Te Kau ʼĀselo—Koteā ʼAē ʼe Nātou Fai Maʼa Tatou?

ʼI TANA fakamatala ʼo tana sio ʼaē ki te kau ʼāselo ʼo te famili ʼo te ʼAtua, neʼe tohi fēnei e te polofeta ko Taniela: “Ko te toko afe mo afe [kau ʼāselo] neʼe tauhi [ki te ʼAtua] pea neʼe toko hogofulu afe tuʼa hogofulu afe neʼe tutuʼu ʼi muʼa ʼo tona ʼafioʼaga.” (Taniela 7:10) ʼE fakahā ʼi te vaega ʼaia pe koʼe neʼe fakatupu e te ʼAtua ia te kau ʼāselo. ʼE nātou tauhi kiā te ia pea mo nātou fakahoko tana ʼu fakatotonu.

ʼE fakaʼaogaʼi e te ʼAtua te kau ʼāselo moʼo fai he ʼu gāue maʼa te hahaʼi ʼi te kele. ʼE tou vakaʼi anai peʼe ina fakaʼaogaʼi feafeaʼi ia nātou moʼo fakaloto mālohiʼi pea mo puipui tana hahaʼi, moʼo foaki he ʼu logo ki te hahaʼi, pea mo fakahoko tana ʼu fakamāu ki te hahaʼi agakovi.

Ko Te Kau ʼĀselo ʼe Nātou Fakaloto Mālohi Pea Mo Puipui

Talu te sio ʼa te kau ʼāselo ki te fakatupu ʼo te kele pea mo te ʼuluaki tagata mo te ʼuluaki fafine, neʼe nātou leleiʼia te hahaʼi ʼaē ʼe māʼuʼuli ʼi te kele. ʼI tana fakatātā ia ia ki te poto, ko Sesu Kilisito ʼi tana maʼuli ʼi selo ʼi muʼa ʼo tana tupu tagata, neʼe ina ʼui fēnei: “Ko te ʼu meʼa ʼaē neʼe au ʼofa kiai neʼe ko te ʼu meʼa ʼaē neʼe nofo mo te ʼu foha ʼo te tagata.” (Tāʼaga Lea 8:31) Pea ʼe fakahā mai ʼi te Tohi-Tapu ko te ‘kau ʼāselo ʼe nātou fia mahino’ ki te ʼu meʼa ʼo ʼuhiga mo Kilisito pea mo te ka haʼu ʼaē neʼe fakahā age ki te kau polofeta ʼa te ʼAtua.​—1 Petelo 1:​11, 12.

ʼI te fakalaka ʼo te temi, neʼe sio te kau ʼāselo ko te tokolahi ʼi te hahaʼi ʼi te kele neʼe mole nātou tauhi ki tonatou Tupuʼaga ʼofa. ʼE mahino ia neʼe lotomamahi lahi ai te kau ʼāselo agatonu! ʼI te tahi faʼahi, ka fakahemala he tagata agahala pea mo toe liliu kiā Sehova, “e i ai te fakafiafia ia mua o te kau aselo.” (Luka 15:10) ʼE tōkakaga te kau ʼāselo ke maʼuli lelei ia nātou ʼaē ʼe nātou tauhi ki te ʼAtua, pea neʼe fakaʼaogaʼi tuʼa lahi ia nātou e Sehova moʼo fakaloto mālohiʼi pea mo puipui tana kau kaugana agatonu ʼi te kele. (Hepeleo 1:14) Tou vakaʼi he ʼu faʼifaʼitaki.

Ko te ʼu ʼāselo e toko lua neʼe nā tokoni ki te tagata agatonu ko Lote pea mo tona ʼu ʼofafine ke nātou hāo ʼi te fakaʼauha ʼo te ʼu kolo agakovi ʼo Sotoma pea mo Komola, ʼo nā fakamavae ki tuʼa ia nātou mai te ʼu kolo ʼaia.a (Senesi 19:​1, 15-26) Hili kiai ni ʼu sēkulō, neʼe lī te polofeta ko Taniela ki te luo ʼo te ʼu laione, kae neʼe mole lavea ia. Koteā tona tupuʼaga? Neʼe ina ʼui fēnei: “Ko toku ʼAtua neʼe ina fekauʼi mai tana ʼāselo pea neʼe ina māpunuʼi te gutu ʼo te ʼu laione.” (Taniela 6:22) Ko te kau ʼāselo neʼe nātou tokoni kiā Sesu ʼi te kamata ʼo tona minisitelio ʼi te kele. (Maleko 1:13) Pea ʼi muʼa ʼo te mate ʼa Sesu, neʼe hā te ʼāselo kiā te ia pea “neʼe ina fakaloto mālohiʼi ia ia.” (Luka 22:​43, MN ) ʼE mahino ia neʼe ko he tapuakina kiā Sesu te tokoni ʼaia ʼa te kau ʼāselo ʼi te ʼu temi maʼuhiga ʼaia ʼo tona maʼuli! Ko te tahi ʼāselo neʼe ina faka ʼāteainaʼi te ʼapositolo ko Petelo mai te fale pilisoni.​—Gaue 12:​6-11.

