Ko Ai Te Kau ʼĀselo

NEʼE punamaʼuli ʼaupito te hau ʼo te puleʼaga mālohi ʼi te meʼa ʼaē neʼe sio kiai. Ko te ʼu tagata e toko tolu ʼaē neʼe tonu ke mamate he neʼe lī nātou ki te afi, kae neʼe hāofaki nātou. Ko ai ʼaē neʼe ina hāofaki nātou? Neʼe ʼui e te hau totonu ki te toko tolu tagata ʼaia neʼe hāofaki: “Manuʼia [tokotou] ʼAtua . . . ʼaē neʼe ina fekauʼi mai tana ʼāselo ke ina hāofaki tana ʼu kaugana ʼaē neʼe falala kiā te ia.” (Taniela 3:28) Ko te hau ʼaia ʼo Papiloni, ʼaē neʼe pule kua hili kiai te ʼu lauʼi taʼu e afe, neʼe sio ki te hāofaki neʼe fakahoko e te ʼāselo. Ko te ʼu lauʼi miliona hahaʼi ʼi te temi muʼa neʼe nātou tui ki te ʼu ʼāselo. Tokolahi iā ʼaho nei, ʼe nātou tui ʼe ʼi ai te kau ʼāselo pea mo nātou faka tui ʼe feala ke tokoni age te kau ʼāselo kiā nātou. Ko ai te kau ʼāselo pea ʼe nātou ʼōmai mai fea?

Ohage ko tona ʼui ʼi te Tohi-Tapu, ko te ʼu ʼāselo ʼe ko te ʼu laumālie, ohage pe ko te ʼAtua ʼe ko te Laumālie. (Pesalemo 104:4; Soane 4:24) ʼE hahaʼi ʼaupito te kau ʼāselo, ʼe nātou toko lauʼi miliona. (Apokalipesi 5:11) Pea ko nātou fuli ʼe nātou “lahi ʼi te mālohi.” (Pesalemo 103:20) Logola ʼe tatau te kau ʼāselo mo te hahaʼi, heʼe nātou logoʼi te ʼu meʼa ʼi tonatou loto pea mo maʼu te loto faʼitaliha, kae neʼe mole nātou māʼuʼuli ʼi te kele ʼi te kamata. Neʼe fakatupu nātou e te ʼAtua kua fualoa ki muʼa atu kae heʼeki ina fakatupu ia te ʼatulaulau, pea mo te Kele. ʼE ʼui ʼi te Tohi-Tapu, ʼi te temi ʼaē neʼe “fakatuʼu ai [e te ʼAtua] te kele . . . neʼe kalaga fakafiafia fakatahi ai te ʼu fetuʼu ʼo te uhu [te kau ʼāselo] pea ko te ʼu foha fuli ʼo te ʼAtua neʼe nātou fakavikiviki.” (Sopo 38:​4, 7) ʼE fakahigoaʼi te kau ʼāselo ko te ʼu foha ʼo te ʼAtua, he neʼe ko ia ʼaē neʼe ina fakatupu ia nātou.

He koʼe neʼe fakatupu e te ʼAtua te kau ʼāselo? Kapau ʼe ʼi ai hanatou gāue, pea koteā te gāue ʼaē ʼe nātou fai ki te hahaʼi? ʼE feala koa ke nātou tokoni mai kiā tatou iā ʼaho nei? Mai tona ʼaluʼaga ʼaē ʼe maʼu e te kau ʼāselo ia te loto faʼitaliha, neʼe ʼi ai koa he kau ʼāselo neʼe nātou muliʼi ia Satana te Tevolo pea mo nātou liliu ko te ʼu fili ʼo te ʼAtua? ʼE tou maʼu ʼi te Tohi-Tapu he ʼu tali moʼoni ki te ʼu fehuʼi ʼaia.