Ke Lelei Tatatou Teuteu Pea Mo Tou Fai He ʼu Gāue Lelei
1. ʼE tou lava fakahā feafeaʼi tatatou fakafetaʼi ki te fakatahi faka tisitilike ka hoko mai?
1 Kua vave hoko mai te ʼaho maʼuhiga ʼaē ke fakaafe ai tatou e Sehova ki te Fakatahi Faka Tisitilike ʼo te taʼu 2003, ko tona kupu tāfito “Koutou Faka Kolōlia Ki Te ʼAtua.” ʼE tou loto fakafetaʼi lahi ki te fakaafe ʼo tatou e Sehova ki te meʼa kai fakalaumālie lahi ʼaia! ʼE feala ke tou fakahā tatatou fakaʼapaʼapa kia te ia pea mo totatou loto fakafetaʼi ki te ʼu meʼa ʼaē ʼe ina foaki mai, ʼi totatou faʼahiga teu pea mo te faʼu ʼo totatou ʼulu.—Pes. 116:12, 17.
2. He koʼe ʼe maʼuhiga kia tatou ke tou maʼa pea mo tou teu lelei?
2 Ke Maʼa Pea Mo Tokalelei: ʼE tonu ke hā ʼi totatou faʼahiga teu pea mo te faʼu ʼo totatou ʼulu te ʼu lekula ʼo totatou ʼAtua, ʼaē ʼe maʼa pea mo tokalelei. (1 Ko. 14:33; 2 Ko. 7:1) Ko totatou sino, mo totatou lauʼulu pea mo totatou ʼu paninia ʼe tonu ke maʼa, pea ʼe tonu ke maʼa mo totatou ʼu mutuʼi meʼa. Ia ʼaho nei, kua māhani te hahaʼi ʼi te mole teu maʼa. Kae ʼe mole tonu ke mulimuli he Kilisitiano kiai, ʼuhi pe heʼe feiā te faʼahiga teu ʼa he tahi ʼe ʼiloa ʼi te televisio peʼe ʼi te faigaoʼi. Kapau ʼe tou mulimuli ki te lamote, pea ʼe lagi faigataʼa anai ki te hahaʼi hanatou sio ki te kehekehe ʼo nātou ʼaē ʼe nātou tauhi ki te ʼAtua moʼoni pea mo nātou ʼaē ʼe mole nātou tauhi kia te ia.—Mal. 3:18.
3. ʼE tou lava ʼiloʼi feafeaʼi ʼe ʼalutahi tatatou faʼahiga teu mo te tokoni ʼaē ʼe tou maʼu ia 1 Timoteo 2:9, 10?
3 Te ʼu Mutuʼi Meʼa ʼAē ʼe Tau Mo He Kau Minisi Kilisitiano: ʼI te temi ʼaē neʼe faitohi ai ia te ʼapositolo ko Paulo ki te tagata taupau ko Timoteo, neʼe ina fakaloto mālohiʼi “te hahai fafine, ke natou tui he u kofu e feauga, mo teuteu fakapotopoto pea mo maʼa . . . ke natou teuteu aki te u gaue lelei, ia mea e tuha mo te u fafine e lotu.” (1 Tim. 2:9, 10) Ke tou ʼiloʼi papau peʼe lelei totatou ʼu teu, ʼe tonu ke tou fakakaukauʼi lelei kiai. ʼE tonu ke maʼa pea mo hā ai tatatou fia mālalo—ke mole tokagaʼi fau, pea mo pipiki fau ki te sino.—1 Pet. 3:3.
4, 5. Koteā ʼaē ʼe tonu ke tokakaga kiai te kau Kilisitiano tagata mo fafine?
4 Neʼe toe fai e Paulo te tokoni ʼaenī, ke “aua naa natou fiʼulu, mo ai aulo, pe ai lopa, pe ko he u teu totogi [kovi].” (1 Tim. 2:9) Ko he aga fakapotopoto ki te ʼu fafine Kilisitiano ke nātou fakafuafua lelei tanatou fakaʼaogaʼi te ʼu meʼa gigila, mo te ʼu meʼa pena mata pea mo te tahi ʼu meʼa matalelei.—Taag. 11:2.
5 Ko te tokoni ʼaē neʼe fai e Paulo ki te ʼu fafine Kilisitiano ʼe toe faka ʼuhiga ki te kau tagata Kilisitiano. ʼE tonu ke tekeʼi e te ʼu tēhina te ʼu teu ʼaē ʼe hā ai te manatu ʼo te mālama. (1 Soa. 2:16) Ohage la, ʼi ʼihi fenua ko te meʼa māhani te ʼai e te hahaʼi he ʼu kofu ʼe fālahi, kae ʼe mole ko he faʼahiga teu ʼe tau mo he minisi ʼa te ʼAtua.
6, 7. ʼE lava fakavikiviki feafeaʼi e te fānau ia Sehova, pea koteā te maʼua ʼa te ʼu mātuʼa?
6 Te ʼu Gāue Lelei ʼa Te ʼu Mātuʼa Mo Te Fānau: ʼE mole maʼu e te kau tūpulaga ʼo te mālama he ʼu aga ʼe lelei, koia ʼe tokagaʼi ai te kehekehe ʼo tatatou fānau, pea ʼe fakavikiviki ai kia Sehova pea mo tona kautahi. Kae neʼe ʼi ai te ʼu lakaga neʼe hoko ai te ʼu fihifihia koteʼuhi neʼe mole leʼoleʼohi lelei te fānau. (Taag. 29:15) ʼE tonu ke leʼoleʼo e te ʼu mātuʼa tanatou fānau ʼi te kogafale ʼo te fakatahi.
7 ʼI muʼa ʼo te fakatahi neʼe tokagaʼi e ʼihi mātuʼa te ʼaoga ʼaē ke nātou toe vakaʼi mo tanatou fānau te aga ʼaē ʼe fakamaʼua kia nātou. (Ef. 6:4) ʼE nātou tokoni ki tanatou fānau ke nātou mahino ko te ʼofa moʼoni “ ʼe mole ina fai he ʼu aga ʼe mole mata feʼauga” peʼe “mole ina kumi pe te meʼa ʼaē ʼe ʼaoga kia te ia.” (1 Ko. 13:5, MN ) Ko te fakatahi faka tisitilike ʼe ko he temi ke akoʼi ai tatou e Sehova, pea ko te fānau pea mo te hahaʼi lalahi, ʼe feala ke nātou fakahā tanatou fakaʼapaʼapa ki te fakatuʼutuʼu ʼaia ʼaki tanatou aga ʼi te fakatahi pea ʼi he tahi age potu.—Isa. 54:13.
8. ʼE feala ke malave feafeaʼi tatatou aga ʼaē ʼe lelei ki te hahaʼi?
8 Ko tatatou aga ʼaē ʼe lelei ʼe feala ke ina fakatonutonuʼi he ʼu manatu hala pea mo taki mai he ʼu hahaʼi ki te tauhi moʼoni. (Mat. 5:16; 1 Pet. 2:12) ʼOfa pe ke vikiʼi tatou e te hahaʼi fuli ʼaē ʼe tou felāveʼi anai mo nātou ʼi te temi ʼo te fakatahi faka tisitilike, ʼuhi ko tatatou aga pea mo tatatou felogoi mo nātou. ʼI te faʼahi ʼaia ʼe tou ‘fakahā anai ko tatou ko he faʼifaʼitakiʼaga ʼo te ʼu gāue lelei’ pea mo tou faka kolōlia ai kia Sehova.—Tito 2:7.