Iā ʼaho nei, ʼe puipui koa tatou e te kau ʼāselo? Kapau ʼe tou tauhi kiā Sehova ʼo mulimuli ki tana Folafola, pea ʼe tou tui papau ko tana kau ʼāselo mālolohi pea mo fakapulipuli ʼe nātou puipui anai tatou. ʼE fakapapau fēnei mai ʼi te Tohi-Tapu: “ ʼE nofo te ʼāselo ʼa Sehova ʼo ʼātakai ia nātou ʼaē ʼe nātou manavasiʼi kiā te ia, pea ʼe ina hāofaki ia nātou.”​—Pesalemo 34:⁠7.

Kae ʼe tonu ke mahino kiā tatou ʼe gāue tāfito te kau ʼāselo ki te ʼAtua, kae mole ki te hahaʼi. (Pesalemo 103:​20, 21) ʼE nātou fakalogo ki te ʼu fakatotonu ʼa te ʼAtua, kae mole ki te ʼu kolekole ʼa te hahaʼi. Koia ʼe tonu ke tou kole tokoni kiā Sehova ʼAtua tokotahi pe, kae mole tou kole ki te kau ʼāselo. (Mateo 26:53) ʼE mahino ia, ʼuhi heʼe mole tou lava sisio ki te kau ʼāselo, ʼe mole feala ke tou ʼiloʼi lelei tonatou fakaʼaogaʼi e te ʼAtua moʼo tokoni ki te hahaʼi ʼi te ʼu faʼahi kehekehe. Kae ʼe tou ʼiloʼi ko Sehova ʼe “ina fakahā tona mālohi kiā nātou ʼaē ʼe kātoa tonatou loto kiā te ia.” (2 Fakamatala 16:9; Pesalemo 91:11) Pea ʼe tou tui papau “tatau aipe peʼe koteā he meʼa ʼe tou kole ʼo mulimuli ki tona finegalo, [ko te ʼAtua] ʼe fagono ia kiā tatou.”​—1 Soane 5:​14, MN.

ʼE toe ʼui mai ʼi te Tohi-Tapu ko tatatou ʼu faikole pea mo tatatou tauhi ʼe tonu ke fai ki te ʼAtua tokotahi pe. (Ekesote 20:​3-5; Pesalemo 5:​1, 2; Mateo 6:9) ʼE fakaloto mālohiʼi tatou e te kau ʼāselo agatonu ke tou fai feiā. Ohage la, neʼe fia tauhi ia te ʼapositolo ko Soane ki te ʼāselo, pea neʼe tāʼofi ia ia e te ʼāselo, ʼo ina ʼui fēnei: “Tokaga! ʼAua naʼa ke fai te meʼa ʼaia! . . . Atolasio ki te ʼAtua.”​—Apokalipesi 19:​10, MN.

ʼE Foaki e Te Kau ʼĀselo Te ʼu Logo Mai Te ʼAtua

Ko te kupu “ ʼāselo” ʼe ko tona faka ʼuhiga ko “he ʼave logo,” pea ʼe ko te tahi faʼahi ʼaia ʼo te tauhi ʼaē ʼe fai e te kau ʼāselo ki te ʼAtua, ko tana kau ʼave logo. Ohage la, “nee fekaui mai te Atua te aselo ko Kapeliele ki he kolo o Kalilea nee higoa ko Nasaleti.” Koteā tona tupuʼaga? Ke ina fakahā age ki te fafine finemui ko Malia, logola tana taupoʼou, kae ʼe faitama anai pea ʼe ina fānauʼi anai he tama ʼe tonu ke ina fakahigoaʼi ko Sesu. (Luka 1:​26-31) Neʼe toe fekauʼi te tahi ʼāselo ki te ʼu tagata tauhi manu ʼi te ʼu gāueʼaga, moʼo fakahā age kiā nātou ia te kua tupu ʼa “Kilisito te Aliki.” (Luka 2:​8-11) ʼO toe feiā aipe, ko te kau ʼāselo neʼe nātou foaki he ʼu logo mai te ʼAtua kiā Apalahamo, mo Moisese, mo Sesu pea mo ʼihi atu hahaʼi ʼe fakamatala ʼi te Tohi-Tapu.​—Senesi 18:​1-5, 10; Ekesote 3:​1, 2; Luka 22:​39-43.

