Tou “Tauhi Kia Sehova ʼAki Te Loto Fiafia”
1. Koteā te tupuʼaga ʼo te fiafia lahi ʼa te ʼu kaugana ʼa Sehova?
1 Neʼe tohi fēnei e te ʼapositolo ko Paulo: “Koutou fakafiafia tuʼumaʼu ʼi te ʼAliki. ʼE ʼau toe tala atu anai: koutou fakafiafia!” ʼE tou fiafia lahi heʼe tou maʼu te pilivilesio ʼaē ke tou vaevae te logo lelei pea mo tokoni ki te hahaʼi ʼaē ʼe hage ni ʼu ōvi ke nātou tauhi kia Sehova. (Luka 10:17; Gaue 15:3; 1 Tes. 2:19) Kae e feafeaʼi mo kapau ʼi ʼihi temi ʼe mole tou fiafia ʼi tatatou minisitelio, pea koteā ʼaē ʼe feala ke tou fai?
2. ʼE lava feafeaʼi hatatou fiafia mo kapau ʼe tou manatuʼi pe ko ai ʼaē neʼe ina fekauʼi tatou ke tou fai faka mafola?
2 Ko He Gāue Neʼe Fakatotonu e Te ʼAtua: Tou manatuʼi ʼe ko Sehova ʼaē neʼe ina fakatotonu mai ke tou fai faka mafola. ʼE moʼoni, ko he toe pilivilesio lahi tatatou liliu ko he ʼu “kauga gaue a te Atua” ʼo tala te logo ʼo te Puleʼaga pea mo fai he ʼu tisipulo. (1 Ko. 3:9) ʼE tokoni mai kia tatou ia Kilisito Sesu ʼi te gāue ʼaia ʼaē ʼe mole toe fakahoko anai ʼi he tahi temi. (Mat. 28:18-20) ʼE toe kau mo te kau ʼaselo kiai ʼo gāue fakatahi mo tatou ʼi te taʼukai fakalaumālie lahi ʼaia ʼaē ʼe fakahoko ʼi te temi nei. (Gaue 8:26; Apk. 14:6) Ko te Tohi-Tapu, ʼo feiā mo te ʼu meʼa ʼaē neʼe hoko ki te hahaʼi ʼa te ʼAtua, ʼe ina foaki he fakamoʼoni lelei ko Sehova ʼe lagolago ki te gāue ʼaia. Koia ka tou fai faka mafola, pea ʼe tou ʼolo “ohage ko he kau fakafofoga ʼa te ʼAtua, ʼe [tou] palalau kae sio mai te ʼAtua, ʼo kaugā gāue mo Kilisito.” (2 Ko. 2:17, MN ) ʼE ko he toe tupuʼaga lahi ʼaia ke tou fiafia!
3. He koʼe ʼe ʼaoga te faikole moʼo taupau tatatou fiafia ʼi tatatou tauhi ki te ʼAtua?
3 Ko te faikole ʼe maʼuhiga moʼo taupau tatatou fiafia ʼi te tauhi ki te ʼAtua. (Kal. 5:22) Mai tona ʼaluʼaga ʼaē ʼe tou lava fakahoko te gāue ʼa te ʼAtua ʼaki pe tona mālohi, ʼe tonu ke tou kolekole kia te ia tona laumālie, ʼaē ʼe ina foaki lahi kia nātou ʼaē ʼe nātou kole age kia te ia. (Luka 11:13; 2 Ko. 4:1, 7; Ef. 6:18-20) Kapau ʼe tou faikole ʼo ʼuhiga mo tatatou minisitelio pea ʼe tokoni mai anai kia tatou ke tou taupau he manatu ʼe lelei ʼi te temi ʼaē ʼe mole tali lelei ai tatou. ʼE tokoni mai anai ke tou haga fai faka mafola ʼaki he lototoʼa pea mo he loto fiafia.—Gaue 4:29-31; 5:40-42; 13:50-52.
4. Kapau ʼe kita teuteuʼi lelei takita gāue, pea ʼe tokoni feafeaʼi mai ke lahi age tatatou fiafia ʼi te fai faka mafola, pea koteā te ʼu faʼahiga teuteu ʼaē ʼe feala ke tou fai?
4 Tou Teuteu Lelei: Ko te faʼahi ʼaē ʼe feala ke tou fai ke tuputupu ai tatatou fiafia mokā tou kau ki te minisitelio, ʼe ko te teuteuʼi lelei ʼo tatatou gāue. (1 Pet. 3:15) ʼE mole fakamaʼua e te teuteu ʼaia he temi loaloaga. ʼE ʼaoga pe he ʼu kiʼi minuta moʼo toe vakaʼi peʼe koteā te ʼu manatu ʼaē ʼe feala ke tou fakaʼaogaʼi moʼo fakahā te ʼu nusipepa foʼou, peʼe ko he ʼu palalau ʼe ʼalutahi mo te tohi ʼaē ʼe tonu ke tufa. Kapau ʼe koutou fia maʼu he ʼu ʼuluaki palalau ʼe lelei, koutou vakaʼi te kaupepa Te ʼu Tokoni Ki Te ʼu Fai Palalau Faka Tohi-Tapu peʼe ko te ʼu Minisitelio ʼo Te Puleʼaga ʼo te ʼu māhina kua hili. Ko ʼihi kau fai faka mafola ʼo te Puleʼaga ʼe nātou tohi tanatou ʼu palalau nounou ki he kiʼi moʼi pepa. ʼE nātou tau vakaʼi te kiʼi moʼi pepa ʼaia moʼo fakamanatuʼi tanatou ʼu palalau. ʼE tokoni ai kia nātou ke mole nātou matataku pea ʼe nātou maʼu ai he loto falala ke nātou fai faka mafola ʼaki he lototoʼa.
5. ʼE fua lelei feafeaʼi te fiafia kia tatou pea mo ʼihi?
5 Ko te fiafia ʼe ina foaki mai he ʼu tapuakina lahi. Kapau ʼe tou fiafia pea ʼe fia logo te hahaʼi ki tatatou logo. ʼE fakaloto mālohiʼi tatou e te fiafia ke tou faʼa kātaki. (Neh. 8:10; Hep. 12:2) Ko te faʼahi ʼaē ʼe maʼuhiga tāfito, heʼe ko tatatou tauhi fakafiafia ʼe ina faka kolōlia ia Sehova. Koia tou “tauhi kia Sehova ʼaki te loto fiafia.”—Pes. 100:2.