole tō tahi anai mo te ʼu ʼaho ʼaē ʼe fakaʼaogaʼi ai ki te ʼu fono. ʼE feala ke fakaʼaogaʼi te Fale ʼo te Puleʼaga mo kapau ko ia ʼaē kua mate neʼe ʼiloʼi ʼe ko he tahi neʼe ina fai te ʼu meʼa ʼaē ʼe lelei, pea neʼe ko he tahi neʼe kau ki te kokelekasio peʼe ko he tamasiʼi ʼa he tahi ʼi te kokelekasio. Kapau ko ia ʼaia kua mate ʼe ʼiloʼi e te hahaʼi neʼe ina fai he aga ʼe mole lelei, peʼe ko he tahi ʼu meʼa neʼe ina fai ʼo feala ai ke laukoviʼi te kokelekasio, ʼe feala ke fakatuʼutuʼu e te kau tagata ʼāfea ke mole nātou fakagafua te fakaʼaogaʼi ʼo te Fale ʼo te Puleʼaga.​—Vakaʼi te tohi Organisés pour bien remplir notre ministère, ʼi te pasina 62.

ʼI te agamāhani, ʼe mole fakaʼaogaʼi te ʼu Fale ʼo te Puleʼaga moʼo fai ʼo te ʼu ʼavaifo ʼo te hahaʼi ʼaē ʼe mole ʼi te moʼoni. Gata pe mokā ko te famili ʼo ia kua mate ʼe gāue mālohi ʼi te kokelekasio pea kua nātou papitema, pea mo ʼiloʼi ia ia ʼaē kua mate e te ʼu kaugā fai faka mafola ʼi te kokelekasio, ʼe ko he tahi neʼe ina tali leleiʼi te moʼoni pea mo lelei tana aga ʼi te kolo, pea ʼe mole fai anai ʼi te ʼavaifo ʼaia, te ʼu faʼahiga fai ʼavaifo ʼaē ʼe fai e te mālama.

Kapau ʼe fakagafua ke fakaʼaogaʼi te Fale ʼo te Puleʼaga, ʼe vakaʼi anai e te ʼu tagata ʼāfea peʼe ko he agaʼi fenua te ʼaumai ʼo te puha mate ki te akonaki ʼaē ʼe fai ʼo ʼuhiga mo te ʼavaifo. Kapau koia ʼaia, pea ʼe feala ke nātou fakagafua ke ʼaumai te puha mate ki te Fale ʼo te Puleʼaga.

E feafeaʼi mo kapau ʼe ko he ʼavaifo ʼo he tahi ʼo te mālama? Kapau ko ia ʼaē kua mate neʼe ʼiloʼi ʼe ko he tahi neʼe ina fai te meʼa ʼaē ʼe lelei ʼi te kolo, pea ʼe feala ke fai e he tēhina he akonaki fakaloto fīmālie ʼi te fale mate peʼe ʼi te tānuma. ʼE fakafisi anai te kokelekasio ki he ʼavaifo ʼo he tahi neʼe ʼiloʼi e ko he tahi ʼe māmio kovi, ʼe mole fakaʼapaʼapa ki te lao peʼe ko tona faʼahiga maʼuli neʼe fakafeagai ki te ʼu lekula ʼa te Tohi-Tapu. ʼE mahino ia ko he tēhina ʼe mole kau anai mo he tagata takitaki lotu ʼo fai he akonaki, peʼe ko te fai ʼo te ʼavaifo ʼi te ʼēkelesia ʼo Papiloni Lahi.

E feafeaʼi mo kapau ko ia ʼaē kua mate neʼe kua fakamavae ʼi te kokelekasio? ʼI te agamāhani ʼe mole kau anai kiai te kokelekasio, pea ʼe mole fakaʼaogaʼi anai te Fale ʼo te Puleʼaga ki te faʼahi ʼaia. Kapau ko ia ʼaē kua mate, neʼe ina fakahā ʼe loto fakahemala moʼoni pea mo fakahā ʼe toe fia hū mai ki te kokelekasio, ko te leʼo ʼo loto ʼo he tēhina ʼe ina faka fealagia anai kia ia ke ina fai he akonaki ʼi te fale mate peʼe ʼi te tānuma, ʼo foaki ai he fakamoʼoni ki te ʼu hahaʼi ʼaē ʼe mole ʼi te moʼoni, pea mo fakaloto fīmālieʼi tona ʼu kāiga. Kae, ʼi muʼa ʼo tana fai te faʼahi ʼaia, ʼe lelei anai ke faka felogoi te tēhina mo te kolesi ʼo te kau tagata ʼāfea, pea ke mulimuli ki te ʼu tokoni ʼaē ka nātou fai ki ai. ʼI te ʼu ʼaluʼaga ʼaē ʼe mole fakapotopoto anai ki te tēhina ʼaia hana kau kiai, ʼe lagi lelei anai ki he tēhina ʼe famili mo ia ʼaē kua mate ke ina fai he akonaki moʼo fakaloto fīmālieʼi ʼo te ʼu kāiga ʼo ia ʼaē kua mate. Ko ʼihi tokoni ʼe feala ke koutou maʼu ʼi Te Tule Leʼo ʼo te ʼaho 15 ʼo ʼOketopeli 1990, pasina 30 ki te 31; Te Tule Leʼo ʼo te ʼaho 15 ʼo Tesepeli 1981, pasina 29 ki te 30; mo te ʼaho 15 ʼo Sūnio 1980, pasina 5 ki te 7; mo te ʼaho 1 ʼo Sepetepeli 1978, pasina 5 ki te 8; mo Te Tule Leʼo ʼo te ʼaho 1 ʼo Sepetepeli 1977, pasina 539 ki te 540, mo te ʼaho 1 ʼo Sanualio 1971, pasina 31 ki te 32; pea mo te Réveillez-vous! ʼo te ʼaho 8 ʼo Sepetepeli 1990, pasina 22 ki te 23 pea mo te ʼaho 22 ʼo Sūlio 1977, pasina 12 ki te 15.