Kotou Taupau Te ʼu Faigamālie Fuli ʼUhi Ko Te Temi
“Ke ke fakaha te folafola, too te u faigamalie fuli [ʼuhi ko te temi].”—2 TIM. 4:2.
ʼE FEALA KOA HAKOTOU FAKAMAHINO?
․․․․․
He koʼē neʼe fakalotomālohiʼi ia Timoteo ke ina fakaʼaogaʼi te ʼu faigamālie fuli ʼi te fai fakamafola?
․․․․․
Koteā ʼaē ʼe feala ke tokoni mai ke tou haga manatuʼi te maʼuhiga ʼo te temi?
․․․․․
He koʼē kua maʼuhiga ʼaupitō ʼi te temi nei ia te fakamafola ʼo te Puleʼaga?
1, 2. Koteā te ʼu fehuʼi ʼe tou tali anai kiai ʼo ʼuhiga mo te fakatotonu ʼaē ‘ke tou toʼo te ʼu faigamālie fuli ʼi te fakamafola’?
KO TE hahaʼi ʼaē ko tanatou gāue ʼe ko te haofaki te ʼu maʼuli, ʼe natou fakaʼaogaʼi tuʼumaʼu te ʼu faigamālie fuli moʼo fakahoko tanatou gāue. Ohagē lā ko te kau tamate vela, mokā tagi te telefoni ʼe natou fakavilivili heʼe natou ʼiloʼi ʼe lagi ʼi ai he ʼu maʼuli ʼe tuʼutāmaki.
2 ʼI totatou ʼuhiga Fakamoʼoni ʼa Sehova, ʼe tou fia haofaki te maʼuli ʼa te hahaʼi. Koia ʼaē ʼe tou tokaga lelei ai ki totatou maʼua ʼaē ko te fakamafola ʼo te logo lelei ʼo te Puleʼaga. ʼE moʼoni, ʼe fakatevili tatatou gāue kae ʼe mole tou hoko fai anai. Kae koteā te fakaʼuhiga ʼo te tokoni ʼaē neʼe fai e te ʼapositolo ko Paulo: “Ke ke fakaha te folafola, too te u faigamalie fuli”? (2 Tim. 4:2) ʼE feafeaʼi hatatou lava toʼo te ʼu faigamālie fuli ʼuhi ko te temi ʼi te fai fakamafola? Pea he koʼē ʼe maʼuhiga ʼaupitō?
HE KO’Ē ʼE MAʼUHIGA KE TOU TAUPAU TE ʼU FAIGAMĀLIE FULI ʼI TE FAI FAKAMAFOLA?
3. Ko te faʼahiga tali ʼa te hahaʼi ki te logo ʼo te Puleʼaga ʼe feala ke iku kiteā?
3 Mokā ʼe kotou manatuʼi ko takotou gāue fai fakamafola ʼe feala ke ina haofaki he ʼu maʼuli, pea ʼe lagi kotou lotomālohi anai ʼi te tala ʼo te logo lelei ki te hahaʼi. (Loma 10:13, 14) ʼE ʼui fēnei ʼi te Folafola ʼa te ʼAtua: “Kapau e au ui ki te tagata agakovi: E ke mate anai! Kae kapau e tafoki anai ia mai tana agakovi, o fai te mea ae e totonu mo mooni, . . . e mauli anai ia ia, kae e mole mate anai ia ia. E galoi anai te u agahala fuli ae nee ina fai.” (Esk. 33:14-16) ʼI tona fakahagatonu, ʼe ʼui fēnei ʼi te Tohi-Tapu ki te kau fai fakamafola ʼo te logo ʼo te Puleʼaga: “E ke haofaki ai anai ia koe totonu, pea e ke haofaki ai foki ia natou ae e fakalogo atu kia koe.”—1 Tim. 4:16; Esk. 3:17-21.
