Te Tali Ki ʼAkotou ʼu Fehuʼi

◼ He koʼe ʼe lelei ke kita kau ki te kokelekasio ʼaē ʼe gāue ki te telituale ʼaē ʼe kita nofo ai?

ʼAki te kokelekasio, ʼe kita maʼu ai he fakaloto mālohi ‘ ʼe ina uga tatou ki te ʼofa pea mo te ʼu gāue lelei.’ (Hep. 10:24, 25) ʼAki te kokelekasio ʼe tou ako ai te moʼoni, pea ʼe foaki mai ai te ʼu meʼa fuli ʼaē ʼe ʼaoga moʼo fakahoko tatatou gāue ʼaē ko te fai ʼo ni ʼu tisipulo. (Mat. 28:19, 20) Tahi ʼaē meʼa, ʼe tou maʼu ai he lotomālohi ke tou agatonu ʼo kātakiʼi te ʼu ʼahiʼahi, pea ʼe tou maʼu ai he ʼu tagata taupau ʼofa ʼe nātou tokoni mai ke tou tauʼi totatou ʼu tuʼuga fihifihia pea mo tuʼania. ʼO mahino mai, ko te kokelekasio ʼe maʼuhiga ʼaupito ki totatou maʼuli fakalaumālie. Kae ʼe ʼi ai koa he ʼu lelei mo kapau ʼe tou kau ki te kokelekasio ʼaē ʼe gāue ki te telituale ʼaē ʼe tou nonofo ai?

ʼE mole tatau totatou ʼu ʼaluʼaga takitokotahi, pea ko te tonu ʼaē ka tou fai ʼo ʼuhiga mo te kokelekasio ʼaē ʼe tou fia kau kiai, ʼe fakalogo ki te ʼu faʼahi ohage ko te gāue, he ʼohoana ʼe mole ʼi te moʼoni, pea mo te meʼa feʼaluʼaki. Kae ʼe ʼi ai tona ʼu lelei, ʼi te faʼahi fakalaumālie pea mo te tahi ʼu ʼaluʼaga, mo kapau ʼe kau he tahi ki te kokelekasio ʼaē ʼe gāue ki te telituale ʼaē ʼe nofo ai. Ka hoko he meʼa fakavilivili, pea ʼe faigafua age ki te ʼu tagata ʼāfea ke nātou felāveʼi mo te kau fai faka mafola fuli. Neʼe kua ʼi ai te ʼu Minisitelio Fakafalani neʼe tali ki te fehuʼi ʼaia, pea neʼe talanoa ai ki te tahi ʼu lelei.—Maio 1991, ʼAukusito 1976, pea mo Maio 1967.

ʼI te agamāhani, ʼe lelei age hakita kau ki te kokelekasio ʼaē ʼe ōvi mai ki te kolo ʼaē ʼe kita nofo ai, heʼe feala ai hatatou ʼolo fakatomuʼa ke kita palalau mo ʼihi, ke kita fai te ʼu faʼahi ʼaē ʼe maʼuhiga tāfito, pea mo kita kau ki te katiko ʼo te kamata pea mo te faikole. Kapau ʼe nonofo ʼi totatou kolo he ʼu hahaʼi ʼe foʼofoʼou mai ki te kokelekasio, ʼi te agamāhani ʼe faigafua age kia tatou hatatou ʼolo ʼo ʼaʼahi nātou, mo fai tanatou ako Tohi-Tapu, pea mo ʼaumai nātou ki te ʼu fono ʼaē ʼe lelei age kia nātou.

ʼE tou falala, ko te ʼu pule famili ʼe nātou vakaʼi anai te faʼahi ʼaia ʼi te faikole, mo fakafuafua lelei te ʼu faʼahi fuli ʼaē ʼe lelei ki tonatou famili ʼi te faʼahi fakalaumālie pea mo te faʼahi fakasino.—1 Tim. 5:8.