Tou Fakatahitahi ʼi Te Felogoi Lelei
1 Kua tuʼa fia koa takotou ōfo ʼi takotou sio ki te matalelei ʼo te faʼu ʼo totatou sino? (Pes. 139:14) Ko te ʼu koga kehekehe ʼo te sino ʼe nātou gāue lelei fakatahi. ʼE fakatatau e te Folafola ʼa te ʼAtua te kokelekasio faka Kilisitiano ki he sino ʼe fehokohokoʼaki lelei. ʼI tanatou fakalogo ki te Pule, ia Kilisito, ko te kokelekasio katoa ʼe nātou ‘fakatahitahi ʼi te felogoi lelei pea mo felagolagoʼaki ʼi te ʼu noʼo fuli ʼaē ʼe nātou foaki te ʼu meʼa ʼe ʼaoga.’ (Ef. 4:16a) Koia ʼe lava fakaʼaogaʼi e Sehova tana hahaʼi ʼaē ʼe logo tahi moʼo fakahoko he ʼu meʼa fakaofoofo.
2 Ko te kau Kilisitiano ʼo te kokelekasio ʼo te ʼuluaki sēkulō, neʼe nātou gāue “ ʼaki he loto tahi” ʼo nātou fetokoniʼaki ʼi te ʼu meʼa fakalaumālie pea mo fakasino. (Gaue 2:44-47, MN ) ʼAki te tokoni ʼa Sehova, neʼe nātou kātakiʼi fakatahi te ʼu fakataga lahi. (Gaue 4:24-31) Neʼe nātou tala te logo ʼo te Puleʼaga ʼi te ʼu potu fuli pe ʼaē neʼe nātou ʼolo kiai, ʼo nātou faka mafola te logo lelei ki te ʼu fenua ʼo te temi ʼaia. (Kol. 1:23) ʼI totatou temi, ʼe toe logo tahi te kokelekasio faka Kilisitiano moʼo fakahoko te ʼu meʼa ʼaia ʼi te malamanei katoa. Koteā ʼaē ʼe tokoni ki te fakahoko ʼo te gāue makehe ʼaia?
3 ʼE Fakatahitahi Tatou e Te ʼu Akonaki Fakaʼatua: ʼI te malamanei katoa, ʼe tou logo tahi ʼuhi ko tatatou tauhi. He koʼe ʼe feala te faʼahi ʼaia? ʼE tou fakamoʼoni ʼe fakaʼaogaʼi e Sehova tana kalasi ʼi te kele moʼo foaki “i tona temi te meakai” fakalaumālie. (Mat. 24:45) ʼE toe maʼuhiga kia tatou te ʼu “meʼa ʼofa ko he ʼu tagata” ʼaē neʼe ina foaki mai, ko he kau faiako ʼi te kokelekasio. ʼI tatatou tali ʼaki he agavaivai te ʼu fakatuʼutuʼu ʼa Sehova moʼo fafaga tatou ʼi te faʼahi fakalaumālie, ʼe tuputupu tatatou mahino ki te Folafola ʼa te ʼAtua pea mo ina uga tatou ʼi totatou ʼuhiga kau tisipulo ke tou fia faʼifaʼitaki ia Sesu. ʼE tonu ke tou hoko atu tatatou ako te Folafola ʼa te ʼAtua, ʼo tou faiga lahi ke tou “aʼu ki te logo tahi ʼi te tui.” (Ef. 4:8, 11-13, MN ) ʼE koutou lagolago koa ki tatatou logo tahi fakalaumālie, ʼo koutou lau te Tohi-Tapu ʼi te ʼaho fuli?
4 ʼE Tou Logo Tahi Heʼe Tou Fakatahi Mo Te Kau Kilisitiano: Ko te ʼofa ʼaē ʼe ina fakatahi lelei tatou ke tou felogoi lelei ʼi te ʼu fono. ʼI te ʼu fono ʼaia, ʼe tou “fe’tokagaʼaki.” (Hep. 10:24, 25) Ko tona faka ʼuhiga ʼe mole gata pe tatatou sio ki te ʼu meʼa ʼaē ʼe hā ki tuʼa ʼi totatou ʼu tēhina mo tuagaʼane, kae ʼe tou faigaʼi ke tou feʼiloʼiʼaki lelei mo nātou, ke nātou maʼuhiga kia tatou ohage ko tonatou maʼuhiga kia mata ʼo Sehova. (Asea 2:7, kiʼi nota ʼi te lalo pasina.) ʼI tatatou fakalogo ki tanatou tala ʼo tanatou tui, ʼe lahi ai tatatou ʼofa kia nātou pea ʼe toe mālohi ai mo tatatou logo tahi. ʼE ʼiloʼi koa koutou e te hahaʼi ko he tahi ʼe kau tuʼumaʼu ki te ʼu fono?
5 Ko Tatou Ko He ʼu Kaugā Gāue ʼi Te Minisitelio: Ko tatatou faka mafola ia te logo lelei mo totatou ʼu tēhina, ʼe tou logo tahi ai moʼo fakahoko te finegalo ʼo te ʼAtua. Neʼe maʼuhiga ʼaupito ki te ʼapositolo ko Paulo tana ʼu “kaugā gāue maʼa te puleʼaga ʼo te ʼAtua.” (Kol. 4:11, MN ) Ko tatatou fakamatalatala te ʼu meʼa neʼe hoko ʼi te minisitelio pea mo tatatou fetokoniʼaki ʼi te gāue ʼaia, ʼe tokoni kia tatou ke tou fakahoko tatatou gāue faka Kilisitiano pea ʼe toe mālohi ai mo tatatou noʼo ʼo te logo tahi.—Kol. 3:14.
6 Ko Te Mālohi ʼo Te Laumālie Maʼoniʼoni Moʼo Faka Logo Tahi: ʼI tatatou faiga ke tou fakahoko tona finegalo, ʼe tapuakina tatou e Sehova ʼo ina foaki mai tona laumālie. ʼE tokoni mai te laumālie ke tou fakatokatoka totatou ʼu fihifihia pea mo tou maʼuʼuli fakatahi ʼi te logo tahi. (Pes. 133:1) ʼE ina uga tatou ke tou “mulimuli ki te logo tahi ʼo te laumālie ʼi te noʼo ʼo te tokalelei.” (Ef. 4:3, MN ) Ko tatou takitokotahi ʼe feala ke tou tokoni ki te felogoi ʼaē ʼe maʼu e te hahaʼi ʼa te ʼAtua, ʼo tou fakahā ʼi tatatou ʼu aga te ʼu fua ʼo te laumālie.—Kal. 5:22, 23.
7 Ko tatatou tauhi fakatahi ʼi te logo tahi ʼi te takitaki ʼa Kilisito, “ ʼe lagolago ki te tuputupu ʼo te sino ke feala ki te sino ʼaia ke ina laga ia ia totonu ʼi te ʼofa.” (Ef. 4:16b, MN ) Tahi ʼaē meʼa, ʼe faka kolōlia ai ia Sehova, “te Atua o te tokalelei.”—Loma 16:20.