ʼE Ko He Fihifihia Koa Ki Te Faka Mafola?
1 Ko te tokolahi ʼo te hahaʼi ʼe nātou maʼumaʼua. ʼE maʼumaʼua ʼaupito mo te kau Fakamoʼoni ʼa Sehova—ʼe nātou ako te Folafola ʼa te ʼAtua, ʼe nātou ʼolo ki te ʼu fono, pea mo nātou fai faka mafola. Tahi ʼaē meʼa, ʼe ʼi ai tatatou gāue faka mālama, mo te ʼu gāue ʼo te loto fale, mo te ʼu gāue ʼo te faleako, pea mo te tahi ʼu maʼua. Pea ʼe faigataʼa tāfito te faʼahi ʼaia ki te ʼu pule famili.
2 ʼE lahi te ʼu fenua ʼe hoko ai te ʼu faigataʼaʼia faka ekonomika, pea ʼe maʼua ai ki te ʼu pule famili ke nātou gāue fualoa pea mo gāue kinakina, moʼo taupau tonatou loto fale. ʼE mole lahi tonatou temi faka mafola, mokā ʼe lahi tonatou temi pea mo tonatou mālohi ʼaē ʼe nātou fakaʼaogaʼi ki tanatou gāue faka mālama. Mai tona ʼuhiga ʼaē ʼe ko honatou maʼua ke nātou tokakaga ki te maʼuli fakasino ʼo tonatou famili, koia ʼe tokagaʼi e ʼihi ʼe mole lahi tonatou temi fai faka mafola. (1 Tim. 5:8) ʼE moʼoni, ia ʼaho nei ʼe mole ko he meʼa faigafua hakita maʼu te ʼu meʼa ʼaē ʼe ʼaoga ʼaupito ki tokita maʼuli. Kae ʼe mole tonu ke liliu takita gāue faka mālama ko he fihifihia ki te faka mafola ʼo te logo lelei. (Mko. 13:10) Koia ʼe tonu ai ke tou vakaʼi totatou ʼaluʼaga moʼoni.
3 Mai tona ʼuhiga ʼaē ko te malamanei ʼe fetogi tuʼumaʼu, koia ʼe feala ke lahi te temi gāue ʼo he pule famili, heʼe ina fia tānaki kehe hana falā naʼa hoko mai he ʼu meʼa fakapunamaʼuli. (1 Ko. 7:31) Logola ko he gāue lahi ʼi te gāue fakamālama ʼe kita maʼu ai he tahi ʼu koloā, peʼe ko he tahi ʼu fealagia moʼo fai he ʼu fakafiafia peʼe ko he ʼu temi mālōlō, kae ʼe toe lahi age anai koa te fiafia ʼa te famili, peʼe ko tona maʼuli fakafeauga, mo kapau ko te faʼahi ʼaia ʼe ina toʼo te temi ʼaē ʼe tonu ke fakaʼaogaʼi ki te ʼu meʼa fakalaumālie pea mo te ʼolo tuʼumaʼu ki te ʼu fono? ʼE mole tou fai anai he ʼu meʼa ʼe fakatupu tuʼutāmaki ki totatou maʼuli fakalaumālie. ʼE ko he aga fakapotopoto hatatou mulimuli ki te tokoni ʼa Sesu, ke tou ‘tānaki he ʼu koloā maʼa tatou ʼi selo’ pea ke tou “maʼu koloā ki te ʼAtua.”—Mat. 6:19-21; Lu. 12:15-21, MN.
4 Koutou Fakamuʼamuʼa Te ʼu Meʼa ʼo Te Puleʼaga: Neʼe akoʼi e Sesu ki tana ʼu tisipulo ke nātou fakamuʼamuʼa tuʼumaʼu te ʼu meʼa fakalaumālie. Neʼe ina uga fēnei nātou: “ ʼAua naʼa koutou hoha ʼo ʼui maʼa koutou: ‘Koteā he meʼa ka tou kai?’ peʼe: ‘Koteā he meʼa ka tou ʼinu?’ peʼe: ‘Koteā he meʼa ka tou kofu ʼaki?’ ” He koʼe neʼe ina ʼui te faʼahi ʼaia? Neʼe ina fakamahino fēnei: “[Heʼe] ʼiloʼi pe e takotou Tāmai ʼaē ʼe ʼi selo, ʼe ʼaoga kia koutou te ʼu meʼa fuli ʼaia.” Kapau ʼe tou tui papau ki te faʼahi ʼaia, pea ʼe mole he meʼa ʼe ina tāʼofi anai tatou ke tou fai te meʼa ʼaē neʼe ʼui e Sesu: “Ke koutou haga kumi muʼa te puleʼaga pea mo tona faitotonu, pea ʼe toe foaki atu anai [te ʼu meʼa fakamālama fuli ʼaē ʼe ʼaoga] kia koutou.” Ei, ʼe tokaga anai te ʼAtua ke tou maʼu te ʼu meʼa ʼaoga ʼaia! (Mat. 6:31-33, MN ) ʼE mole ko he temi ʼaenī ke tou hoha fau ai ʼo ʼuhiga mo totatou maʼuli, peʼe tou faiga ke tou maʼuli fīmālie ʼi te tuʼu ʼo te ʼu faʼahiga meʼa ʼaenī ʼaē kua vave pulihi.—1 Pet. 5:7; 1 Soa. 2:15-17.
