Koutou Gāue Fakafiafia
1 Neʼe ʼui e Sesu, lolotoga tana ʼi henī, ko te tokolahi ʼo te hahaʼi ʼe mole nātou ‘tokagaʼi anai he meʼa,’ ohage ko te temi ʼo Noe. (Mat. 24:37-39) Koia ʼe tou ʼiloʼi ʼe lahi te hahaʼi ʼe mole nātou fakalogo anai ki te logo lelei ʼo te Puleʼaga. Koteā ʼaē ka tokoni kia tatou ke tou fiafia ʼi tatatou fakahoko ʼo tatatou minisitelio?—Pes. 100:2.
2 ʼUluaki, ʼe tonu ke tou manatuʼi ko te logo ʼaē ʼe tou tala pea mo te gāue ʼaē ʼe tou fai, neʼe fakatotonu mai e te ʼAtua. ʼI tona fakahagatonu, ko he tahi ʼe fakafisi ki tatatou gāue, logola tatatou ʼu faiga mālohi, ʼe fakafisi ia kia Sehova. Kapau ʼe tou manatuʼi, ʼe ina leleiʼia tatatou agatonu ʼi te fai faka mafola, pea ʼe tokoni anai te faʼahi ʼaia ke tou haga fiafia ʼi tatatoufai te gāue ʼa te ʼAtua.—Skp. 1:25.
3 Lua, ʼe kei ʼi ai te ʼu hahaʼi ʼe nātou tali anai ke hāofaki nātou e Sehova. Logola ko te tokolahi ʼe nātou fakafisi, kae ʼi te temi ʼaenī ʼaē kua hoko mai ai te fakaʼosi, ʼe kei ʼi ai te ʼu hahaʼi ʼe nātou hage ko he ʼu ōvi ʼe tonu ke tānaki mai. ʼE tonu ke tou haga fai faka mafola, ke tou ʼolo ki “he kolo lahi, pe ko he kolo veliveli” moʼo “kumi pe ko ai ʼaē ʼe tāu mo ia.”—Mat. 10:11-13, MN.
4 Koutou Taupau He Manatu Lelei: Ko te tokolahi kua nātou fiu ʼi te ʼu meʼa kovi ʼaē ʼe fai e te ʼu lotu hala. Ko ʼihi kua “fakaofaofa pea mo ogosia” ʼuhi ko te tuʼu ʼaenī. (Mat. 9:36) Ko te tokolahi kua nātou lotovaivai heʼe mole hanatou gāue, ʼe nātou mahamahaki, pea ʼe mole honatou hāofakiʼaga. Kapau ʼe tou mahino ki te faʼahi ʼaia, pea ʼe tou haga fai anai tatatou gāue. Koutou faiga ke koutou lagaʼi he ʼu fai palalau ʼo ʼuhiga mo te ʼu meʼa ʼaē ʼe tuʼaniaʼi tāfito e te hahaʼi ʼo totatou telituale. Koutou tokoni kia nātou ke nātou mahino, ko te puleʼaki pe e tahi, ʼe ko te Puleʼaga ʼo te ʼAtua. Koutou fakaʼaogaʼi ia te Tohi-Tapu pea mo te ʼu puani tāfito ʼo te ʼu tohi, ke malave te logo lelei ki tonatou loto.—Hep. 4:12.
5 ʼE manatuʼi tuʼumaʼu e te kau gāue fiafia ʼo te Folafola ʼa te ʼAtua: “Ko te fiafia ʼa Sehova ʼe ko [totatou] tule mālohi.” (Neh. 8:10) ʼE tonu ke tou taupau maʼu tatatou fiafia. “Kapau e taau mo te api, e hifo ai toutou tokalelei; kae kapau e mole taau pea e liliu atu anai toutou tokalelei kia koutou.” (Mat. 10:13) ʼE fakafoʼou e Sehova tatatou fiafia pea mo totatou mālohi, mo kapau ʼe tou haga kātaki ʼi tatatou tauhi taputapu, pea ʼe ina tapuakiʼi tatatou agatonu.