ʼE Lava Tokoni Feafeaʼi Atu Te Kau ʼAselo?

ʼE fakaha ʼi te Tohi-Tapu, ko te kau ʼaselo ʼi ʼihi temi ʼe natou puipui ʼihi kau atolasio moʼoni moʼo fakahoko ia te finegalo ʼo te ʼAtua. (Pesalemo 34:8) Ohage la:

• ʼI te temi ʼae neʼe maumauʼi ai e Sehova ia te ʼu kolo agakovi ko Sotoma mo Komola, neʼe tokoni ia te ʼu ʼaselo kia Lote mo tona kiʼi famili ke natou feholaki.—Senesi 19:1, 15-26.

• ʼI Papilone, ʼi te temi ʼae neʼe fakatuʼa ai ki te mate ia he ʼu tupulaga ʼe toko tolu ʼi he gutuʼumu kakaha, ko te ʼAtua neʼe ina “fekaui mai tana aselo pea nee ina haofaki ana tagata faifekau.”—Taniela 3:19-28.

• Hili te nofo ʼa te tagata faitotonu ko Taniela ʼi he po katoa ʼi te luo ʼo te ʼu laione, neʼe ina fakamahino neʼe hao ʼuhi he neʼe ‘fekauʼi mai e te ʼAtua tana ʼaselo ke ina tapunuʼi te gutu ʼo te ʼu laione.’—Taniela 6:16, 22.

NEʼE LAGOLAGO TE KAU ʼASELO KI TE ʼULUAKI KOKELEKASIO FAKAKILISITIANO

ʼI ʼihi temi ko te kau ʼaselo ʼave logo ʼa te ʼAtua neʼe natou tokoni moka neʼe ʼaoga, ki te ʼu gaue ʼa te ʼuluaki kokelekasio Fakakilisitiano moʼo fakahoko ia te finegalo ʼo Sehova. Ohage la:

• Neʼe avahi e te ʼaselo ia te ʼu matapa ʼo te fale pilisoni pea neʼe ina fakatotonu ki te kau apositolo ʼae neʼe pilisoni ai ke natou hoko atu tanatou faifakamafola ʼi te fale lotu.—Gaue 5:17-21.

• Neʼe fakatotonu e he ʼaselo ki te tagata faifakamafola ko Filipo ke alu ʼi te ʼala ʼae ʼe hifo mai Selusalemi ki Kasa ʼo faifakamafola ki he tagata Etiopea neʼe alu ki Selusalemi ʼo tauhi ai.—Gaue 8:26-33.

• ʼI te temi ʼae neʼe liliu ai ia natou ʼae mole Sutea ko he kau Kilisitiano, neʼe ha he ʼaselo ʼi he moemisi ki te pule solia Loma ko Kolenelio mo ina fakatotonu age ke ina pauʼi mai ia te apositolo ko Petelo ki tona ʼapi.—Gaue 10:3-5.

• ʼI te temi ʼae neʼe pilisoni ai ia te apositolo ko Petelo, neʼe ha age he ʼaselo kia ia mo ina taki ia ia ki tuʼa ʼi te fale pilisoni.—Gaue 12:1-11.

ʼE LAVA TOKONI FEAFEAʼI ATU TE KAU ʼASELO

ʼI te temi nei, ʼe mole he fakamoʼoni ʼe ha ai ʼe fakaʼaogaʼi e te ʼAtua ia te kau ʼaselo moʼo tokoni fakamilakulo ki te hahaʼi ohage ko tona fakaha ʼi te Tohi-Tapu. Kaʼe ʼo ʼuhiga mo totatou temi neʼe ui fenei e Sesu: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.” (Mateo 24:14) ʼE kotou iloʼi koa ʼe takitaki e te kau ʼaselo ia te kau tisipulo ʼa Sesu moʼo fakahoko ia te gaue ʼaia?

ʼI te tohi ʼo Fakaha, ʼe ui ai ko te kau ʼaselo e natou tokoni ki te hahaʼi ʼo te kele katoa ke natou kumi ia Sehova ʼAtua pea mo ako tana fakatuʼutuʼu ʼo ʼuhiga mo te malamanei. Neʼe tohi fenei e te apositolo ko Soane: “Neʼe au sio ki he tahi ʼaselo ʼe lele ʼi te lagi, pea neʼe ina maʼu he logo lelei ʼe heʼe gata ke ina tala kia natou ʼae ʼe nonofo ʼi te kele, ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli. Pea neʼe ina ui leʼo lahi fenei: “Kotou manavasiʼi ki te ʼAtua pea mo fakakololiaʼi ia ia, koteʼuhi kua hoko mai te hola ʼo tana fakamau, koia kotou atolasio kia Ia ʼae neʼe ina fakatupu te lagi, mo te kele, mo te tai, pea mo te ʼu matapuna vai.” (Fakaha 14:6, 7) ʼE lahi te ʼu aluʼaga ʼe hoko ʼi te temi nei ʼe ina fakamoʼoni mai ko te kau ʼaselo e natou lagolago ki te fakamafola ʼo te Puleʼaga ʼi te malamanei katoa. Pea ka fakahemala he tahi neʼe agahala pea mo toe liliu mai kia Sehova “ ʼe fiafia te kau ʼaselo ʼa te ʼAtua.”—Luka 15:10.

Kotea ʼae ka hoko anai moka ʼosi te gaue faifakamafola? Ko te kau ʼaselo, “te ʼu kautau ʼae ʼi te lagi” ʼe natou lagolago anai kia Sesu Kilisito, te Hau ʼo te ʼu hau, ʼi tanatou kau ki “te tau ʼo te ʼaho lahi ʼo te ʼAtua te Mafimafi” ʼae ko Alamaketone. (Fakaha 16:14-16; 19:14-16) ʼE fakahoko anai e te ʼu ʼaselo malolohi ia te fakamau fakaʼatua, ʼi te temi ʼae ka ‘lagavaka ai anai ia Sesu te ʼAliki kia natou . . . ʼae ʼe mole fakalogo ki te logo lelei ʼo ʼuhiga mo totatou ʼAliki ko Sesu.’—2 Tesalonika 1:7, 8.

Koia, kotou tui papau ʼe tokaga te kau ʼaselo kia koutou takitokotahi. Pea ʼe natou toe tokakaga ki te maʼuli lelei ʼo natou ʼae ʼe natou fia tauhi ki te ʼAtua, pea neʼe kua fakaʼaogaʼi tuʼa lahi e Sehova ia natou moʼo fakalotomalohiʼi pea mo puipui ʼana kaugana agatonu ʼae ʼe ʼi te kele.—Hepeleo 1:14.

Koia, ʼe tonu ke tou fai takitokotahi ia he tonu ʼe maʼuhiga. ʼE tou fagono pea mo fakalogo anai koa ki te ʼu logo lelei ʼae ʼe tala ʼi te kele katoa? ʼE fiafia anai te kau Fakamoʼoni ʼa Sehova ʼae ʼe maʼuʼuli ʼi tokotou kolo ʼi hanatou tokoni atu ke kotou maʼu he ʼu lelei mai te tokoni ʼofa ʼa te kau ʼaselo malolohi ʼa te ʼAtua.