“Faka Mafola Te Folafola . . . ʼAki Te Lotomālohi”
1 Kapau ʼe koutou maʼu he meʼa ʼe tohi ai “MAʼUHIGA,” koteā anai ʼaē ka koutou fai? Ko te kupu “maʼuhiga” ko tona faka ʼuhiga ʼe ko he “meʼa ʼe tonu ke foimo vakaʼi.” Ko te tupuʼaga la ʼaia ʼo te fakatotonu e te ʼapositolo ko Paulo ki te kau Kilisitiano ke nātou “faka mafola te folafola . . . ʼaki te lotomālohi.” (2 Tim. 4:2, MN) ʼE koutou foimo fai koa te gāue ʼaia?
2 Neʼe lagi fakahā age kia Paulo ko ʼihi ʼi tona ʼu tēhina neʼe kua ‘vaivai tanatou faʼafai’ ʼi tonatou ʼuhiga kau Kilisitiano. (Loma 12:11) Neʼe mole lahi ai te ʼu fua ʼo tanatou ʼu gāue pea mo te fiafia ʼaē neʼe feala ke nātou maʼu ʼi tanatou tokoni ki te hahaʼi.
3 Te Manatu ʼa Sesu ʼo ʼUhiga Mo Te Minisitelio: Neʼe ko he meʼa fakafiafia kia Sesu tana fakahoko tona minisitelio! Neʼe ina ʼui fēnei: “Ko taku meakai e ko taku fai te finegalo o ia ae nee ina fekaui au pea mo au fakakatoa tana gaue.” Ko te faʼifaʼitaki ʼaia ʼa Sesu neʼe ina uga tana kau tisipulo, pea neʼe ina fai kia nātou te fakaloto mālohi ʼaenī: “Kua hina te u gaueʼaga ki tona tanaki.” (Soa. 4:34, 35) Neʼe hā lelei ʼi tana minisitelio ʼe maʼuhiga kia ia te gāue ʼaē ʼe tonu ke ina fai, he neʼe ina ʼui ki tana kau tisipulo ke nātou “faikole ki te Aliki o te taukai, ke ina fekaui mai he kau gaue ki tana taukai.” (Mat. 9:38) Neʼe mahino kia Sesu neʼe fekauʼi mai ke fai faka mafola, pea neʼe mole ina loto ke ʼi ai he meʼa ʼe ina tāʼofi ia ia ʼi tana fakahoko te faʼahi ʼaia.
4 Kaeā Tatou? Ia ʼaho nei, ʼe toe maʼuhiga ʼaupito age ke tou haga fai te gāue fai faka mafola. ʼE lahi te ʼu potu ʼi te malamanei kua teuteuʼi te gāueʼaga ki te taʼukai. Māʼia mo te ʼu fenua ʼaē ʼe hage kua katoa ai te fai faka mafola, ʼe papitema ai ʼi te taʼu fuli te toko lauʼi afe hahaʼi. ʼI te kua vave hoko mai ʼo te fakaʼosi ʼo te tuʼu ʼo te ʼu faʼahiga meʼa ʼaenī, ʼe ‘lahi te ʼu gāue ʼi te ʼAliki.’ (1 Ko. 15:58, MN) Kua maʼuhiga tāfito ʼi te temi ʼaenī, ke tou faiga mālohi ke tou faka mafola ki te hahaʼi te logo ʼo te Puleʼaga.
5 Tou tokakaga tāfito ke aʼu te logo lelei ki te hahaʼi, ʼi te ʼu ʼapi peʼe ʼi te ʼu faʼahi fuli pe ʼo te telituale ʼaē ʼe feala ke tou maʼu atu kiai te hahaʼi. Kapau ʼe lahi tatatou fai faka mafola, pea ʼe tou fakahā lelei ai ʼe tou fakamuʼamuʼa te Puleʼaga ʼi totatou maʼuli. (Mat. 6:33) ʼE tou maʼu anai he fiafia lahi, ʼi tatatou agatonu ʼo faka mafola ia te folafola.