Tou Fai Fakamafola ʼAki He Faʼa Kātaki!
1. Ko te tokoni fea ʼa Paulo ʼaē ʼe maʼua ke tou tokagaʼi ʼi totatou temi?
1 “Fakamafola te folafola, fai ʼaki he faʼa kātaki.” (2 Tim. 4:2) He koʼē ʼe maʼuhiga ʼaupitō ia te tokoni ʼa Paulo ʼi totatou temi? ʼE feala ke malave feafeaʼi ia te ʼu palalau ʼaia ki totatou maʼuli pea mo te maʼuli ʼo niʼihi?
2. He koʼē ʼe tou kumikumi fakalelei ia nātou ʼaē mole heʼeki logo ki te logo lelei?
2 ʼE Fakalogo Kiai Ia Te Maʼuli ʼo Te Hahaʼi: Ko te ʼu lauʼi miliona hahaʼi ʼi te mālamanei ʼe kei tonu ke natou logo ki te logo lelei ʼaē ʼe feala ke ina haofaki nātou. (Loma 10:13-15; 1 Tim. 4:16) ʼE kei tokolahi te hahaʼi ʼe fia logo moʼoni ʼe tou maʼu ʼi te ʼu telituale ʼaē ʼe fai tuʼumaʼu. Kapau ʼe tou fetogi ia te ʼu ʼaho ʼaē ʼe tou fai fakamafola ai peʼe ko te hola, pea ʼe feala ai anai ke tou maʼu he tahi age ʼu hahaʼi. ʼI tatatou kumikumi fakalelei te hahaʼi, ʼe tou maʼu ai ia he leʼo ʼo loto ʼe maʼa pea mo tou ʼāteaina mai te toto ʼo te hahaʼi.—Gāue 20:26.
3. ʼE feafeaʼi hatatou lava fakaʼaogaʼi fakapotopoto totatou temi mokā tou fai fakamafola?
3 Logolā tonatou fakatagaʼi, kae ko te kau Kilisitiano ʼo te ʼuluaki sēkulō neʼe natou ‘fakafonu ia Selusalemi ʼaki tanatou akonaki.’ (Gāue 5:28) ʼE tou fakatotonu koa mo tātou ke tou “fai he fagonogono ʼe kātoa”? (Gāue 10:42) ʼI tatatou fai fakamafola, ʼe tou fakaʼaogaʼi fakapotopoto koa ia totatou temi? Kapau ʼe tou lolotoga fakatalitali niʼihi neʼe ʼolo ʼo fai ʼaʼahi, pea ʼe tou fakaʼaogaʼi koa te faigamālie ʼaia ke tou palalau ai ki te hahaʼi ʼaē ʼe fakalaka?
4. Kapau ʼe tou fai fakamafola ʼaki he faʼa kātaki, ʼe tokoni feafeaʼi mai ke tou haga nonofo ʼalaʼala?
4 Ke Lahi Age Tatatou Nonofo Tokaga: ʼI te ovi mai ʼo te fakaʼosi ʼo te tuʼu ʼaenī, ʼe tonu ke tou nonofo tokaga, ke tou haga nonofo ʼalaʼala. (1 Tes. 5:1-6) Kā tou palalau tuʼumaʼu ʼo ʼuhiga mo tatatou ʼamanaki ki te Puleʼaga, pea ʼe mole tou mafasia anai ʼi te tuʼu ʼo te ʼu faʼahiga meʼa ʼaenī. (Luka 21:34-36) Pea ʼi tatatou haga ‘taupau lelei ʼi totatou ʼatamai’ ia te ʼaho ʼo Sehova, ʼe uga ai tātou ke lahi age tatatou kau ki te gāue fai fakamafola ʼaē ʼe ina haofaki te ʼu maʼuli.—2 Pet. 3:11, 12.
5. Ko tatatou fakaʼapaʼapa ʼaē ki te maʼuli, ʼe ina uga feafeaʼi tātou ʼi te minisitelio?
5 Kā tou fai fakamafola ʼaki he faʼa kātaki, ʼe tou maʼu ai ia te manatu ʼa Sehova ʼo ʼuhiga mo te maʼuli: “[ʼE] mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala.” (2 Pet. 3:9; Esk. 33:11) ʼOfa pē ke tou fakatotonu ke tou maʼu ni hahaʼi ʼe tokolahi ʼi tatatou telituale, ke fakakolōliaʼi ai ia Sehova!—Pes. 109:30.