ʼU Mātuʼa—Koutou Akoʼi Ki Takotou Fānau He ʼu Agamāhani Lelei
1 ʼE mole tou tutupu ake mo he ʼu agamāhani lelei, peʼe tou maʼu fakapunamaʼuli pe te ʼu aga ʼaia. ʼO toe feiā pe, ʼe ʼaoga he temi loaloaga moʼo akoʼi ki te fānau te ʼu aga ʼaē ʼe lelei. Ko tona faka ʼuhiga ʼe tonu ke akoʼi age pea mo fakahū māmālie kia nātou te ʼu faʼahi ʼaia. ʼE tonu ke felogoi tahi te ʼu mātuʼa ke feala hanā “haga ako [tanā fānau] ke nātou maʼu ia te akonaki pea mo te manatu ʼa Sehova.”—Ef. 6:4, MN.
2 Kamata Talu Mai Te Kei Liliki: ʼE fakaofoofo ʼaupito te fealagia ʼo nātou liliki ke nātou ako pea mo fai he ʼu meʼa foʼou. Logola ʼi te agamāhani ʼe ko he meʼa faigataʼa ki te hahaʼi lalahi hanatou ako he lea foʼou, ko te fānau ʼaē ʼe mole heʼeki ʼolo ʼo ako ʼe feala hanatou ako ia lea e lua peʼe tolu. ʼAua naʼa koutou manatu ʼe kei liliki fau takotou fānau moʼo fai ʼo te ʼu aga ʼaē ʼe lelei. Kapau ʼe koutou foimo kamata pea mo fai hoholo te akoʼi ʼa te Tohi-Tapu ki he tamasiʼi, ʼaki te temi ʼi tana lahilahi ake, ʼe fonu anai tona ʼatamai ʼaki te ʼu meʼa ʼaē neʼe akoʼi age, pea ʼe liliu anai ʼo “poto ki te fakamaʼuli.”—2 Tim. 3:15, MN.
3 Koutou Fakamāmāhani ʼo Fai Faka Mafola: Ko te agamāhani ʼaē ʼe lelei ke koutou akoʼi ki takotou tamasiʼi, ʼe ko te faka mafola tuʼumaʼu ia te logo lelei ʼo te Puleʼaga ʼo te ʼAtua. Ko te tokolahi ʼo te ʼu mātuʼa neʼe nātou fai te faʼahi ʼaia, ʼo nātou ʼave tanatou fānau ʼi tanatou kei liliki ki te fai faka mafola ʼi te ʼu ʼapi. Kapau ʼe kau tuʼumaʼu te ʼu mātuʼa ki te fai faka mafola, pea ʼe feala anai ki te fānau ke nātou leleiʼia pea mo gāue mālohi ʼi te minisitelio. ʼE feala ki te ʼu mātuʼa ke nātou fakahāhā age peʼe feafeaʼi te ʼu agaaga kehekehe ʼo te fai faka mafola.
4 Tahi ʼaē meʼa, ʼe tokoni anai ki te fānau tanatou kau ki te Ako ʼo Te Minisitelio Faka Teokalatike. ʼE nātou ako ai te ʼu agamāhani lelei ʼaē ko te ako, te lautohi pea mo tanatou faiga ke nātou mahino ki te ʼu meʼa ʼaia. ʼE nātou ako ai peʼe feafeaʼi hanatou palalau ʼo ʼuhiga mo te Tohi-Tapu, te fai ʼo te ʼu ʼaʼahi, pea mo te fai ʼo te ʼu ako Tohi-Tapu. Ko te taʼi ako ʼaia ʼe ina lava uga nātou ke nātou pionie, pea mo nātou faiga ki he ʼu pilivilesio makehe ʼo te minisitelio. ʼE lahi te kau Petelite pea mo te kau misionea, ʼe nātou manatuʼi fakafiafia tanatou kamata kau ki te Ako ʼo te Minisitelio, pea ʼe nātou ʼiloʼi ko te faʼahi ʼaia neʼe tokoni kia nātou ke nātou maʼu he ʼu agamāhani lelei.
5 ʼE tou hage fuli ko te kele ia nima ʼo Sehova, te Tagata Faʼu Ipu Lahi. (Isa. 64:8) Kapau ʼe mālū te kele, pea ʼe faigafua anai tona gāueʼi. Kapau ʼe loaloaga tona gāueʼi, pea ʼe tologa anai. Pea ʼe toe feiā mo te hahaʼi. ʼI tonatou kei tūpulaga, ʼe faigafua tonatou akoʼi, pea ʼe toe lelei age ʼi tonatou kei liliki. ʼE lelei ʼaupito te ʼu taʼu ʼaē ʼe kei nātou liliki ai, mokā akoʼi anai kia nātou te meʼa ʼaē ʼe lelei, peʼe ko te meʼa ʼaē ʼe kovi. Kapau ko koutou ko he ʼu mātuʼa lelei, pea koutou kamata akoʼi ki takotou fānau ʼi tanatou kei liliki, te ʼu agamāhani lelei ʼi te minisitelio faka Kilisitiano.