“Ko He ʼu Meʼa ʼOfa Ko He ʼu Tagata,” ʼe Nātou Taupau Fakalelei Te Faga Ōvi ʼa Te ʼAtua
1 Neʼe fai e Sehova he tokoni ʼofa ʼaki tona ʼAlo, he neʼe ina foaki mai “he ʼu meʼa ʼofa ko he ʼu tagata”! (Ef. 4:8, 11, 12, MN ) ʼE lahi tanatou ʼu gāue, pea ʼe kau kiai tanatou taupau ia te faga ōvi ʼo te ʼAtua. (1 Pet. 5:2, 3) Ko tatou fuli ʼe tou maʼu te tokoni ʼofa lahi ʼaia. Peʼe tou tau mo he ʼu faigataʼaʼia, peʼe tou foʼofoʼou ʼi te kokelekasio, peʼe ʼi ai hotatou ʼu vaivaiʼaga, pe neʼe tou hēʼia, kae ko te ʼu tagata ʼaia ʼe nātou fia tokoni kia tatou fuli ke lelei totatou maʼuli fakalaumālie.—Filp. 2:4; 1 Tes. 5:12-14.
2 Ka tou tuʼania ʼuhi ko te ʼu meʼa ʼaē ʼe hoko ʼi te malamanei, pea ko te ʼu tagata tauhi ōvi ʼaia ʼe nātou hage “ko he nonoʼaga mokā matagi pea ko he holaʼaga mokā afā.” Mokā tou gaʼegaʼe mo ogosia pea mo lotomamahi, pea ʼe nātou fakamokomoko tatou ohage “ko he ʼu kiʼi vaitafe ʼi he potu moamoa,” peʼe “ko te malumalu ʼo he mata maka ʼi he kele kakā.”—Isa. 32:2.
3 ʼE Nātou Fakaloto Mālohi Ia Nātou ʼAē ʼe Mole Kei Fai Faka Mafola: ʼE faigaʼi mālohi e te kau tagata ʼāfea ke nātou fakaloto mālohiʼi ia nātou ʼaē kua tahitahiga tanatou fai faka mafola ʼi he ʼu māhina, peʼe mole kei fai faka mafola, ke nātou toe kau ki te ʼu gāue kehekehe ʼaē ʼe fai e te kokelekasio. Ko te ʼu ʼaʼahi faka tauhi ōvi neʼe tokoni ki te tokolahi ke nātou kau tuʼumaʼu ki te ʼu fono ʼo te kokelekasio, pea kua nātou toe mālolohi ʼi te faʼahi fakalaumālie ʼo feala ai hanatou toe kau ki te gāue ʼi te minisitelio. Ko te ʼu faiga fuli ʼaia ʼa te kau tagata ʼāfea ʼe hā ʼaki ai te ʼofa ʼo Sehova pea mo te takitaki ʼa Sesu Kilisito, koteʼuhi neʼe tuku mai e Sesu he faʼifaʼitaki ʼofa ʼo ʼuhiga mo tana ʼu ōvi ʼaē neʼe hēhē pe neʼe puli.—Mat. 18:12-14; Soa. 10:16, 27-29.
4 ʼE vakavakaʼi e te ʼu tagata tauhi ōvi te ʼu fakaʼiloga ʼaē ʼe hā ai kua vaivai ʼihi ʼi te faʼahi fakalaumālie. ʼE foaki anai he tokoni fakalaumālie kia ia ʼaē kua lotovaivai, peʼe kua tahitahiga tana kau ki te ʼu fono, peʼe kua veliveli tana fai faka mafola. ʼE fia tokoni moʼoni te kau tagata ʼāfea ki he tahi kua kamata manako ki te ʼu meʼa ʼo te mālama, ohage ko tona ʼu faʼahiga teuteu peʼe ko tona faʼahiga gaohi ʼo tona ulu, peʼe ko he tahi ʼe ina kamata valokiʼi te kokelekasio. ʼAki he fia tokaga pea mo he ʼofa moʼoni, ko te ʼu tagata ʼāfea ʼe nātou fia ‘foaki tonatou maʼuli’ moʼo tokoni kia nātou ʼaia ke nātou toe fakamaʼuli tonatou ʼofa kia Sehova.—1 Tes. 2:8.