Iā ʼaho nei, ʼe fakahoko feafeaʼi e te kau ʼāselo tanatou gāue ʼaē ko te kau ʼave logo ʼa te ʼAtua? Tou vakaʼi te gāue ʼaē neʼe fakakikite e Sesu ʼe fakahoko anai e tana kau tisipulo ʼi muʼa ʼo te fakaʼosi ʼo te tuʼu ʼaenī. Neʼe ina ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni ia ki te ʼu puleʼaga kātoa; pea hoko mai ai leva te fakaʼosi.” (Mateo 24:​3, 14, MN ) ʼI te taʼu fuli, ʼe fakaʼaogaʼi e te kau Fakamoʼoni ʼa Sehova te ʼu hola e lauʼi miliale moʼo faka mafola te logo lelei ʼo te Puleʼaga ʼa te ʼAtua. Kae ʼe koutou ʼiloʼi koa ʼe toe kau mo te kau ʼāselo ki te gāue ʼaia? Neʼe talanoa ia te ʼapositolo ko Soane ki te meʼa neʼe hā kiā ia, ʼo ina ʼui fēnei: “Neʼe au sio ki te tahi ʼāselo . . . pea neʼe ʼi ai tana logo lelei ʼe heʼegata ke ina kalagaʼi ohage he evaselio kiā nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe.” (Apokalipesi 14:​6, 7, MN ) ʼE fakahā lelei ʼi te vaega ʼaia te gāue maʼuhiga ʼaupito ʼaē ʼe fakahoko e te kau ʼāselo maʼa te hahaʼi iā ʼaho nei.

ʼE sio ia te kau Fakamoʼoni ʼa Sehova ʼe takitaki moʼoni e te kau ʼāselo tanatou fai faka mafola ʼi te ʼu ʼapi. ʼI ʼihi temi ʼe nātou felāveʼi mo he ʼu hahaʼi neʼe hoki ʼosi age pe tanatou faikole ke tokoni age he tahi kiā nātou ke nātou mahino ki te ʼu fakatuʼutuʼu ʼa te ʼAtua. ʼAki te takitaki ʼaia ʼa te kau ʼāselo pea mo te gāue ʼa te kau Fakamoʼoni, ko te toko teau afe hahaʼi ʼi te taʼu fuli ʼe nātou ʼiloʼi ai ia Sehova. ʼOfa pe ke fua lelei kiā koutou te gāue ʼaē ʼe takitaki e te kau ʼāselo, moʼo hāofaki te maʼuli ʼo te hahaʼi.

ʼE Fakahoko e Te Kau ʼĀselo Te Fakamāu ʼa Te ʼAtua

Logola ʼe mole feala ke nātou fakamāuʼi te hahaʼi, kae ʼe nātou fakahoko te ʼu fakamāu. (Soane 5:22; Hepeleo 12:​22, 23) Neʼe nātou fakahoko te ʼu fakamāu ʼa te ʼAtua ʼi te temi muʼa. Ohage la, neʼe fakaʼaogaʼi e te ʼAtua tana kau ʼāselo moʼo tauʼi te kau Esipito ʼi te temi muʼa, ʼaē neʼe nātou faka popūlaʼi te kau Iselaele. (Pesalemo 78:49) Pea ʼi te pō pe e tahi, ko “te ʼāselo ʼa Sehova” neʼe ina matehi te toko teau valugofulu-ma-nima afe kau solia neʼe nātou fakafeagai ki te hahaʼi ʼa te ʼAtua.​—2 Hau 19:⁠35.

