Tou Faka Maʼuhigaʼi Fuli Ia Sehova Pea Mo Tona ʼAlo
Ke Lahi Te ʼu Lelei Ka Maʼu ʼe Nātou Fuli ʼAē ʼe Kau Ki Te Fakamanatu ʼi Te ʼAho 8 ʼo ʼApelili
1 Ko ai ia ʼaho nei ʼaē ʼe faka maʼuhigaʼi tāfito? Ko nātou ʼaē ʼe ʼiloa ʼi te malamanei ʼuhi ko te ʼu meʼa ʼaē neʼe nātou fai. Kae ʼe lahi te ʼu ʼaluʼaga ʼe galoʼi vave ai tanatou ʼu gāue. Kae e feafeaʼi ki te ʼu gāue ʼaē ʼe fua lelei moʼoni ki te hahaʼi fuape? ʼE tou sio anai ki te gāue ʼaē ʼe lahi tokotahi ʼi te ʼu gāue ʼaia mo kapau ʼe tou kau ki te Taumafa ʼo te Afiafi ʼa te ʼAliki, ʼi te ʼaho 8 ʼo ʼApelili 2001 ʼi te ʼosi tō ʼo te laʼā.
2 Ko ai ʼaē ʼe tau ke faka maʼuhigaʼi tāfito? ʼE tali fēnei e te Tohi-Tapu: “E ke taau, [“Sehova,” MN ] . . . ke ke tali te kololia, mo te fakaapaapa pea mo te mafimafi, koteuhi nee ke fakatupu ia meafuape.” (Apk. 4:11) ʼI tona ʼuhiga Tupuʼaga, ko Sehova ʼe ko te Tuʼi ʼAliki ʼo te ʼatulaulau. ʼE mole gata anai ʼi he temi tona faka maʼuhigaʼi!—1 Tim. 1:17.
3 Ko Sesu Kilisito, te ʼAlo ʼo te ʼAtua, neʼe ina fai te ʼu gāue maʼuhiga ke maʼu ai e te malamanei he ʼu tapuakina heʼegata. Neʼe ina faʼifaʼitakiʼi lelei ʼaupito ia tana Tāmai. (Soa. 5:19) Ko tana fakalogo lelei pea mo tana gāue agatonu neʼe ina fakaliliu ko he tahi ʼe “taau . . . [tana] tali o te mafimafi, mo te koloa, mo te poto, mo te malohi, mo te fakaapaapa, mo te kololia pea mo te vikiviki.” (Apk. 5:12) Neʼe faka maʼuhigaʼi ia ia e tana Tāmai ʼo ina fakanofo Hau. (Pes. 2:6-8) Kia tatou ʼe tou maʼu anai te faigamālie ke tou faka maʼuhigaʼi te Tāmai pea mo tona ʼAlo ʼo tou kau ki te Taumafa ʼo te Afiafi ʼa te ʼAliki ʼi te ʼaho 8 ʼo ʼApelili 2001.
4 Meʼa fakaʼofaʼofa foki heʼe tokosiʼi te hahaʼi ʼi te hisitolia ʼo te tagata, neʼe nātou faka maʼuhigaʼi ia Sehova pea mo tona ʼAlo. ʼI ʼihi temi, māʼia mo Iselaele, te hahaʼi ʼa te ʼAtua ʼo te temi muʼa, neʼe nātou fakaʼaoʼaoganoa ʼi tanatou tauhi kia Sehova. Kae neʼe mole ko he aga fakaʼapaʼapa ʼaia. (Mal. 1:6) Ke tou maʼu te fakaʼapaʼapa ʼaē ʼe lelei, ʼe tonu ke tou maʼu te fakalogo agatonu ʼaē ʼe fakatafito ki te ʼofa pea mo he loto fakafetaʼi ki te ʼu meʼa fuli ʼaē neʼe fai maʼa tatou e Sehova pea mo tona ʼAlo. Kapau ʼe tou fakahā te faka maʼuhiga ʼaia pea mo te fakaʼapaʼapa ʼaia, pea ko tona faka ʼuhiga ʼe tou manavasiʼi mo tou fakaʼapaʼapa, pea mo tokagaʼi ia Sehova pea mo Sesu ʼi totatou ʼu ala fuli. ʼE faiga e te kokelekasio ke ina akoʼi pea mo tokoni ki te hahaʼi ke nātou fai mo nātou te faʼahi ʼaia.
5 Ko He Lakaga Makehe Ke Tou Fakahā Ai ʼe Nā Maʼuhiga Kia Tatou: Ko te Fakamanatu ʼe ko te fakatahi ʼaē ʼe maʼuhiga ʼaupito maʼa te hahaʼi ʼa Sehova ʼi te taʼu fuli. Ko nātou fuli ʼaē ʼe nātou fia tauhi kia Sehova pea mo faka maʼuhigaʼi ia ia ʼe tonu ke nātou kau kiai. (Lu. 22:19) ʼE mātou fakaʼamu, ʼo hilifaki ki te toko 6 miliona kau Fakamoʼoni ʼaē ʼe fai faka mafola, ke kaugamālie te hahaʼi ʼaē ka nātou ʼōmai ki te toʼotoʼoga ʼaia, ke laka atu ʼi te toko 14 miliona. ʼE ko he faigamālie lelei ʼaia ke tou faka maʼuhigaʼi totatou Tāmai ʼaē ʼi selo! Logola ʼi te toʼotoʼoga ʼaia ʼe tou tokagaʼi tāfito ai ia Sesu, kae ko te faka maʼuhigaʼi pea mo te fakaʼapaʼapa ki te meʼa ʼaē neʼe ina fai, ʼe ina faka kolōliaʼi ai te Tāmai, ʼaē neʼe ina momoli ifo ia ia.—Soa. 5:23.
