Ko Te Fakamanatu ʼo Te Mate ʼo Kilisito ʼi Te Malamanei Katoa
1 Kua lahi ʼaupito te ʼu meʼa ʼofa neʼe fai mai e Sehova kia tatou. ʼE ʼui e te Tohi-Tapu ʼo ʼuhiga mo tana agaʼofa pea mo tona lotoʼofa, ʼe ko “tona meaofa e mole hona fakafuafua.” Ei, ʼe mole feala hatatou fakamatala te “kalasia fakaofolele” ʼa te ʼAtua.—2 Ko. 9:14, 15.
2 Ko Tana Meʼa ʼOfa ʼAē ʼe Lahi Tāfito: Ko Sesu Kilisito, ʼaē neʼe ina toe totogi te malamanei, ʼe ko te meʼa ʼofa lahi tāfito ʼaia neʼe fai mai kia tatou. ʼI tana ʼofa lahi ʼaē ki te malamanei, neʼe foaki mai e Sehova tona ʼAlo ʼofaina pea mo ʼulu tokotahi. (Soane 3:16) Ko te taʼi tapuakina ʼofa ʼaia mai te ʼAtua ʼe tau mo feʼauga ke fakamanatuʼi ʼi te malamanei katoa. Ko te ʼaho fea pea mo te potu fea ʼaē ka fai ai te faʼahi ʼaia? ʼI te Felianima afiafi, ʼaho 1 ʼo ʼApelili 1999, ko te kau Kilisitiano ʼi te malamanei katoa ʼe nātou fakamanatuʼi anai te Taumafa ʼo te ʼAliki, ʼo nātou fai he Fakamanatu ʼo te sakilifisio ʼaē neʼe lahi tokotahi.—1 Ko. 11:20, 23-26.
3 Neʼe mate ia Kilisito maʼa tatou “i te temi nee kei tou agahala ai,” pea ʼe feala ke tou fakahā he loto fakafetaʼi ki te faʼahi ʼaia ʼo tou kau ʼi te Fakamanatu ʼo tona mate pea mo tou fakaafe niʼihi ke nātou kau mo nātou ʼi te fono maʼuhiga ʼaupito ʼaia.—Loma 5:8.
4 ʼE Ko Te ʼAho Maʼuhiga Tāfito ʼo Te Taʼu: ʼUluaki, ko te fakamanatu ʼo te mate ʼo Kilisito ʼe ina fakahā mai kia tatou, neʼe makehe tana lagolago ki te ʼuhiga pule ʼa te ʼAtua. ʼE ina toe fakamanatuʼi mai kia tatou, ʼe feala ke leleiʼia tatou e Sehova mo kapau ʼe tou tui ki te sakilifisio ʼa Sesu, pea ʼe feala ai ke hāofaki tatou. (Gāue 4:12) ʼE moʼoni, ʼe ko te ʼaho maʼuhiga tāfito ʼo te taʼu!
5 ʼE tou fakahā anai te ʼofa ki te kāiga mo kapau ʼe tou fakaafe nātou ke nātou kau mo tatou ki te Taumafa ʼo te ʼAliki. ʼE kei feala ki te toko lauʼi miliona hahaʼi ke nātou maʼu te ʼu fua lelei ʼo te sakilifisio ʼaia. (Filp. 3:8) Ko nātou ʼaē ʼe tui ki te sakilifisio ʼa Sesu, ʼe feala hanatou ʼamanaki papau ki te maʼuli heʼegata.—Soane 17:3.
6 ʼI te māhina ʼaē ʼe fai ai te Fakamanatu, ʼe lahi te ʼu faigamālie ʼe tou maʼu ke tou fakahā ai tatatou loto fakafetaʼi ki te ʼofa makehe ʼa te ʼAtua kia tatou. ʼE ko he temi faigamālie ʼaia ke tou kau fakamalotoloto ki te fai faka mafola ʼo te logo lelei ʼo te Puleʼaga ʼo te ʼAtua. ʼE lahi te ʼu tapuakina ʼaē ka maʼu anai e nātou fuli ʼaē ka nātou fakakaukauʼi ʼi te faikole te maʼuhiga ʼo te meʼa ʼofa ʼaia ʼaē neʼe fai mai e Sehova kia tatou, pea mo nātou fakatuʼutuʼu ke nātou kau ʼi te Taumafa ʼo te ʼAliki ʼi te taʼu ʼaenī!