ʼE Akoʼi Tatou e Sehova
1 ʼAki te takitaki ʼa te ʼAtua, ʼe fai ia ʼaho nei te polokalama ako ʼi te ʼu fenua e 233. ʼE mole he meʼa ʼi te mālama ʼaenī ʼe feala ke fakatatau mo te polokalama ako ʼaia. Ko tatatou Tagata Faiako Lahi ko Sehova, ʼe ina akoʼi tatou ke fua lelei kia tatou ʼi te temi nei, pea ʼe ina toe akoʼi foki tatou ke feala hatatou maʼu te maʼuli heʼegata.—Isa. 30:20; 48:17.
2 Te ʼu Faleako ʼo Te Ako Fakaʼatua: ʼE ʼi ai te ʼu ako ʼe fai ʼi te temi nei ke fua lelei ki te hahaʼi ʼa Sehova. Ko te Ako ʼo Te Minisitelio Faka Teokalatike, ʼaē ʼe fai ʼi te vāhaʼa fuli ʼi te ʼu kokelekasio e 87 000, ʼe ina akoʼi te toko lauʼi miliona kau fai faka mafola ʼo te Puleʼaga, ke nātou liliu ko he ʼu minisi faiva ʼi te tala ʼo te logo lelei. ʼE koutou kau koa ʼi te ako ʼaia? ʼE koutou kau koa ʼi te toko lauʼi afe ʼaē neʼe nātou kau ki te Ako ʼa Te Kau Pionie ʼaē ʼe fai ia vāhaʼa lua? Ko te fakahifo ʼo te ʼu hola ʼaē ʼe fakamaʼua ki te kau pionie katoa, ʼe lagi ina faka fealagia anai ki te tokolahi ke nātou pionie, ke feala hanatou kau ki te ako ʼaia. Ko te Ako ʼaē ʼe ina Teuteuʼi Ki Te Minisitelio, ʼaē ʼe fai māhina lua, ʼe fai ʼi te temi nei ʼi te ʼu lea ʼaē ʼe fakaʼaogaʼi tāfito, pea ʼe ina teuteuʼi te kau tagata ʼāfea pea mo te kau tagata faifekau faka minisitelio ʼaē ʼe mole heʼeki ʼohoana ke feala hanatou fakalahi tanatou gāue faka teokalatike. ʼI ʼihi temi, ʼe fai te ako makehe ki te kau tagata ʼāfea pea mo te kau tagata faifekau faka minisitelio, ʼi te Ako ʼo Te Minisitelio ʼo Te Puleʼaga.
3 Ko te ʼu fale ʼaē ʼe tuʼu ʼi te Fale Faiako ʼo te Sosiete Watchtower ʼi Patterson, ʼi New York, ʼe fakaʼaogaʼi ki te ʼu kalasi ako e tolu, heʼe fai ai te ako faka teokalatike makehe. Ko te Faleako Faka Tohi-Tapu ʼo Kalaate, ʼaē ʼe fai ia māhina e nima, ʼe ina teuteuʼi te kau minisi ki te gāue faka misionea ʼi te ʼu fenua tai. Ko te ʼu tēhina ʼo te ʼu Komite ʼo te ʼu Filiale mai te malamanei katoa, ʼe nātou kau ki te ako ʼe fai ia māhina e lua ʼo ʼuhiga mo te fakaʼaluʼalu ʼo he filiale. ʼI Maio ʼo te taʼu 1999, neʼe kamata te ako foʼou neʼe fai lolotoga māhina e lua ki te kau tagata taupau feʼoloʼaki, pea neʼe kau kiai te ʼu tēhina e toko 48 mai Amelika pea mo Kanata. Ei ko te kau kaugana fuli ʼa Sehova, ʼe nātou maʼu te ʼu fua lelei ʼaki te ʼu ako kehekehe ʼaia ʼaē ʼe fai e Sehova.
4 He Koʼe Koa ʼe Akoʼi Tatou? Neʼe ʼui fēnei e te tēhina ʼe kau ʼi te Kolesi Pule: “Ko te polokalama ako ʼaē ʼe fai ʼi te temi nei, ʼe tonu ke ina faka fealagia ki te hahaʼi fuli ʼa Sehova ke nātou kaku ki te aga fakapotopoto ʼaē ʼe talanoa kiai ia Tāʼaga Lea 1:1-4.” Koia, ʼofa pe ke haga foaki mai e Sehova kia tatou fuli “te ʼalelo ʼo te hahaʼi ʼaē neʼe akoʼi.”—Isa. 50:4.