5 Ko te gāue faka mālama ʼe fai tāfito moʼo tokoni mai ki te ʼu meʼa ʼaē ʼe ʼaoga kia tatou ʼi te faʼahi fakasino. Pea koteā ʼaē ʼe ʼaoga tāfito? Neʼe tohi fēnei e te ʼapositolo ko Paulo: “Kapau ʼe tou maʼu te meʼa kai pea mo te meʼa kofu, ʼe tou feʼauga pe anai ʼi te ʼu meʼa ʼaia.” ʼE tou faiga koa ke tou maʼu he tahi age ʼu meʼa? Kapau koia, pea ʼe tou utu anai te ʼu fua kovi ʼaē neʼe ʼui e Paulo: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi, ʼe nātou fakatō te tagata ki te fakaʼauha pea mo te pulinoa.” (1 Tim. 6:8, 9, MN; Mat. 6:24; Lu. 14:33) Kae ʼe tou ʼiloʼi feafeaʼi ʼe kita holi fau ki te ʼu koloā fakamālama?
6 Kapau ʼe faka tuʼakoi e tatatou ʼu gāue faka mālama tatatou fai faka mafola, peʼe mole kei maʼuhiga kia tatou hatatou maʼuli faka sakilifisio maʼa te logo lelei, pea ʼe tou fetogi anai te ʼu meʼa ʼaē ʼe tou fakamuʼamuʼa. (Hep. 13:15, 16) Kapau ʼe tou faka faigafua totatou maʼuli, pea ʼe feala anai hakita tekeʼi te fihifihia ʼaia ki tatatou fai faka mafola. ʼE tonu ke tou fakaʼaogaʼi totatou temi pea mo totatou mālohi moʼo fakamuʼamuʼa tuʼumaʼu te ʼu gāue ʼo te Puleʼaga.
7 Ko Te Gāue ʼe Mole Vaʼiganoa: Ko te ʼu palalau ʼa Paulo ʼe ina fakaloto mālohiʼi tatou ke “lahi tuʼumaʼu tatatou ʼu gāue ʼi te ʼAliki, ʼi [tatatou] ʼiloʼi ʼaē ko [tatatou] gāue ʼe mole vaʼiganoa ʼo ʼuhiga mo te ʼAliki.” (1 Ko. 15:58, MN ) Ko te gāue tāfito ʼi te “gāue ʼi te ʼAliki” ʼe ko te faka mafola ʼo te Puleʼaga, pea mo fai ʼo ni ʼu tisipulo. (Mat. 24:14; 28:19, 20) Ke feala ke lahi tatatou kau ki te gāue ʼaia, ʼe tonu ke tou fakatuʼutuʼu he temi ki te fai faka mafola ʼi te vāhaʼa fuli, pea ke ʼaua naʼa tou fakaʼaogaʼi te temi ʼaia ki he tahi age meʼa. (Ef. 5:15-17) Kapau ʼe tou fai feiā, pea ko tatatou gāue faka mālama peʼe ko he tahi age meʼa, ʼe mole ko he fihifihia anai ki tatatou minisitelio.
8 Ka tou fakaʼaogaʼi totatou temi moʼo vaevae te ʼu moʼoni faka Tohi-Tapu ki te hahaʼi, pea ʼe tou maʼu ai he fiafia lahi ʼaupito ʼi te foaki. (Gaue 20:35) Kapau ʼe tou haga fai te faka mafola ʼo te Puleʼaga, pea ʼe tou falala anai ki te ka haʼu, “koteʼuhi ʼe mole heʼe agatonu te ʼAtua ke ina galoʼi [tatatou] gāue pea mo te ʼofa ʼaē neʼe [tou] fakahā ʼo ʼuhiga mo tona huafa.”—Hep. 6:10, MN.