4. He koʼē neʼe tonu ke foimo fakahoko te gāue fai fakamafola ʼi te ʼuluaki sēkulō ʼuhi ko te aposetasia?
4 Ke tou mahino ki te tokoni ʼaē ʼa Paulo kiā Timoteo ke ina toʼo te ʼu faigamālie fuli ʼi te fai fakamafola, ʼe ʼaoga ke tou vakaʼi te ʼu vaega ʼaē ʼe hoa mai ki tatatou vaega tāfito. ʼE tou lau fēnei: “Ke ke fakaha te folafola, too te u faigamalie fuli, lelei pee kovi; valoki, fakatonutonu, tokoni i te faafai katoa pea mo te hoha o fakaako. Koteuhi e hoko mai anai he temi e mole kei katakii anai e te u tagata te akonaki mooni; kae, i tanatou mau te magio ke logo ki he u mea lelei, e natou fakatupu anai ni kau fai akonaki kaugamalie o fakatatau ki onatou holi. Pea e natou fakamaliu anai onatou taliga mai te mooni.” (2 Tim. 4:2-4) Neʼe fakakikite e Sesu ʼe mafola anai te aposetasia, peʼe ko te fakafisi ʼaē ki te maʼuli fakakilisitiano. (Mat. 13:24, 25, 38) ʼI te kua fakaʼalu ʼaē ke mafola ia te aposetasia, neʼe tonu leva kiā Timoteo ke ina “fakaha te folafola” māʼia ʼi te loto kōkelekāsio ke ʼaua naʼa muliʼi e te kau Kilisitiano ia te ʼu akonaki hala. ʼEī, neʼe tonu ke haofaki nātou. Kae, ʼe feafeaʼi iā ʼaho nei?
5, 6. Ko te ʼu akonaki fea ʼaē ʼe leleiʼia e te tokolahi ʼe tou maʼu ʼi tatatou minisitelio?
5 Ko te aposetasia kua tuputupu pea mo mafola lahi ʼi temi nei. (2 Tes. 2:3, 8) Ko te ʼu akonaki fea ʼaē ʼe fia logo kiai te hahaʼi iā ʼaho nei? ʼE lahi te ʼu fenua ʼe maʼuhiga ai te akonaki ʼaē ʼe ʼui ko te tagata neʼe mole fakatupu kae neʼe tupu mai te manu. Kae ko te akonaki ʼaia ʼe tau akoʼi pea mo mahino pē kiai te kau poto lalahi, pea kua liliu ia ko te lotu, ʼo ina fetogi ai te manatu ʼa te tokolahi ʼo ʼuhiga mo te ʼAtua pea mo te hahaʼi. Kua mafola ʼi te temi nei te manatu ʼaē ko te ʼAtua ʼe mole tokaga mai kiā tātou pea ʼe mole ʼi ai he ʼuhiga ʼo tatatou tokaga kiā ia. He koʼē ʼe fia logo ia te toko miliona hahaʼi ki te ʼu akonaki ʼaia ʼo tupu ai tanatou momoe ʼi te faʼahi fakalaumālie? ʼE maʼu ʼi te ʼu akonaki ʼaia te manatu tāfito ʼaenī: ‘Kotou fai koutou te meʼa ʼaē ʼe kotou loto kiai heʼe mole kotou huʼi maʼua anai.’ Pea ʼo ʼuhiga mo te manatu ʼaia, tokolahi ʼe natou fia logo mo tui kiai.—Lau ia Pesalemo 10:4.
6 Kae ʼe ʼi ai te tahi ʼu akonaki ʼe tui kiai te hahaʼi. Ko ʼihi ʼaē ʼe kei ʼolo ki te ʼēkelesia ʼe natou fia logo ki te ʼui ʼaē ʼe te tagata faiakonaki, ‘Peʼe koteā pē he meʼa ʼe kotou fai, ko te ʼAtua ia ʼe ʼofa kiā koutou.’ Ko te ʼu pātele mo te ʼu pasitea ʼe natou fakaoloolo te hahaʼi ke natou tui ko te ʼu toʼotoʼoga mo te ʼu Misa, mo te ʼu fakafiafia fakalotu, pea mo te ʼu fakatātā ʼe natou maʼu ai te tapuakina ʼaē mai te ʼAtua. Tokosiʼi ʼi te hahaʼi lotu ʼaia ʼe natou mahino ki te tuʼutāmaki ʼo tonatou maʼuli. (Pes. 115:4-8) Kae, kapau ʼe tou fia fakaʼala ia nātou ʼi te faʼahi fakalaumālie ke natou mahino ki te ʼu moʼoni Fakatohi-tapu, pea ʼe feala ai hanatou maʼu tapuakina mai te Puleʼaga ʼo te ʼAtua.
