Ke Fakaʼapaʼapa Totatou Teu Pea Mo Te Gaohi ʼo Totatou ʼUlu
1 Neʼe tuʼu ʼi te sulunale te ʼu palalau ʼaenī: “Ko te hahaʼi tagata fuli, ʼo feiā mo te kau talavou, neʼe ʼi ai tonatou ʼu hēkesi. Ko te ʼu teu ʼa te hahaʼi fafine fuli pea mo te kau finemui, feiā mo te kiʼi kau tamaliki fafine, neʼe ko te ʼu kofu loloa peʼe ko te ʼu vala. Neʼe mole tou sio ki he tahi ʼe vāvaʼe taga kili peʼe mole hona hēkesi. Ko te hahaʼi fuli neʼe nātou teu maʼa.” Neʼe ko ai koa te ʼu hahaʼi ʼaia? Neʼe ko he fakatahitahi faka politike koa? Peʼe ko he faigaoʼi? Peʼe ko he fai mahōlō? Kailoa ia! Neʼe talanoa ia ʼo ʼuhiga mo te ʼu tēhina pea mo te ʼu tuagaʼane ʼi te fakatahi faka tisitilike ʼaē neʼe fai ʼi te taʼu ʼaenī kua ʼosi.
2 ʼI te malamanei katoa, kua ʼiloʼi ʼe kehe ʼaupito tatatou faʼahiga teuteu pea mo te gaohi ʼo totatou ʼulu. (Mala. 3:18) Koteā tona tupuʼaga? Heʼe tou mulimuli ki te fakatotonu ʼa te Tohi-Tapu “ke [tou] teuteuʼi [ia tatou] ʼaki he agavaivai pea mo fakapotopoto, . . . ʼi hona ʼaluʼaga ʼe tau mo feʼauga mo [nātou] ʼaē ʼe nātou lau ʼe nātou fakaʼapaʼapa ki te ʼAtua.”—1 Tim. 2:9, 10, MN.
3 Koteā ʼAē ʼe Hā ʼi Tokotou ʼu Teu Pea Mo Te Gaohi ʼo Tokotou Ulu?: Ko tatatou ʼu teu pea mo tatatou faʼahiga ʼai ʼo te ʼu teu ʼaia ʼe tou fakahā ai te ʼu meʼa ʼaē ʼe tou tui kiai, tatatou aga pea mo te ʼu meʼa ʼe tou loto kiai. Ko te ʼu faʼahiga teu ʼaē ʼe tou filifili ʼe ina fakahā totatou ʼuhiga pea koteā ʼaē ʼe tou fakafofoga. ʼE mole tonu ke tou lagolago ki te ʼu manatu pea mo te aga heʼeʼaoga ʼaē ʼe kovi ʼe mafola ʼi te malamanei. ʼAua naʼa tou mulimuli ki te faʼahiga teuteu ʼo totatou temi, kae ke tou vakaʼi peʼe ʼalutahi tatatou faʼahiga teuteu mo he tahi ʼe ʼui ko he minisi ʼa te ʼAtua. (Loma 12:2) ʼE mole tonu ke tou fili he ʼu teu ʼe fakahā ai te fia maʼuli faʼifaʼitaliha, peʼe hā ai he faʼahiga maʼuli heʼeʼaoga, kae ʼe tou fia fakahā ʼe tou “fakakololia [moʼoni] ai ki te Atua.”—1 Pet. 2:12.
4 ʼI ʼihi temi, ko he tahi ʼe foʼou, mole heʼeki aga fakapotopoto peʼe vaivai ʼi te faʼahi fakalaumālie ʼe feala ke ina tali te ʼu meʼa fuli pe ʼaē ʼe fakahāhā e te mālama, te ʼu teu pea mo te gaohi ʼo te ʼulu, kae mole ina vakaʼi muʼa peʼe malave feafeaʼi anai kia Sehova pea mo tana kautahi. Ko tatou fuli ʼe feala ke tou sivi ia tatou totonu moʼo vakaʼi peʼe mole tou mulimuli ki te ʼu manatu ʼo te mālama. ʼE tou lava kole age ki he tēhina peʼe ko he tuagaʼane kua fakapotopoto ʼi te faʼahi fakalaumālie, ke ina tala fakahagatonu mai peʼe koteā tana manatu ʼo ʼuhiga mo tatatou faʼahiga teu pea mo te gaohi ʼo totatou ʼulu, pea ke tou tokagaʼi lelei te ʼu tokoni ʼaē ka ina fai mai.
5 Tou faiga lahi ʼi te Fakatahi Faka Tisitilike ʼo te taʼu ʼaenī, “Te Kau Fai Faka Mafola Faiva ʼo Puleʼaga,” ke tou fakahā lelei ko tatou ko te “hahaʼi maʼoniʼoni ʼa Sehova [totatou] ʼAtua.” Ko te ʼu fakavikiviki ʼaē ka fai anai e te hahaʼi ʼo tuʼa, ʼe toe hilifaki anai ki te “fakavikiviki, mo te ʼiloa pea mo te matalelei” ʼo Sehova.—Teu. 26:19.