Ko Te Kau Faifekau Faka Minisitelio ʼe Nātou Fakahoko He Gāue Maʼuhiga
1 “Neʼe nātou fakahā tanatou tui ʼo nātou kau fakamalotoloto ki te gāue ʼo ʼuhiga mo te Puleʼaga, pea mo nātou tokoni ki ʼihi moʼo fakamālohiʼi tanatou tui.” Ko te ʼu palalau ʼaia ʼe fai ʼo ʼuhiga mo te kau faifekau faka minisitelio ʼi te tohi Organisés pour bien remplir notre ministère, ʼi te pasina 56. ʼE mahino ia, ʼe lelei ke tou mulimuli ki te faʼifaʼitaki ʼaē ʼe tuku mai e te kau faifekau faka minisitelio. Kapau ʼe tou lagolago kia nātou pea mo te kau tagata ʼāfea, pea ʼe tou “gaue ki tona tuputupu [ʼo te sino] mo tana lagai ake iaʼia i te ofa.”—Ef. 4:16.
2 ʼE maʼuhiga ʼaupito te gāue ʼa te kau faifekau faka minisitelio ʼi te kokelekasio. Koutou fakakaukauʼi age muʼa tanatou ʼu gāue kehekehe! ʼE nātou taupau ki te falā, mo te ʼu tohi, mo te ʼu nusipepa, mo te ʼu apone, pea mo te ʼu telituale; ʼe nātou gāue ki te tali kāiga, mo te fakatagi; pea mo te taupau lelei ʼo te Fale ʼo te Puleʼaga. ʼE nātou kau ki te Ako Faka Minisitelio Faka Teokalatike pea mo te Fono Gāue. Ko ʼihi ia nātou, ʼe nātou fai te ʼu akonaki ki te kaugamālie pea mo nātou takitaki ʼihi fono ʼo te kokelekasio. Ohage ko te ʼu koga ʼo totatou sino, ʼe fakahoko e te kau faifekau faka minisitelio he ʼu gāue ʼe ʼaoga kia tatou.—1 Ko. 12:12-26.
3 Ka sio te ʼu tēhina mo tuagaʼane ki te kau faifekau faka minisitelio ʼe nātou gāue fakatahi mo te kau tagata ʼāfea ʼo nātou fefakaʼapaʼapaʼaki, pea ʼe nātou fia fai mo nātou te faʼahi ʼaia. (Kol. 2:19) ʼI tanatou fakahoko tuʼumaʼu tanatou gāue pea mo tanatou tokaga ki ʼihi, ʼe nātou tokoni ke tuputupu te kokelekasio ʼi te faʼahi fakalaumālie.
4 Koteā ʼaē ʼe feala ke tou fai ke tou fakahā ai he loto fakafetaʼi ki te kau faifekau faka minisitelio ʼaē ʼe gāue kinakina? ʼE ʼaoga ke tou ʼiloʼi lelei tanatou gāue pea mo tou tokoni kia nātou mokā nātou kole mai te faʼahi ʼaia. ʼAki tatatou ʼu palalau peʼe ʼaki tatatou ʼu aga, ʼe feala ke tou fakahā age kia nātou, ʼe tou leleiʼia tanatou gāue. (Taag. 15:23) ʼE tonu ke tou loto fakafetaʼi kia nātou ʼaē ʼe gāue kinakina maʼa tatou.—1 Tes. 5:12, 13.
5 ʼE fakahā mai e te Tohi-Tapu te gāue pea mo te ʼu maʼua ʼa te kau faifekau faka minisitelio. (1 Tim. 3:8-10, 12, 13) Ko tanatou gāue maʼuhiga ʼe ʼaoga ʼaupito ki te fakaʼaluʼalu lelei ʼo te kokelekasio. ʼE tāu mo te ʼu tagata ʼaia ke tou fakaloto mālohiʼi nātou, heʼe “lahi tuʼumaʼu [tanatou] ʼu gāue ʼi te ʼAliki.”—1 Ko. 15:58, NW.