Pea ʼi te ka haʼu, ʼe fakahoko anai e te kau ʼāselo te fakamāu ʼa te ʼAtua. ʼE haʼu anai Sesu “mo tana kau ʼāselo mālohi, ʼi he afi ulo, mokā ina fakahoko anai te lagavaka kiā nātou ʼaē ʼe mole nātou ʼiloʼi te ʼAtua pea mo nātou ʼaē ʼe mole fakalogo ki te logo lelei.” (2 Tesalonika 1:​7, 8, MN ) Kae ko te fakaʼauha ʼaia ʼe fakahoko pe anai kiā nātou ʼaē ʼe mole nātou tali te logo ʼaē ʼe lagolago te kau ʼāselo ki tona faka mafola ʼi te temi nei ʼi te malamanei kātoa. Ko nātou ʼaē ʼe nātou kumi te ʼAtua pea mo nātou fakalogo ki te ʼu akonaki ʼa te Tohi-Tapu, ʼe hāofaki anai nātou.​—Sofonia 2:⁠3.

ʼE tou loto fakafetaʼi lahi ki te kau ʼāselo agatonu, ʼaē ʼe nātou fakahoko tuʼumaʼu te ʼu fakatotonu ʼa te ʼAtua! ʼE fakaʼaogaʼi nātou e Sehova moʼo tokoni pea mo puipui tana kau kaugana agatonu ʼi te kele. ʼE tou loto fīmālie ai heʼe ʼi ai te ʼu laumālie agakovi ʼe fakahigoa ko te ʼu temonio ʼe nātou fia gaohi koviʼi tatou.

Ko Ai Te Kau Temonio?

ʼI te ʼu 15 sēkulō ʼaē neʼe hoa atu ki te kākāʼi e Satana ia Eva ʼi Eteni, neʼe tokagaʼi e te kau ʼāselo ʼa te ʼAtua ko Satana te Tevolo neʼe ina lava fakamaliu te hahaʼi fuli mai te ʼAtua, gata pe ki ʼihi kau agatonu, ohage ko Apele, mo Enoke, pea mo Noe. (Senesi 3:​1-7; Hepeleo 11:​4, 5, 7) Ko ʼihi kau ʼāselo neʼe nātou mulimuli ia Satana. ʼE ʼui ʼi te Tohi-Tapu ko te ʼu laumālie ʼaia ʼaē neʼe nātou talagataʼa “ia aho o Noe.” (1 Petelo 3:​19, 20) Neʼe hā feafeaʼi tanatou talagataʼa ʼaia?

ʼI te temi ʼo Noe, ko te kau ʼāselo agatuʼu, ʼe mole ʼiloʼi pe neʼe nātou tokofia, neʼe nātou mavae ʼi te famili ʼa te ʼAtua ʼaē ʼi selo, kae nātou hihifo mai ki te kele, ʼo kofuʼi tonatou ʼu sinoʼi tagata. He koʼe neʼe nātou fai ia te faʼahi ʼaia? ʼE tupu ko tanatou holi ke nātou fai ni ʼu felāveʼi fakasino mo te hahaʼi fafine. Neʼe tutupu ake ai tanatou ʼu fānau ʼaē neʼe higoa ko te kau Nefilime, neʼe ko he ʼu tagata lalahi ʼaupito pea mo agamālohi. Tahi ʼaē meʼa, “ko te agakovi ʼa te tagata [neʼe] kua lahi ʼaupito ʼi te kele pea ko te ʼu fakakaukau fuli ʼo tona loto neʼe kovi tuʼumaʼu pe ia.” Kae neʼe mole tuku e Sehova ʼAtua ke hoko atu te agakovi ʼaia ʼa te hahaʼi. Neʼe ina fakahoko te Tulivio, ʼo matehi fuli ai te hahaʼi agakovi pea mo te kau Nefilime. Neʼe gata pe ki te ʼu kaugana agatonu ʼa te ʼAtua neʼe hāofaki ʼi te Tulivio ʼaia.​—Senesi 6:​1-7, 17; 7:⁠23.

Neʼe hāo te kau ʼāselo agatuʼu ʼi te fakaʼauha ʼaē neʼe hoko ʼi te Tulivio. Neʼe nātou līʼaki tonatou ʼu sinoʼi tagata pea nātou toe liliu ki selo ʼi tonatou ʼuhiga ʼāselo. Ki muli age, neʼe fakahigoa nātou ko te kau temonio. Neʼe nātou lagolago kiā Satana te Tevolo, ʼaē ʼe fakahigoa ko “te pule o te faga temonio.” (Mateo 12:​24-27) Ohage ko tonatou pule, ʼe holi e te kau temonio ke tauhi te hahaʼi kiā nātou.

