ʼE Tokoni Te Kau Pionie Ki ʼIhi
1 Neʼe ʼui fēnei e Sesu: “ ʼIo ko te taʼukai ʼe lahi, kaʼe tokosiʼi te kau gāue. Koia ke koutou kole ki te Pule ʼo te taʼukai ke ina fekauʼi mai he kau gāue ki tana taʼukai.” Mai tona ʼaluʼaga ʼaē neʼe tokosiʼi te kau gāue ʼi te ʼuluaki sēkulō kae lahi tanatou telituale, neʼe feala ke fakatotonu e Sesu ke nātou ʼolo takitokotahi ʼo fakahā te logo lelei ki te ʼu hahaʼi ʼe tokolahi. Kae neʼe ina “fekauʼi taki toko lua nātou.” (Luka 10:1, 2) He koʼe neʼe nātou gāue taki toko lua?
2 Neʼe foʼofoʼou te ʼu tisipulo ʼaia pea neʼe mole heʼeki nātou māhani ʼi te gāue. ʼI tanatou gāue taki toko lua, neʼe feala ke lahi te ʼu meʼa ʼe nātou ako ai pea mo nātou fefakaloto mālohi ʼaki. Ohage ko tona ʼui e Salomone, “ ʼe lelei age he toko lua ʼi he tokotahi.” (Tnk. 4:9, 10) Māʼiape la ʼi te ʼosi folahi ʼo te laumālie maʼoniʼoni ʼi te Penikosite ʼo te taʼu 33 ʼo totatou temi, ko Paulo, mo Palenapasi, pea mo ʼihi ʼatu neʼe nātou kaugā fai faka mafola mo tonatou ʼu tēhina. (Gāue 15:35) ʼE mahino ia neʼe ko he pilivilesio lahi ki te hahaʼi ke akoʼi nātou e te ʼu tagata ʼaia ʼaē kua māhani ʼi te gāue!
3 Ko He Polokalama Ako ʼe Lelei: Ohage ko te kokelekasio ʼo te ʼuluaki sēkulō, ko te kokelekasio Kilisitiano ʼo totatou temi ʼe ko he kautahi ʼe fai faka mafola, pea mo ina akoʼi tatou. ʼE tonu ke tou holi e tatou takitokotahi ke ʼi ai he ʼu fua ʼo tatatou fakahā te logo lelei. Ke feala ki te ʼu kaugā fai faka mafola ke nātou hikihiki tanatou gāue, ʼe ʼaoga ke ʼi ai he tokoni ʼe fai kia nātou.
4 Mole heʼeki faʼa fualoa, ʼi te Ako ʼo te Minisitelio ʼo te Puleʼaga, neʼe fakahā e te Sosiete, ʼe fai anai he polokalama ke tokoni te ʼu pionie ki ʼihi ʼi te gāue fai faka mafola. ʼE ʼaoga koa te faʼahi ʼaia? Ei. Ko te ʼu kaugā fai faka mafola e toko miliona tupu neʼe nātou papitema ʼi te ʼu taʼu e tolu ʼaenī kua hili, pea ʼe ʼaoga ki te tokolahi ke akoʼi nātou ke ʼi ai he fua ʼo tanatou gāue fai faka mafola. Ko ai ʼaē ʼe feala ke ina foaki te tokoni ʼaia?
5 ʼE feala ke fakaʼaogaʼi te kau pionie katoa ki te faʼahi ʼaia. ʼE lahi te ʼu tokoni pea mo te ʼu meʼa ʼaē ʼe akoʼi age e te kautahi ʼa Sehova kia nātou ʼaia. Lolotoga vāhaʼa e lua, ʼi te Ako ki te kau Pionie, ʼe foaki ai kia nātou he ako ʼe ʼalutahi mo te ʼu meʼa ʼaē ʼe ʼaoga kia nātou. Tahi ʼaē meʼa, ʼe nātou kau ki te ʼu fono ʼaē ʼe fai e te ʼu tagata taupau faka silikosikilipisio pea mo taupau faka tisitilike, pea mo toe takitaki pe foki e te kau tagata ʼāfea. Logope la ʼe mole faiva fuli te kau pionie ohage ko Paulo pea mo Palenapasi, kae ʼe akoʼi fakalelei nātou, pea ʼe nātou fiafia ʼi te vaevae ki ʼihi te ʼu meʼa ʼaē ʼe nātou ako.
