Ko Koutou Ko “He Mataga”!
1 Neʼe tohi fēnei e te ʼapositolo ko Paulo: “Kua matou liliu ko he mataga ki te kau aselo mo te malama-nei pea mo te hahai.” (1 Ko. 4:9) Koteā te faka ʼuhiga ʼo te ʼu palalau ʼaia, pea ʼe tonu ke malave feafeaʼi te faʼahi ʼaia kia tatou ia ʼaho nei ʼi totatou minisitelio?
2 Ko te kupu “he mataga,” neʼe ina fakamanatuʼi ki he Kolonito te meʼa ʼaē neʼe hoko ʼi te ʼu malaʼe faigaoʼi ʼi Loma, ʼaē neʼe fakahāhā ai te hahaʼi pilisoni kia mata ʼo te toko lauʼi afe hahaʼi ʼi muʼa ʼo tonatou tāmateʼi. ʼO toe feiā pe, ko te tokolahi—te hahaʼi pea mo te kau ʼaselo—neʼe nātou mamata ki te ʼu mamahi ʼaē neʼe fai ki te kau Kilisitiano ʼo te ʼuluaki sēkulō, ʼuhi ko tanatou fakamoʼoni ki te Puleʼaga. (Hep. 10:32, 33) Ko tanatou nonofo agatonu ʼaia neʼe malave ki te hahaʼi tokolahi ʼaē neʼe mamata kia nātou, ohage pe ko te malave ʼo tatatou faʼa kātaki ki te hahaʼi ʼi te malamanei ia ʼaho nei. Ko ai ʼaē ʼe nātou mamata kia tatou?
3 Te Malamanei Pea Mo Te Hahaʼi: ʼI ʼihi temi ʼe tā ʼi te ʼu sulunale te ʼu logo ki te ʼu gāue ʼa te hahaʼi ʼa Sehova. Logola ʼe tou loto fakafetaʼi ʼo ʼuhiga mo te ʼu logo lelei pea mo moʼoni ʼaē ʼe tā ʼo ʼuhiga mo tatatou gāue, kae ʼe tou toe ʼiloʼi ʼi ʼihi temi ʼe fai te ʼu fasituʼu e te hahaʼi ʼaē ʼe nātou valokiʼi tatou. Kae “ ʼi te laukovi pea mo te fakafetaʼi,” ʼe tonu ke tou haga fakahā ai ko tatou ko he ʼu minisi ʼa te ʼAtua. (2 Ko. 6:4, 8, MN ) Ko te hahaʼi fakamalotoloto ʼaē ʼe mamata kia tatou, ʼe nātou tokagaʼi lelei ko tatou ko te ʼu tisipulo moʼoni ʼa Sesu Kilisito.
4 Te Kau ʼAselo: ʼE toe sioʼi tatou e te ʼu laumālie. Ko te Tevolo pea mo tana kau temonio ʼe nātou mamata—ʼaki he “hauhau fakamataku,” heʼe nātou fia tāʼofi tatatou “fakamooni [kia] Sesu.” (Apk. 12:9, 12, 17) ʼE mamata te ʼu ʼaselo agatonu ʼa te ʼAtua pea mo nātou fiafia, māʼia mokā fakahemala he tagata agahala e tahi. (Lu. 15:10) ʼE tou lotomālohi heʼe tou ʼiloʼi maʼa te kau ʼaselo, ko tatatou gāue ʼe maʼuhiga pea mo ʼaoga ke fai ʼi te kele ʼi te temi nei!—Apk. 14:6, 7.
5 Ka koutou felāveʼi mo te ʼu fakafeagai peʼe koutou manatu ʼe mole he fua ʼo takotou minisitelio, pea koutou manatuʼi ʼe sioʼi koutou. Ko takotou faʼa kātaki agatonu ʼe ina fakahā ai takotou agatonu. Ki muli age, ko takotou “tau lelei [ʼi] te tui” ʼe ina faka fealagia anai ke koutou “puke te mauli heegata.”—1 Tim. 6:12.