Ke Lahi Tokotou Fiafia ʼi Te Fai Faka Mafola
1 ʼE koutou fiafia koa ʼi takotou faka mafola te logo lelei? Kapau ʼe mole tou nofo tokaga, pea ʼe feala ke tou matataku ʼi te fai faka mafola ʼi te mālama agakovi ʼaē ʼe tou maʼuʼuli ai, ʼo puli ai totatou fiafia. Tahi ʼaē meʼa, ʼe feala ke tou lotovaivai mokā tou faka mafola ʼi he telituale ʼe mole tali ai e te hahaʼi te logo ʼaē ʼe tou tala. Koteā te ʼu tokoni ʼaoga ʼaē ʼe feala ke tou mulimuli kiai ke lahi ai totatou fiafia ʼi te faka mafola?
2 Tou Loto Falala: ʼE tokoni moʼoni kia tatou te loto falala. Moʼo maʼu te taʼi falala ʼaia, tou metitasio ki te pilivilesio lahi ʼaē ke tou “kauga gaue [mo] te Atua.” (1 Ko. 3:9) ʼE toe kau Sesu mo tatou ʼi te fakahoko ʼo te gāue ʼaia. (Mat. 28:20) Pea ʼe lagolago kia tatou ʼaki tana foʼi solia ʼaselo. (Mat. 13:41, 49) Koia tou falala ko tatatou ʼu faiga ʼe takitaki e te ʼAtua. (Apk. 14:6, 7) Koia tatau aipe peʼe mole tali lelei e ʼihi hahaʼi tatatou gāue, kae ʼe tou fiafia lahi ʼuhi ko te takitaki fakaʼatua ʼo tatatou gāue!
3 Tou Teuteu Lelei: Ko he teuteu lelei ʼe toe tokoni foki ki tatatou fiafia. ʼE mole ʼaoga ke tou fai he toe teuteu lahi ki te minisitelio. ʼE kita fakaʼaogaʼi he ʼu kiʼi minuta moʼo vakaʼi he puani ʼe kita palalau anai kiai, ʼi te ʼu nusipepa foʼou peʼe ʼi te tufa ʼo te māhina. Koutou fakaʼaogaʼi te ʼu faʼifaʼitaki ʼo Te Minisitelio ʼi te alatike “He ʼu Manatu ʼo ʼUhiga Mo Te ʼu Nusipepa.” Vakaʼi te pepa ʼaē ʼe ʼalutahi mo Te Minisitelio ʼo Sanualio 2002, “He ʼu Palalau Ki Te Fai Faka Mafola,” peʼe koutou kumi he ʼu ʼuluaki palalau lelei ʼi te kaupepa Te ʼu Tokoni Ki Te ʼu Fai Palalau Faka Tohi-Tapu. Kapau ʼe ʼi ai he fehuʼi ʼe lagaʼi māhani e te hahaʼi pea ʼe faigataʼa hakotou tali kiai, koutou teuteuʼi he tali ʼe fakaʼapaʼapa anai ki tanatou fehuʼi, pea mo koutou palalau ki he manatu ʼe lagi ina fia ʼiloʼi anai. Moʼo fai te faʼahi ʼaia, ʼe ʼaoga ʼaupito te kaupepa Te ʼu Tokoni Ki Te ʼu Fai Palalau Faka Tohi-Tapu. Kapau ʼe tou fakaʼaogaʼi te ʼu tokoni ʼaia pea ʼe tou maʼu anai te falala ʼaē ʼe ʼaoga ke tou faka mafola ʼaki he loto fiafia.
4 Tou Faikole Fakamalotoloto: ʼE maʼuhiga te faikole moʼo taupau tatatou fiafia. Mai tona ʼuhiga ʼaē ʼe tou fai te gāue ʼa Sehova, koia ʼe tonu ai ke tou kolekole kia te ia tona laumālie, heʼe tou maʼu ai te fua ʼaē ko te fiafia. (Kal. 5:22) ʼE tuku mai anai e Sehova te mālohi ke tou haga fai tatatou faka mafola. (Filp. 4:13) Ko tatatou faikole ʼo ʼuhiga mo totatou minisitelio, ʼe lava tokoni kia tatou ke tou fiafia mokā tou felāveʼi mo he ʼu faigataʼaʼia ʼi te gāue ʼaia. (Gaue 13:52; 1 Pet. 4:13, 14) Kapau ʼe tou matataku, pea ʼe lava tokoni mai te faikole ke tou maʼu te lototoʼa pea mo te fiafia.—Gaue 4:31.
5 Tou Kumi He ʼu Fealagia: ʼE moʼoni, ko tatatou minisitelio ʼe fakafiafia tāfito mokā tou lava maʼu te hahaʼi pea mo tou fai faka mafola age kia nātou. ʼE lagi lelei anai takotou minisitelio, mo kapau ʼe koutou fetogitogi tokotou ʼu hola faka mafola ʼi te ʼu ʼapi, lagi ʼi te fakaʼosi ʼo te hili hoʼatā, peʼe ʼi te kua kamata afiafi. ʼE koutou felāveʼi tuʼumaʼu mo te hahaʼi mokā koutou haʼele ʼi te ala, mokā koutou faifakatau, mokā koutou toʼo te ka, peʼe ka koutou haʼele ʼi he ʼu ʼōloto ʼi tai. He koʼe ʼe mole koutou teuteuʼi he ʼu kiʼi ʼuluaki palalau nounou, pea ke koutou ʼolo ʼo palalau ki te hahaʼi ʼaē ʼe koutou sio ʼe nātou tali lelei? Peʼe lagi ʼi ai hakotou gāue papālagi, peʼe koutou gāue ʼi he faleako faka puleʼaga, ʼaē ʼe koutou fai palalau ai mo te hahaʼi ʼi te ʼaho fuli. ʼE koutou maʼu anai he fealagia ke koutou fagonogono, mo kapau ʼe koutou lagaʼi he fai palalau ʼo ʼuhiga mo te Tohi-Tapu, ʼe fia logo kiai he tahi. ʼE koutou maʼu anai he ʼu tokoni lelei ʼi te ʼuluaki pasina ʼo te pepa ʼaē ʼe ʼalutahi mo Te Minisitelio ʼo Sanualio 2002. ʼAki te ʼu faiga fuli ʼaia ʼe feala ai anai ke lahi tokotou fiafia ʼi te fai faka mafola.
6 ʼE maʼuhiga ke tou taupau totatou fiafia, heʼe tokoni mai ke tou faʼa kātaki! Kapau ʼe tou fai feiā, pea ʼe tou maʼu anai he fakapale lahi mokā fakaʼosi anai te gāue ʼaia ʼaē ka mole toe fai. ʼAki te ʼamanaki ʼaia, ʼe lahi ai totatou fiafia ʼi te fai faka mafola.—Mat. 25:21.