6 ʼE ʼAoga Anai Kia Ai? ʼE faka tuʼakoi pe koa te polokalama ʼaia ki te ʼu kaugā fai faka mafola foʼou peʼe kia nātou ʼaē neʼe hoki papitema? Kailoa! ʼE ʼi ai te kau tūpulaga pea mo te kau matutuʼa kua nātou ʼiloʼi te moʼoni talu mai fualoa, kae ʼe nātou leleiʼia anai ke tokoni age he tahi kia nātou ʼi te tahi ʼu faʼahi ʼo te minisitelio. Ko ʼihi ʼe lelei ʼaupito tanatou tufa te ʼu tohi, kae faigataʼa tanatou fai te ʼu ʼaʼahi peʼe ko te kamata ʼo he ʼu ako Tohi-Tapu. ʼE lagi faigafua ki ʼihi hanatou kamata he ʼu ako Tohi-Tapu, kae nātou fakatokagaʼi ʼe mole tuputupu te kau ako Tohi-Tapu. Koteā ʼaē ʼe ina tāʼofi tanatou tuputupu? ʼE lagi kole anai ki he ʼu pionie kua māhani ʼi te gāue ke nātou tokoni kia nātou ʼo ʼuhiga mo te ʼu faʼahi ʼaia. Ko ʼihi pionie ʼe lagi popoto ʼi te uga ʼa te hahaʼi ke nātou fia logo, mo kamata he ʼu ako Tohi-Tapu, pea mo ʼaumai te kau ako foʼou ʼaia ki te kautahi ʼa Sehova. ʼE ʼaoga ʼaupito tanatou faiva ki te polokalama foʼou ʼaia.
7 ʼE faigataʼa koa hakotou kau ki te ʼu fono fai faka mafola ʼo te kokelekasio? ʼE feala ʼi ʼihi temi ke gāue he pionie mo koutou, mo kapau ʼe mole feala ki ʼihi kaugā fagona ke nātou fai te faʼahi ʼaia.
8 ʼE ʼAoga Ke Tou Gāue Tahi: Tuʼa lua ʼi te taʼu, ʼe fai anai e te kau tagata ʼāfea he ʼu fakatuʼutuʼu maʼa te ʼu kaugā fagona ʼaē ʼe nātou loto ke tokoni age he tahi kia nātou, ke nātou kau ki te polokalama ʼE Tokoni Te Kau Pionie Ki ʼIhi. Kapau ʼe koutou loto ki te tokoni ʼaia, pea koutou gāue fakatahi mo te pionie ʼaē neʼe hinoʼi atu, mo koutou fakatuʼutuʼu hakotou polokalama gāue, pea mo koutou mulimuli kiai. ʼAua naʼa koutou tōtō ʼi te ʼu ʼaho ʼaē neʼe koutou fakatuʼutuʼu ai ke koutou gāue ai. ʼI takolua gāue fakatahi, koutou sivi tana faʼahiga fakahā lelei te logo lelei. Koutou vakavakaʼi pe koteā te ʼu palalau ʼaē ʼe lelei age ke koutou fai. Koutou fakatokagaʼi lelei te ʼu tokoni ʼaē ʼe fai atu e te pionie moʼo hikihiki takotou ʼu faʼahiga palalau. Kapau ʼe koutou fakaʼaogaʼi te ʼu meʼa ʼaē ʼe koutou ako, pea ʼe koutou tokagaʼi anai ʼe koutou tuputupu ʼi te fai faka mafola, pea ʼe toe feiā anai mo ʼihi. (Vakaʼi ia 1 Timoteo 4:15.) Koulua fakatuʼutuʼu ke lahi te temi ʼaē ʼe koulua gāue fakatahi ai, ʼo koulua kau ki te ʼu faʼahi kehekehe ʼo te minisitelio, ʼo kau kiai mo te fagonogono faigamālie, kae ʼe tonu ke koutou gāueʼi tāfito te ʼu faʼahi ʼaē ʼe koutou vaivai ai.
9 ʼE fia ʼiloʼi anai e te tagata taupau ʼo te gāue peʼe koutou tuputupu ʼi te gāue. ʼE tautau palalau anai mo te tēhina ʼaē ʼe ina taki te Ako Tohi ʼo Te Kokelekasio, moʼo vakaʼi peʼe ʼi ai he fua ʼo te polokalama ʼaia kia koutou. ʼE toe tokoni atu anai te tagata taupau faka silikosikilipisio kia koutou ʼi tana ʼaʼahi te kokelekasio.
10 ʼE loto e Sehova ke akoʼi tana hahaʼi pea ke nātou “katoa ia meʼa fuli ki te ʼu gāue lelei fuli pe.” (2 Tim. 3:17) Koutou faka ʼuhiga te fakatuʼutuʼu ʼE Tokoni Te Kau Pionie Ki ʼIhi, ko he tokoni lelei ʼaia kia nātou ʼaē ʼe loto ke hikihiki tanatou poto ʼi te faka mafola ʼo te folafola. Kapau ʼe koutou maʼu te pilivilesio ʼaē ke koutou kau ki te polokalama ʼaia, pea ʼe tonu ke koutou fai ʼaki he loto fakafetaʼi, mo he agavaivai, pea mo he loto fiafia.