KOTEĀ TE FAKAʼUHIGA ʼO TE TOʼO ʼO TE ʼU FAIGAMĀLIE FULI ʼI TE FAI FAKAMAFOLA ʼUHI KO TE TEMI?
7. ʼE tou lava fakahā feafeaʼi ʼe tou fakaʼaogaʼi te ʼu faigamālie fuli?
7 Ko he tōketā faitafa ʼe tonu ke tokaga ʼāteaina pē ki tana gāue naʼa tuʼutāmaki he tahi. ʼI tatatou minisitelio Fakakilisitiano, ʼe feala ke tou fakahā te faʼahiga tokaga lelei ʼaia ʼi tatatou gāue, ohagē lā ʼaki te kumi ʼo he ʼu manatu, mo he ʼu fehuʼi pea mo he ʼu logo ʼe lagi fia palalau kiai te hahaʼi ʼaē ʼe tou felāveʼi mo ia. Pea ʼe toe tokoni mai anai ke tou fai he ʼu fetogi ʼi tatatou polokalama ke feala hatatou ʼaʼahi te hahaʼi ʼi te ʼu lakaga ʼaē ʼe natou lotolelei ai ke natou tali ia tātou.—Loma 1:15, 16; 1 Tim. 4:16.
8. ʼI te agamāhani koteā ʼaē ʼe fakamaʼua ki te fakaʼaogaʼi ʼo te ʼu faigamālie fuli?
8 Ko te taupau ʼo te ʼu faigamālie fuli ʼe toe fakamaʼua kiai ke tou fakahoko muʼa te ʼu fakatuʼutuʼu ʼaē ʼe maʼuhiga tāfito. (Lau ia Senesi 19:15.) Ohagē lā, kotou fakakaukauʼi age muʼa te lakaga ʼaē ʼe maʼu ai e te tōketā ia takotou sivi, pea ʼe ina pāui leva koutou ki tona pilō pea mo palalau fakahagatonu atu fēnei: “Koʼenī! Kua tonu ke ke fai he puleʼaki ki tou mahaki koteʼuhi ʼe kei toe pē te ʼu kiʼi māhina pea ke mate.” ʼE mole kotou ʼoho vave anai ki tuʼa mai tona pilō ohagē ko he tagata tamate vela ʼe ina maʼu he logo ʼo ʼuhiga mo he tuʼutāmaki. Kae ʼe kotou fakalogo anai ki tana ʼu tokoni, pea mo liliu ki tokotou ʼapi ʼo fakakaukauʼi fakalelei te ʼu fakatuʼutuʼu kā kotou fai.
9. He koʼē ʼe feala ke tou ʼui neʼe fakaʼaogaʼi e Paulo te ʼu faigamālie fuli ʼi tana fai fakamafola ʼi Efeso?
9 ʼE tou ako anai te fakasiosio tonu mai te ʼu faigamālie fuli neʼe fakaʼaoga e Paulo ʼaki tatatou tokagaʼi ʼana palalau ʼaē neʼe ina fai ki te kau tagata ʼāfea ʼo Efeso ʼo ʼuhiga mo tana fakamafola te logo lelei ʼi Asia. (Lau ia Gaue 20:18-21.) ʼE mahino ia talu pē te ʼaho ʼaē neʼe tau atu ai, neʼe maʼumaʼua ia ki te fakamafola ʼo te logo lelei ʼi te ʼu ʼapi. Pea lolotoga taʼu e lua neʼe mulimuli ia ki tana fakatuʼutuʼu ʼaē ke “ina akoi leva natou i te aho fuli i te fale ako o Tilanusi.” (Gaue 19:1, 8-10) ʼE mahino mai, neʼe ʼiloga ʼi te maʼuli ʼa Paulo ia tana fakaʼaogaʼi te ʼu faigamālie fuli. Ko te fakalotomālohi ʼaē ke tou ‘toʼo te u faigamālie fuli ʼi te ministelio’ ʼe mole fakaʼuhiga leva ʼe tou kinakina anai ʼi te gāue fai fakamafola. Kae ʼe tonu ke fakamuʼamuʼa te gāue fai fakamafola ʼi totatou maʼuli.