5 Ki muʼa atu, ko ʼihi Kilisitiano neʼe mole kei nātou fakatahi mo te kokelekasio, pea neʼe mole kei nātou fai hanatou gāue fakalaumālie, he neʼe kua lahi fau tanatou ʼu fihifihia ʼuhi ko te mahaki, te faʼahi ʼo te paʼaga, peʼe ko te famili. ʼE mole valokiʼi anai nātou e te kau tagata ʼāfea, kae ʼe nātou tokoni anai kia nātou ʼaia, moʼo fakahā age ko Sehova ʼe tokaga ki tana ʼu ōvi fuli pea ʼe tokoni anai kia nātou ʼi te ʼu temi faigataʼa. (Pes. 55:22; 1 Pet. 5:7) Ko te ʼu tagata tauhi ōvi ʼaē ʼe nātou tokakaga ki te faga ōvi, ʼe nātou lava tokoni kia nātou ke nātou mahino kapau ʼe nātou ‘fakaōvi ki te ʼAtua, pea ʼe fakaōvi anai kia nātou,’ moʼo foaki age he fakaloto fīmālie.—Skp. 4:8; Pes. 23:3, 4.
6 ʼE Nātou Manatuʼi Ia Nātou ʼAē ʼe Mahahaki: Ko te ʼu tagata tauhi ōvi ʼofa ʼaia, ʼe nātou manatuʼi mo nātou ʼaē ʼe feala ke galoʼi. ʼI te ʼu kokelekasio fuli, ʼe ʼi ai ʼihi ʼe nātou mahahaki, ʼe nātou nonofo ʼi te ʼu fale mahaki, peʼe kua nātou matutuʼa. ʼUhi ko tonatou ʼu ʼaluʼaga ʼaia, ʼe faigataʼa ai tanatou kau ki te tala ʼo te logo ʼo te Puleʼaga. Lagi ko te ʼu fealagia ʼaē ke nātou fai fagonogono, ʼe hoki lava mokā ʼolo age he ʼu hahaʼi ʼo ʼaʼahi nātou, peʼe nātou fagonogono ki ʼihi kau mahaki, peʼe ko te ʼu hahaʼi gāue ʼo te ʼu fale lopitali. Kae ko te ʼu meʼa ʼaē ʼe nātou lava fai, ʼe ko he lagolago maʼuhiga ki te fai faka mafola ʼaē ʼe fai ʼi te malamanei katoa. (Mat. 25:15) Tatau aipe peʼe nātou fagonogono ia minuta e 15, kae ʼe tonu ke nātou tohi te gāue ʼaia, pea ʼe hoko atu pe anai tonatou lau ʼe ko he ʼu hahaʼi ʼe nātou faka mafola tuʼumaʼu ia te Puleʼaga.
7 Ko ‘te ʼu meʼa ʼofa ʼaia ko te ʼu tagata,’ ʼe nātou mahino tāfito ki te ʼu meʼa fakalaumālie ʼaē ʼe ʼaoga ki tonatou ʼu tēhina ʼi te māhina ʼaenī—te māhina ʼo te Fakamanatu. ʼE ko he temi lelei ʼaia maʼa te kau tagata ʼāfea ke nātou faiga mālohi moʼo tokoni kia nātou fuli ʼaē kua hēhē, ke nātou toe maʼu te fiafia pea mo te tokalelei ʼo te ʼatamai, mo kapau ʼe nātou fakatahi mo te kokelekasio! ʼE tou fiafia mokā tou sio kia nātou ʼaia ʼaē ko totatou ʼu “kāiga ʼi te tui,” ʼe nātou ʼōmai ki te ʼu fono ʼo te kokelekasio, pea mokā nātou kau ki te minisitelio, moʼo fakahā tanatou tui ki te sakilifisio faitotogi.—Kal. 6:10, MN; Luka 15:4-7; Soa. 10:11, 14.