Tou Fakalahi Tatatou Fai Faka Mafola He Kua Ōvi Mai Te Fakaʼosi
1 Ko te taʼukai ʼe ko he temi fakafiafia. Pea ʼe ko he temi ʼe tonu ke kita gāue kinakina ai. ʼE faka tuʼakoi te temi ʼaē ʼe tonu ke tānaki ai te magisi, pea ʼe mole tonu ke vaivavai te kau gāue.
2 ʼI tana lea fakatātā, neʼe fakatatau e Sesu “te aho fakamuli” ki te temi ʼo te taʼukai. (Mateo 13:39) ʼE tou maʼuʼuli ʼi te ʼu ʼaho fakamuli ʼo te tuʼu ʼo te ʼu faʼahiga meʼa ʼaenī, pea ʼe faka tuʼakoi te temi ʼaē ʼe feala ai ke tou faka mafola “ki te kelekele katoa.” (Mateo 24:14) ʼI te kua ōvi mai ʼo te fakaʼosi, ʼe tonu ke tou fakatuputupu tatatou kau ki te minisitelio. Koteā tona tupuʼaga? Neʼe fakamahino fēnei e Sesu: “E lahi te taukai, kae e lavaki te kau gaue.”—Mateo 9:37, 38; Loma 12:11.
3 Tou Gāue Fakatoʼotoʼo: ʼI te temi ʼaē neʼe kamata ai e Sesu tana gāue fai faka mafola lahi, neʼe ko taʼu pe e tolu vaelua ʼaē neʼe tuku age kia te ia moʼo fakahoko te gāue ʼaia. Neʼe gāue fakatoʼotoʼo ʼi tana fai faka mafola, he neʼe ina ʼui fēnei: “E tonu ke au fagonogono ai te Logolelei o te Puleaga o te Atua, ko te tupuaga aia o toku fekauʼi mai.”—Luka 4:43.
4 Neʼe toe akoʼi foki e Sesu ki tana kau tisipulo ke nātou gāue fakatoʼotoʼo. (Mko. 13:32-37) Ko tona tupuʼaga la ʼaia, “nee mole gata tanatou akonaki pea mo tanatou fagonogono te Logolelei, ko Sesu e ko te Mesia, i te faletapu pea mo te u api.” (Gaue 5:42) Neʼe mole nātou fakamuʼamuʼa ʼi tonatou maʼuli te ʼu gāue ʼaē neʼe mole faʼa maʼuhiga. Logope la neʼe nātou tokosiʼi, kae neʼe nātou lava faka mafola te logo lelei “ki te keleatula fuape o te lalo lagi.”—Kol. 1:23.
5 Koia, ʼe maʼuhiga age kia tatou ke tou gāue fakatoʼotoʼo ʼi te temi ʼaenī, heʼe kua “fakaovi mai te fakaʼosi o te meafuape.” (1 Pet. 4:7) Kua fakakatofa e Sehova te ʼaho pea mo te hola ki te fakaʼosi ʼo te tuʼu ʼo te ʼu faʼahiga meʼa ʼaenī. (Mateo 24:36) ʼE tonu anai ke fakaʼosi te gāue fai faka mafola ʼi te temi ʼaenī ʼe kei toe. Ko tona tupuʼaga la ʼaia ʼo tatatou haga faiga lahi ke tou fakahā te logo lelei ki te hahaʼi tokolahi.
6 Kapau ʼe lahi tatatou kau ki te gāue fai faka mafola ʼi te fakaōvi mai ʼo te fakaʼosi, pea ʼe tou fiafia anai ʼi tatatou ʼui ʼaē kia Sehova, ohage ko tana ʼui e Sesu: ‘Neʼe mātou fakakatoa te u gaue nee ke foaki mai kia matou ke matou fai.’—Soane 17:4.