“ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?”
1 Ko he logo matalelei, mo mātala, pea mo fakalave loto ʼe faka mafola anai ʼi te kele katoa ʼi te ʼu lea e 169. Koteā koa ia te logo ʼaia? Pea ʼe fakahā feafeaʼi anai te logo ʼaia?
2 Ko te logo ʼo ʼuhiga mo te ʼofa ki te kāiga. ʼE tou maʼu ʼi Te ʼu Logo ʼo Te Puleʼaga N° 35, ko tona kupu tāfito “ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?” Ko Te ʼu Logo ʼo Te Puleʼaga ʼe ina sivi fakanounou te ʼaluʼaga ʼo te ʼu meʼa ʼo te malamanei, ʼo fakahā ai ʼe mole kei maʼu e te hahaʼi ia te ʼofa, ʼaē ʼe tupu ai te mamahi ʼulu pea mo te lotomamahi ʼa te hahaʼi. ʼE ina fakamahino te tupuʼaga ʼo te momoko ʼo te ʼofa ki te kāiga ʼi totatou temi, pea koteā tona faka ʼuhiga ki te temi ka haʼu.
3 Tahi ʼaē meʼa, ko Te ʼu Logo ʼo Te Puleʼaga N° 35 ʼe ina fakahā mai ʼe maʼu te ʼofa moʼoni ki te kāiga ʼi te lauʼi miliona hahaʼi ʼi te malamanei ia ʼaho nei. ʼE ina fakahā lelei ia nātou ʼaē ʼe kau ki te fakamaʼuli ʼo te Lotu Faka Kilisitiano ʼo te temi muʼa—ko te tauhi ʼi te ʼuluaki sēkulō, ʼaē neʼe fakaʼiloga ʼaki te ʼofa ki te kāiga ohage ko tona akoʼi mai e Sesu.—Luka 10:25-37.
4 Ko Te ʼu Logo ʼo Te Puleʼaga N° 35 ʼe fakaʼosi ʼaki tana fakamahino peʼe feafeaʼi anai te maʼuliʼi e te hahaʼi ʼi te malamanei te ʼofa ki te kāiga, ʼi tanatou mulimuli ki te takitaki ʼo te Puleʼaga ʼo te ʼAtua ʼaē ʼe puleʼi e Kilisito. ʼE fakaloto mālohiʼi ia nātou ʼaē ʼe nātou lau te logo ʼaia ke nātou maʼu te kaupepa Koteā ʼAē ʼe Fakamaʼua Mai e Te ʼAtua Kia Tatou? pea ke nātou akoʼi peʼe feafeaʼi hanatou kau ki te fakatuʼutuʼu ʼofa ʼaia ka hoko ʼi te malamanei katoa, ʼaē ʼe talanoa kiai te Folafola ʼa te ʼAtua.
5 Ko Ai Koa ʼAē Ka Ina Fakahā Anai Te Logo ʼAia? Ko te kau Fakamoʼoni ʼa Sehova ʼi te malamanei ʼe nātou fakahā anai te logo ʼofa ʼaia ki tonatou kāiga mo te ʼu hahaʼi ʼe nātou feʼiloʼiʼaki, ki tonatou vāhaʼa fale, pea mo tonatou ʼu kaumeʼa lolotoga te ʼu māhina ko ʼOketopeli pea mo Novepeli. Ko nātou fuli kua nātou faiva ʼi te faʼahi ʼaia ʼe fakaloto mālohiʼi nātou ke nātou tufa Te ʼu Logo ʼo Te Puleʼaga N° 35.
6 Ko te fakatuʼutuʼu tāfito ʼo te faʼahi ʼaia ʼe ko te uga ʼo te fia logo ʼa te hahaʼi ke fai hanatou ako faka Tohi-Tapu ʼi te kaupepa Fakamaʼua peʼe ko te tohi Te ʼAtamai Mālama. Tahi ʼaē meʼa, ko he faiga fakamalotoloto ʼa te ʼu kaugana fuli ʼa Sehova ʼe tupu ai anai he fagonogono lahi ʼo ʼuhiga mo te ʼAtua ʼofa, ko Sehova, pea mo tona ʼAlo, ko Sesu Kilisito.