10. He koʼē ʼe feala ke tou fiafia ʼi te fakaʼaogaʼi e te kau Kilisitiano ʼo te ʼu taʼu 1900 ia te ʼu faigamālie fuli ʼi te fai fakamafola?
10 Ko te fakatuʼutuʼu ʼaē neʼe fai e te Kau Ako ʼo te Tohi-Tapu ʼi muʼa ʼo te taʼu 1914 ʼo ʼuhiga mo te fakamafola ʼo te logo lelei, ʼe hā lelei mai ai ia te fakaʼuhiga ʼo te fakaʼaogaʼi ʼo te ʼu faigamālie fuli. Logolā neʼe natou toko afe pē, kae neʼe natou mahino ki te maʼuhiga ʼo te temi pea neʼe natou fakahoko ʼaki he loto fiafia te fakamafola ʼo te Puleʼaga. Neʼe natou tā te ʼu akonaki Fakatohi-tapu ʼi te ʼu nusipepa ʼe teau tupu pea mo fakasio ki te hahaʼi te “Photo-Drame de la création,” ʼaē neʼe ko he polokalama neʼe fakahā ai ia te ʼata pea mo te ʼu pāki. Koia ʼaē neʼe feala ai ke malave te logo lelei ki te toko lauʼi miliona hahaʼi. Kapau neʼe mole natou fakaʼaogaʼi te ʼu faigamālie fuli, pea ʼe mole tou ʼiloʼi nei peʼe tou maʼu anai te logo ʼo te Puleʼaga.—Lau ia Pesalemo 119:60.
KOTOU HAGA FAKAʼAOGAʼI IA TE ʼU FAIGAMĀLIE FULI
11. Koteā ʼaē ʼe feala ke mole kei manatuʼi e he tahi ia te maʼuhiga ʼo te temi?
11 ʼE feala ke mole kei manatuʼi e he tahi ia te maʼuhiga ʼo te gāue fai fakamafola ʼuhi ko te ʼu fakafiafia. ʼE faiga e te tuʼu ʼa Satana ke tou maʼumaʼua ki te kumi ʼo he ʼu lelei maʼa tātou pea mo te tahi age ʼu meʼa. (1 Pet. 5:8; 1 Soa. 2:15-17) Ko ihi ʼaē neʼe takimuʼa kiā nātou te tauhi ki te ʼAtua ʼe mole kei natou manatuʼi te maʼuhiga ʼo te temi. Ohagē lā ko te Kilisitiano ʼo te ʼuluaki sēkulō ko Temasi, neʼe ko te “kaumea” ʼo Paulo i te gāue, kae neʼe liliu leva ia ʼo manako ki te ʼu meʼa ʼo te mālama agakovi. Neʼe lītuʼa ia Temasi kiā Paulo he neʼe mole kei takimuʼa kiā ia te fakalotomālohiʼi ʼo tona tehina ʼi te ʼu temi faigataʼa.—Film. 23, 24; 2 Tim. 4:10.
12. Ko te faigamālie fea ʼaē ʼe tou maʼu ʼi te temi nei pea koteā te ʼu faigamālie ʼe tou maʼu anai ʼi te kā haʼu?
12 Kapau ʼe tou haga manatuʼi te maʼuhiga ʼo te temi, pea ʼe ʼaoga anai ke tou tekeʼi te ʼu fakaneke ʼaē ko te fakaʼaogaʼi lahi ʼo te ʼu lelei ʼo te maʼuli. ʼE tonu ke tou faiga mālohi ke tou “too te mauli mooni.” (1 Tim. 6:18, 19) ʼE mahino kiā koutou, ʼi te takitaki ʼo te Puleʼaga ʼo te ʼAtua ko te maʼuli heʼegata ʼe ina fakafealagia anai he ʼu faigamālie heʼegata ke kotou fiafia ai ʼi te fakahoko ʼo ni gāue lelei. Kae ki te temi nei, ʼe tou maʼu ia te faigamālie makehe ʼaē ko te tokoni ki ʼihi ke natou hao ʼi Halamaketone.
