“Koutou Alaʼala”
1 ʼI tana ʼosi talanoa ʼo ʼuhiga mo te ʼu meʼa maʼuhiga ʼaē ka fakaʼiloga ʼaki te ʼu ʼaho fakamuli ʼo te tuʼu ʼaenī, neʼe uga e Sesu tana ʼu tisipulo ke nātou “alaʼala.” (Mko. 13:33) He koʼe ʼe tonu ke ʼalaʼala te kau Kilisitiano? Koteʼuhi ʼe tou maʼuʼuli ʼi te temi ʼaē ʼe fakamataku ʼaupito ʼi te hisitolia ʼo te tagata. Koia ʼe mole tonu ai ke tou māʼumoea ʼi te faʼahi fakalaumālie. ʼE feala ke hoko te faʼahi ʼaia mo kapau ʼe mole tou leleiʼia te gāue ʼaē neʼe tuku mai e Sehova ke tou fakahoko ʼi te temi fakaʼosi ʼaenī. Koteā te gāue ʼaia?
2 ʼE fakaʼaogaʼi e Sehova tana hahaʼi moʼo faka mafola ʼi te kele katoa te logo lelei ʼo ʼuhiga mo tona Puleʼaga—te ʼamanaki pe ʼaia e tahi maʼa te malamanei. Kapau ʼe tou gāue fakatahi mo te kautahi ʼa te ʼAtua, pea ʼe fakahā ai ko tatou ko te kau Kilisitiano moʼoni, kua tou mahino ki te temi pea mo te maʼuhiga ʼaē ke tou tokoni ki te hahaʼi ke nātou logo ki “te u folafola o te mauli heegata.” (Soa. 6:68) Kapau ʼe tou kau mālohi ki te gāue maʼuhiga ʼaia, pea ʼe tou fakamoʼoni ai ʼe tou ʼalaʼala ʼi te faʼahi fakalaumālie.
3 ʼE Tou Fia Faka Mafola: ʼI totatou ʼuhiga kau Fakamoʼoni ʼa Sehova, ʼe tonu ke tou falala ʼo ʼuhiga mo totatou minisitelio. Ko te ʼofa ki te ʼAtua pea mo totatou kāiga, ʼe ina uga ia tatou takitokotahi ke tou kau ki te fai faka mafola. (1 Ko. 9:16, 17) Kapau ʼe tou fai te gāue, ʼe tou hāofaki ia tatou totonu pea mo te hahaʼi ʼaē ʼe nātou fakalogo kia tatou. (1 Tim. 4:16) Tou fakatuʼutuʼu mālohi ʼo mulimuli ki tatatou ʼu fealagia pea mo tona ʼaoga, ke tou faka mafola te puleʼaga ʼaē ʼe lelei tokotahi, pea mo ʼaoga ki te malamanei—te Puleʼaga ʼo te ʼAtua!
4 ʼE maʼuhiga ke tou foimo fai totatou minisitelio ʼuhi ko te faʼahi ʼaenī—heʼe hoko mai anai te mamahi lahi kae kei tou fai te gāue ʼaia. ʼE mole tou ʼiloʼi te ʼaho pea mo te hola ʼo te koga ʼaia, koia ʼe maʼua ai ke tou nonofo ʼalaʼala pea mo tokalelei ʼi te temi fuli pe, ʼo tou falala kia Sehova ʼi te faikole. (Ef. 6:18) ʼE haga tuputupu te mafola ʼo te gāue. Kae ʼe mole kei tuai, pea hoko mai anai te ʼaho ʼaē ka fakaʼosi ai te gāue fai faka mafola lahi tokotahi ʼaē kua hoko ʼi te hisitolia ʼo te tagata.
5 Tou agatonu ʼo mulimuli ki te fakatotonu ʼa Sesu ke tou “alaʼala.” ʼE maʼuhiga tāfito te faʼahi ʼaia ʼi totatou temi. ʼOfa pe ke tou foimo fai te gāue ʼaia. ʼI te temi nei pea ʼi te ʼaho fuli, tou aga fakapotopoto pea mo nonofo ʼalaʼala ʼi te faʼahi fakalaumālie, pea mo tou gāue ʼi te tauhi ʼa Sehova. Ei, ʼofa pe ke “tou nonofo ʼalaʼala pea mo tou aga fakapotopoto.”—1 Tes. 5:6, MN.