Te Tali Ki ʼAkotou ʼu Fehuʼi

◼ Ka fai akonaki he tēhina, he koʼe ʼe lelei ki te kokelekasio ke nātou toʼo te ʼu vaega?

ʼE fakalogo anai te lahi ʼo te ʼu vaega ʼaē ka ina fakaafe te kokelekasio ke ina toʼo, ki te ʼu puani ʼaē ka talanoa kiai, pea mo vakaʼi pe ko te akonaki ʼaē ka ina fai ʼe ina fakamahino anai koa te ʼu vaega fuli ʼaē ka ina toʼo mai te Folafola ʼa te ʼAtua.

ʼAua naʼa galo kia tatou, ʼe tou fakalau te ʼu vaega Tohi-Tapu, moʼo fakamoʼoni ko te meʼa ʼaē neʼe tou talanoa kiai ʼe tuʼu ʼi te Tohi-Tapu. (Gaue 17⁠:11) Ko te tahi tupuʼaga ʼaē ʼe tou fakaʼaogaʼi ai te ʼu vaega, heʼe tou fia fakahā ki te kokelekasio he fakamoʼoni tāfito ko te Tohi-Tapu ʼe lagolago ki te ʼu manatu ʼaē neʼe tou talanoa kiai ke lotomālohi ai tanatou tui. Kapau ʼe nātou sio tonu ki te manatu ʼa te Tohi-Tapu mokā lau he vaega tāfito, pea ʼe malave mālohi anai ki tonatou ʼatamai. ʼO hilifaki ki te toʼo ʼo te ʼu vaega mai te Tohi-Tapu, ʼe ko he meʼa lelei hakita tohi pea mo mulimuli ki te ʼu manatu ʼaē ʼe fakahā mai.

ʼI te pepa akonaki ʼaē ʼe tuku mai e te Sosiete, ʼe feala ke tohi ai he ʼu tuʼuga vaega Tohi-Tapu moʼo tokoni ki te tēhina ke ina teuteuʼi tana akonaki. ʼE feala ki te ʼu manatu ʼaia ke nātou fakamahino te ʼaluʼaga ʼo te akonaki, peʼe feala ki te ʼu manatu ʼaia ke nātou tokoni ki te tēhina ke ina manatuʼi te ʼu pelesepeto faka Tohi-Tapu tāfito pea ke mahino ki te fakaʼaluʼalu ʼo te akonaki. ʼE fakafuafua e te tēhina pe ko te ʼu vaega fea ʼaē ʼe maʼuhiga moʼo fai tana akonaki, pea mo te ʼu vaega ʼaē ka ina fakaafe te kokelekasio ke nātou lau fakatahi mo ia pea mo ina fakamahino. Ko te tahi ʼu vaega moʼo tokoni ki tana akonaki, ʼe feala ke lau e te tēhina peʼe ina fakamatala fakanounou, pea ko te ʼu vaega ʼaia ʼe mole fakamaʼua ke toʼo e te kokelekasio.

Mokā lau te ʼu vaega, ʼe lau fakahagatonu e te tēhina mai te Tohi-Tapu, kae ʼaua naʼa ina lau te vaega mai he moʼi pepa neʼe ina hiki kiai. Mokā fakaafe e te tēhina ia te kokelekasio ke mulimuli ki te lau ʼo te vaega, pea ʼe ina fakahā lelei te koga tohi, te kapite pea mo te vaega Tohi-Tapu. Pea ʼe ʼai anai hana kiʼi tuʼu moʼo lagaʼi he fehuʼi peʼe ina fakamahino fakanounou pe koʼe ʼe ina lau te vaega, ke feala ki te kokelekasio ke ina maʼu hona temi moʼo kumi te vaega. Ko te toe fakahā liuliuga ʼo te vaega, ʼe tokoni anai ki te kokelekasio ke ina manatuʼi te vaega. Kae ʼe lelei te mole fakahā te numelo ʼo te pasina ʼaē ʼe tuʼu ai te vaega, koteʼuhi ʼe lagi kehekehe te ʼu Tohi-Tapu ʼaē ʼe fakaʼaogaʼi e te hahaʼi ʼo te fono. Ko te toʼo ʼaē ʼo te ʼu vaega Tohi-Tapu ʼaē ʼe fakahā mai e te tēhina, ʼe tokoni ki te kokelekasio ke ina maʼu te mālohi ʼo te Folafola ʼa te ʼAtua, mokā fakamahino ʼi te lolotoga ʼo te akonaki.​—⁠Hep. 4⁠:⁠12.