13. Koteā ʼaē ʼe feala ke tokoni mai ke tou haga manatuʼi te maʼuhiga ʼo te temi?
13 Tokolahi ʼi ʼotatou tafaʼaki ʼe mole natou ʼiloʼi ia Sehova, koia koteā ʼaē ʼe feala ke tokoni mai ke tou haga manatuʼi te maʼuhiga ʼo te temi? ʼE feala ke tou fakakaukauʼi te temi ʼaē neʼe mole heʼeki tou ʼiloʼi ai te ʼAtua. Kae neʼe tou ako te moʼoni ʼo ʼuhiga mo Sehova pea mo Sesu, pea ʼi te temi leva ʼaenī kua tou maʼu te faigamālie ʼaē ke tou akoʼi te moʼoni ʼaia ki te hahaʼi. (Lau ia Efeso 5:14.) Neʼe tohi fēnei e Paulo: “Kotou tokaga aupito ki takotou haele, ke aua naa kotou hage ko he kau vale, kae kotou hage ko he kau poto; kotou totogi te temi, koteuhi kua kovi te u aho.” (Efe. 5:15, 16) Koia ʼi te mālama agakovi ʼaenī, tou haga “totogi te temi” maʼa te ʼu gāue ʼaē ʼe lava tokoni mai ke tou nofo ʼalaʼala ʼi te faʼahi fakalaumālie.
ʼE TOU MĀʼUʼULI NEI ʼI HE ʼU TEMI MAʼUHIGA
14-16. He koʼē kua maʼuhiga ʼaupitō ʼi te temi nei ia te fakamafola ʼo te Puleʼaga?
14 Neʼe fakaʼaogaʼi tuʼumaʼu te ʼu faigamālie fuli moʼo fakahoko te minisitelio fakakilisitiano, kae ʼi te temi nei kua toe ʼaoga lahi age ia. Talu mai te taʼu 1914, neʼe tou sio mata ki te hoko moʼoni ʼo te ʼu fakaʼiloga ʼaē ʼe talanoa kiai te Folafola ʼa te ʼAtua. (Mat. 24:3-51) Ko te maʼuli ʼo te tagata ʼe tuʼutāmaki tāfito ʼi te temi ʼaenī. Logolā te ʼu fakatuʼutuʼu foʼou ʼaē ki te tokalelei, kae ʼe kei taupau pē e te ʼu fenua mālolohi, ʼanatou foʼi pulu nukeleʼea ʼe 2 000 tupu ke natou fakaʼaogaʼi. ʼE fakamatala ʼi te tahi ʼu tohi kua “puli” te ʼu meʼa ʼaē ʼe faʼu ʼaki te ʼu foʼi pulu nukeleʼea. Pea ʼe natou feʼekeʼaki pe neʼe lagi maʼu e he kau faifakapō. ʼE ʼui e ʼihi ʼe feala pē ke tou mamate fuli ʼi he tau ʼe fakatupu e he kau faifakapō. Kae ʼe mole gata pē ki te tau ʼe feala ke tuʼutāmaki ai te maʼuli ʼo te tagata .
15 ʼE tou lau fēnei ʼi te tānaki ʼo te taʼu 2009 neʼe fai ʼi te sulunale (The Lancet) pea mo te univelesitē ʼo Lonitoni: “Ko te tuʼutāmaki lahi ʼo te 21 sēkulō ʼe ko te fetogi ʼo te agaaga ʼo te kele.” Neʼe toe ʼui fēnei ai: “Ko te fua ʼo te fetogi ʼo te agaaga ʼo te kele ʼe malave anai ki te maʼuli ʼo te hahaʼi ʼi te ʼu taʼu ʼe hogofulu ʼaē kā hoa mai, pea mo ʼāsili tuʼutāmaki ai te maʼuli ʼa te toko lauʼi miliale hahaʼi.” ʼE feala ke toe maumau te kele ʼuhi ko te hake ʼo te nivo ʼo te tai, te taʼi laʼā, te ʼu lōmaki, te ʼu taʼi mahaki, te ʼu ʼafā pea mo te ʼu tau. ʼEī, ko te ʼu tau mo te ʼu tuʼutāmaki fakanātulā ʼe fakatupu tuʼutāmaki ki te tagata.
