Koutou Kole Tokoni
1 “He u temi faigataa,” ko te ʼu palalau ʼaia ʼe faka ʼuhiga lelei ki te temi faigataʼa ʼaenī. (2 Tim. 3:1) Koia, koteā ʼaē ʼe feala ke koutou fai mokā koutou felāveʼi mo he ʼu faigataʼaʼia ʼi te faʼahi fakalaumālie, pea mo lagi koutou manatu ʼe mole koutou lavaʼi anai?
2 ʼE koutou fia palalau koa mo he tahi ʼi te kokelekasio kua fakapotopoto ʼi te faʼahi fakalaumālie? Ko ʼihi ʼe mole lagi palalau anai heʼe nātou ufiufi, peʼe mole nātou fia hohaʼa ki he tahi, peʼe lagi nātou mahalohalo ʼe mole lava tokoni age he tahi kia nātou. ʼE moʼoni, ʼe tonu ke tou faiga fuli ke tou tokakaga fakalelei ki totatou ʼu maʼua, ʼo mulimuli ki totatou ʼu fealagia, kae ke ʼaua naʼa galo kia tatou ʼe feala hatatou kole tokoni ʼo ʼuhiga mo totatou ʼaluʼaga fakalaumālie.—Kal. 6:2, 5.
3 Te ʼUluaki Meʼa ʼAē ʼe Tonu Ke Fai: ʼE lagi koutou fia ʼolo ki te tēhina ʼaē ʼe ina takitaki takotou ako tohi ʼo kole age ke koutou fai faka mafola mo ia. ʼE koutou maʼu ai anai he faigamālie ke koutou palalau age kia ia ki takotou fia tuputupu ʼi te faʼahi fakalaumālie. Kapau ko he tēhina faifekau faka minisitelio, pea koutou fakahā age ʼe koutou kumi he tokoni ʼi te faʼahi fakalaumālie, pea ʼe ina kole anai ki te kau tagata ʼāfea ke tokoni atu. Peʼe feala ke koutou ʼolo ki he tagata ʼāfea ʼo fakahā age te meʼa ʼaē ʼe koutou tuʼania kiai.
4 Koteā te faʼahiga tokoni ʼaē ʼe ʼaoga kia koutou? ʼE ʼi ai koa he meʼa ʼe ina tāʼofi takotou gāue fakamalotoloto? ʼE koutou taupau tokotahi koa takotou fānau pea mo koutou faiga koa ke nātou tapiki maʼu ki te kokelekasio? Kua koutou matutuʼa koa pea mo ʼaoga kia koutou he tokoni? Peʼe ʼi ai koa he fihifihia ʼe ina fakaloto vaivai koutou? ʼE lagi faigataʼa takotou tauʼi te ʼu fihifihia ʼo temi ʼaenī—kae ʼe ko he meʼa ʼe feala. ʼE feala ke koutou maʼu he tokoni.
5 Te Tokoni ʼa Te ʼu Tagata ʼĀfea: ʼE tokaga fakalelei te kau tagata ʼāfea ki te kokelekasio. ʼE nātou fagono anai ki takotou ʼu tuʼania. Kapau ʼe tau te tahi ʼu kaugā fai faka mafola mo te ʼu fihifihia ʼaia, pea ʼe tokagaʼi anai te ʼu faʼahi ʼaia e te kau tagata ʼāfea mokā nātou fai tanatou gāue faka tauhi ōvi pea mokā nātou akoʼi te ʼu ōvi ʼo te kokelekasio. ʼI tonatou ʼuhiga kau “faifaitakiʼaga o te fagaovi” ʼe nātou fia gāue mo koutou ʼaki he loto fiafia. (1 Pet. 5:3) Koutou fakalogo ki te ʼu tēhina fakapotopoto ʼaia, ʼi tanatou fakaʼaogaʼi fakalelei te ʼu pelesepeto ʼo te Tohi-Tapu, heʼe feala ai ke hikihiki takotou minisitelio pea ʼe tokoni atu anai ki tokotou maʼuli.—2 Tim. 3:16, 17.
6 Neʼe foaki mai e Sesu kia tatou “he ʼu meʼa ʼofa ko he ʼu tagata” e tokolahi. (Ef. 4:8, te kiʼi nota ʼi te lalo pasina, MN) Ko tona faka ʼuhiga koutou ʼolo ki te kau tagata ʼāfea. ʼE nātou fia tokoni atu. Ei, ko nātou ʼaia ʼe “a koutou.” (1 Ko. 3:21-23) Koia ʼaua naʼa koutou fakameʼameʼa, kae koutou palalau. Koutou kole age te tokoni ʼaē ʼe ʼaoga kia koutou.