ʼE agamālohi te kau temonio, kae ʼe mole tonu ke tou mātataku kiā nātou. ʼE fakatuʼakoi tonatou mālohi. ʼI te toe liliu ʼa te kau ʼāselo talagataʼa ki selo, neʼe mole kei feala hanatou toe kau ki te famili ʼo te ʼAtua, tana kau ʼāselo agatonu. Kae neʼe mole kei nātou maʼu te mālama fakalaumālie mai te ʼAtua, pea ʼe nātou fakatalitali ki tonatou fakaʼauha ʼi te ka haʼu. Kae ʼe nātou nonofo ʼi te fakapōʼuli fakalaumālie, ʼaē ʼe higoa ko te Taletale. (2 Petelo 2:4) Neʼe tāʼofi nātou e Sehova ʼaki “he ʼu haʼi heʼegata,” ʼo nātou nonofo ai ʼi te fakapōʼuli fakalaumālie. Tahi ʼaē meʼa, ʼe mole kei feala ʼi te temi nei ke nātou toe kofuʼi he ʼu sinoʼi tagata.​—Suta 6.

Koteā ʼAē ʼe Tonu Ke Koutou Fai?

ʼE kei feala koa ki te kau temonio ke nātou fakahalaʼi te hahaʼi? Ei, ʼe nātou fakaʼaogaʼi he ʼu “kākā,” ohage ko tona fai e tonatou pule, ia Satana te Tevolo. (Efeso 6:​11, 12) Kae kapau ʼe tou maʼuliʼi te ʼu tokoni ʼa te Folafola ʼa te ʼAtua, ʼe feala anai ke tou tutuʼu mālohi ʼo fakafeagai ki te kau temonio. Tahi ʼaē meʼa, ko nātou ʼaē ʼe ʼoʼofa ki te ʼAtua ʼe puipui nātou e te kau ʼāselo mālolohi.

ʼE maʼuhiga ʼaupito ke koutou ako ke koutou ʼiloʼi te ʼu fakamaʼua ʼa te ʼAtua ʼaē ʼe tuʼu ʼi te Tohi-Tapu, pea mo maʼuliʼi te ʼu meʼa ʼaē ʼe koutou ako! ʼE feala ke koutou ako he tahi atu ʼu faʼahi ʼo ʼuhiga mo te ʼu akonaki ʼa te Tohi-Tapu mo kapau ʼe koutou faka felogoi mo te kau Fakamoʼoni ʼa Sehova ʼi tokotou kolo, peʼe koutou faitohi kiā nātou ʼaē neʼe nātou tā te nusipepa ʼaenī. ʼE fiafia anai te kau Fakamoʼoni ʼa Sehova ʼi te ako te Tohi-Tapu mo koutou, pea ko te ako ʼaia ʼe mole totogi pea ʼe fai ʼi te temi ʼaē ʼe koutou loto kiai.

[Kiʼi nota]

[Talanoa ʼo te pasina 6]

ʼE TAHI NOFO TE KAU ʼĀSELO ʼI TONATOU TUʼULAGA

ʼE kaugamālie te kau ʼāselo ʼa Sehova, pea koʼeni tonatou ʼu tuʼulaga:

Ko te ʼāselo pule pea mo mālohi ʼaupito ʼe ko Mikaele te alekaselo, peʼe ko Sesu Kilisito. (1 Tesalonika 4:16; Suta 9) ʼE hoa kiā ia te kau selafimi, mo te kau kelupimi, pea mo te tahi kau ʼāselo.

Ko te kau selafimi ʼe nātou maʼu te tuʼulaga māʼoluga ʼi te fakatuʼutuʼu ʼa te ʼAtua. ʼE nātou tauhi iā muʼa ʼo te hekaʼaga fakahau ʼo te ʼAtua. Ko tanatou gāue ʼe ko te tala ia te maʼoniʼoni ʼo te ʼAtua pea mo taupau te maʼa fakalaumālie ʼo tana hahaʼi.​—Isaia 6:​1-3, 6, 7.

Ko te kau kelupimi ʼe nātou tutuʼu ia tafa ʼo te ʼafioʼaga ʼo te ʼAtua pea mo nātou lagolago ki te kolōlia ʼo Sehova.​—Pesalemo 80:1; 99:1; Esekiele 10:​1, 2.

Ko te tahi kau ʼāselo ʼe nātou fakafofoga ia Sehova, pea mo nātou fakahoko te finegalo ʼo te ʼAtua.

[Paki ʼo te pasina 6]

Ko te kau ʼāselo ʼe nātou fakahoko te fakamāu ʼa te ʼAtua