16 Ko ʼihi hahaʼi ʼe lagi natou manatu ko te tuʼania ʼaē ki he tau fakanukeleʼea ʼe kau ki te ʼu agaaga ʼo “te fakailoga.” Kae tokolahi ʼe mole natou mahino ki te fakaʼuhiga totonu ʼo te fakaʼiloga. Talu mai ni taʼu neʼe tou sio mata ki te hoko ʼo te fakaʼiloga ʼo tou mahino ai ki te kua ʼi henī ʼa Kilisito pea mo te kua ovi mai ʼo te fakaʼosi ʼo te mālamanei. (Mat. 24:3) ʼI te temi muʼa neʼe mole lahi fēia ia te hoko ʼo te ʼu ʼaluʼaga ʼaē ʼo te fakaʼiloga. Kua tonu ki te hahaʼi ke natou ʼaʼala mai te māʼumoea fakalaumālie. Pea ko tatatou minisitelio ʼe lava tokoni ki te faʼahi ʼaia.
17, 18. (a) ʼE malave feafeaʼi kiā tātou “te temi kua tou nonofo ai”? (b) Koteā ʼaē ʼe feala ke fetogi ai te manatu ʼa te hahaʼi ʼo ʼuhiga mo te logo ʼo te Puleʼaga?
17 Kua nounou te temi ʼaē ke tou fakamoʼoni ai ia totatou ʼofa ʼaē kiā Sehova pea mo fakaʼosi te gāue fai fakamafola ʼaē neʼe hinoʼi kiai tātou ʼi te ʼu ʼaho fakamuli. ʼE maʼuhiga ʼaupitō iā ʼaho nei te palalau ʼaenī neʼe fai e Paulo ki te kau Kilisitiano Loma ʼo te ʼuluaki sēkulō: “Kua kotou iloi foki te temi kua tou nonofo ai: Ko te hola aeni ke kotou alaala ai mai te moe, koteuhi i te temi nei kua toe asilisili ovi mai kia tatou te haofaki i te temi ae nee tou tui ai.”—Loma 13:11.
18 ʼE feala ki te hahaʼi ke natou kumi te ʼAtua ʼuhi ko te ʼu meʼa ʼaē neʼe fakakikite ʼo ʼuhiga mo te ʼu ʼaho fakamuli. Ko ʼihi kua natou mahino ʼe ʼaoga ki te tagata ia he tokoni, ʼi tanatou sio ʼaē ki te mole lava fakatokatoka e te ʼu puleʼaga fakatagata ia te ʼu fihifihia fakaekonomika, te mataku ki te nukeleʼea, te faifakapō peʼe ko te maumauʼi ʼo te ʼulu fenua. Pea ko ʼihi atu ʼe natou tali te logo ʼo te Puleʼaga ʼuhi ko he ʼaluʼaga neʼe hoko ʼi tonatou loto fale ohagē lā ko te mahaki, te māvete peʼe ko te mate ʼo he tahi neʼe natou ʼoʼofa ai. ʼI tatatou fakahoko te minisitelio, ʼe tonu ke tou maʼu he ʼu faigamālie ke tou tokoni ai ki te hahaʼi ʼaia.
TOU FAKAʼAOGAʼI TE ʼU FAIGAMĀLIE FULI ʼUHI KO TE MAʼUHIGA ʼO TE TEMI
19, 20. Ko te manatuʼi ʼo te maʼuhiga ʼo te temi ʼe ina uga feafeaʼi te kau Kilisitiano ke natou fetogi tonatou maʼuli?