6 Koteā ʼaē ʼe feala ke tou fai moʼo lagolago ki te lakaga makehe ʼaia? ʼE feala ke tou tokoni ki te hahaʼi foʼofoʼou ke nātou mahino katoa ki te faʼahi ʼaia. Koutou uga nātou ke nātou kau kiai, pea kapau ʼe ʼaoga, koutou foaki ʼaki te ʼofa takotou tokoni ke feala hanatou ʼōmai. Koutou fakamahino age te fakatuʼutuʼu ʼo te faiakonaki. Koutou faiga ke nātou feʼiloʼiʼaki mo ʼihi. Ko te ʼu meʼa ʼaē ka nātou sio pea mo logo kiai ʼe feala anai ke ina uga nātou ke nātou fia fakatahi mo tatou moʼo faka maʼuhigaʼi ia Sehova.
7 ʼAua naʼa koutou meʼa noaʼi te mālohi ʼo te fono ʼaia. Neʼe ʼui fēnei e te tūpulaga ʼe ako ʼi te univelesitē: “Neʼe lahi taku kau ki te ʼu Fai Komunio ʼi taku lotu, kae ʼe kehe ʼaupito te faʼahi ʼaenī. ʼE ʼau sio ʼe hage ko te meʼa ʼaē ʼe ʼui tonu e te Tohi-Tapu, pea maʼa ʼaku ʼe koutou maʼu te moʼoni.” Neʼe kamata kau tuʼumaʼu ki te ʼu fono pea mole fualoa, neʼe papitema.
8 Tou Tokoni Kia Nātou Foʼou Ke Nātou Tuputupu: Koutou tokagaʼi te hahaʼi foʼou ʼaē ʼe nātou kau ki te Fakamanatu, pea mo koutou ʼaʼahi fakavilivili moʼo vakaʼi te ʼu manatu lelei ʼaē neʼe nātou ako pea mo sio kiai. Koutou fakahā age kia nātou ʼe ʼi ai te tahi ʼu fono, ʼe feala ke tuputupu ai tanatou ʼatamai mālama ʼo ʼuhiga mo te Tohi-Tapu. Koutou vakaʼi te kapite 17 ʼo te tohi Te ʼAtamai Mālama, “Ke Tou Maʼu Te Fīmālie ʼi Te Hahaʼi ʼa Te ʼAtua,” heʼe nātou sio ai anai ki te ʼu meʼa kai fakalaumālie kehekehe ʼaē ʼe feala ke maʼu ʼi te kokelekasio, ʼaē ʼe faigafua hanatou maʼu. Koutou fakatuʼutuʼu ke koutou sioʼi mo nātou te foʼi fime viteo Les Témoins de Jéhovah : un nom, une organisation ke feala ai hanatou sio tonu ki te logo tahi, mo te fiafia, pea mo te faʼafai ʼa te hahaʼi ʼa Sehova!
9 ʼE maʼuhiga kia nātou ʼaē ʼe fia logo ke nātou ʼiloʼi peʼe lava feafeaʼi hanatou faka maʼuhigaʼi pea mo fakaʼapaʼapa kia Sehova. Koutou fakamahino age kia nātou ko te faikole fakamalotoloto ʼe leleiʼia e Sehova, pea ʼe maʼu tuʼumaʼu ai te fakaloto fīmālie ʼi te faʼahi fakalaumālie. (1 Soa. 5:14) ʼI takotou fakaʼaogaʼi te ako 8 ki te 12 ʼo te kaupepa Fakamaʼua, koutou fakahā age te aga ʼaē ʼe ina faka maʼuhigaʼi ia Sehova. ʼI takotou fai palalau ki te meʼa ʼaē ʼe ʼui ʼi te kaupepa Te Kau Fakamoʼoni ʼa Sehova ʼi te pasina 30 ki te 31, koutou fakaloto mālohi te hahaʼi foʼou ke nātou fakakaukau ʼo ʼuhiga mo te fealagia ʼaē ke nātou faka maʼuhigaʼi ia Sehova mo kapau ʼe nātou kau ki te gāue fai faka mafola.
10 Ko totatou loto fakafetaʼi ki te sakilifisio ʼo Sesu pea mo totatou pilivilesio ʼaē ke tou tauhi ohage ko hana ʼu tisipulo, ʼe faka maʼuhigaʼi ai te Tāmai pea ʼe maʼu ai te ʼu tapuakina e te hahaʼi. Neʼe fakapapau fēnei e Sesu: “Kapau ʼe fia kaugana he tahi kia te ʼau, ʼe faka maʼuhigaʼi anai ia ia e te Tāmai.”—Soa. 12:26, MN.