19 Ko te manatuʼi ʼaē ʼo te maʼuhiga ʼo te temi ʼe ina uga te tokolahi ʼi te kau Kilisitiano ke natou hikihiki tanatou kau ki te minisitelio. Ohagē lā ko te taumātuʼa kei tūpulaga ʼo Équateur, ʼi tanā logo ʼaē ki te akonaki “Ke Fakamaʼamaʼa Takotou Sio” ʼi te fakatahi makehe ʼaho tahi ʼo te taʼu 2006, neʼe nā fakatuʼutuʼu ai ke nā fakafaigafua ia tonā maʼuli. Neʼe nā fai ai te lisi ʼo te ʼu meʼa ʼaē neʼe mole kei ʼaoga kiā nāua, pea lolotoga māhina e tolu neʼe nā hiki leva mai tonā ʼapi lahi ki te kiʼi ʼapi veliveli, mo fakatau ʼihi meʼa pea mo huʼi fuli ʼonā maʼua. Mole fualoa pea neʼe nā liliu ʼo pioniē vaeluaʼi temi ʼo nā tali te tokoni ʼa te taupau fakasilikō ke ʼolo ki he kōkelekāsio ʼe ʼaoga lahi kiai he kau fai fakamafola.
20 ʼE tohi fēnei e te tehina Amelika: “ ʼI te temi ʼaē neʼe mā kau ai ki te fakatahi fakasilikō ʼo te taʼu 2006, neʼe kua taʼu 30 tamā papitema. Pea lolotoga tamā liliu ʼaē kiō māua ʼi te motokā ʼi te hili ʼo te fakatahi, neʼe mā talanoa ai ki te faʼahiga fakaʼaogaʼi ʼo te tokoni ʼaē ke fakafaigafua tomā maʼuli. (Mat. 6:19-22) Neʼe mā maʼu ʼapi e tolu, mo te koga kele, mo te ʼu motokā totogi kovi, mo te vaka pea mo te motokā lahi ʼe feala tona nofoʼi. Neʼe mā fakatuʼutuʼu leva ke mā kau ki te selevisi pioniē kātoa ʼi tamā mahino ʼaē ʼe maʼua ke mā maʼu te faʼahiga sio ʼa te kau Kilisitiano moʼoni. Pea ʼi te taʼu 2008, neʼe mā kau fakatahi mo tamā taʼahine ʼi te selevisi pioniē vaeluaʼi temi. ʼI meʼa fakafiafia foki te gāue fakatahi mo ʼotatou tehina mo tuagaʼane! Neʼe mā toe maʼu te fealagia ʼaē ke mā gāue ʼi te ʼu koga meʼa ʼaē ʼe ʼaoga lahi kiai he kau fai fakamafola. ʼI te lahi age ʼo tamā gāue kiā Sehova neʼe toe lelei age ai tamā felōgoi mo ia. Tāfito lā ʼi te ʼu temi ʼaē mā sio ai ki te fiafia, ʼe maʼu e te hahaʼi ʼi tanatou logo mo mahino ki te moʼoni ʼo te Folafola ʼa te ʼAtua.”
21. Ko te mahino fea ʼaē ʼe ina uga tātou ke tou fai fakamafola ʼaki te manatuʼi te maʼuhiga ʼo te temi?
21 ʼE tou ʼiloʼi kua vave hoko fakapunamaʼuli ki te tuʼu ʼo te ʼu faʼahiga meʼa agakovi ʼaenī ia “te aho o te fakamaau mo te mamaui o te kau agakovi.” (2 Pet. 3:7) Ko tatatou mahino ʼaē ki te Folafola ʼa te ʼAtua ʼe ina uga tātou ke tou tala ʼaki he faʼafai ia te mamahi lahi ʼaē kua vave hoko mai pea mo te mālama foʼou ʼaē kā hoa atu anai kiai. Tou haga manatuʼi te maʼuhiga ʼo te temi ke feala hatatou fakahā te ʼamanaki moʼoni ki te hahaʼi. Kapau ʼe tou faiga mālohi ʼi te gāue maʼuhiga ʼaia pea ʼe tou fakahā ai tatatou ʼofa moʼoni ki te ʼAtua pea mo te kāiga fuli.