Te Tokoni ʼAē ʼe Tou Maʼu Mai Te Ako Tohi ʼo Te Kōkelekāsio
1. ʼE tokoni feafeaʼi mai kiā tātou te ʼu fono e nima ʼi te vāhaʼa?
1 Ko tatatou ʼu fono takitahi e nima ʼi te vāhaʼa ʼe kehekehe tonatou kaugamālie pea mo tonatou ʼaoga. Kae ʼe maʼuhiga te ʼu fono fuli ʼaia, heʼe tokoni mai kiā tātou ke “tou fetokagaʼaki ke tou uga ia tātou ki te ʼofa pea mo te ʼu gāue matalelei.” (Hep. 10:24, 25) Koteā ʼihi agaaga makehe pea mo ʼaoga ʼe tou maʼu pē ʼi te fono ʼo te Ako Tohi ʼo te Kōkelekāsio?
2. Koteā te ʼu lelei ʼe tou maʼu ʼi te siʼisiʼi ʼo nātou ʼaē ʼe kau ki te ako tahi?
2 ʼE Tokoni Mai Ke Tou Tuputupu ʼi Te Faʼahi Fakalaumālie: ʼI te agamāhani, ko nātou ʼaē ʼe kau ki te ako tohi ʼe siʼisiʼi age iā nātou ʼaē ʼe kau ki te tahi ʼu fono ʼo te kōkelekāsio. ʼE faigafua ai hatatou maʼu he ʼu kaumeʼa ʼe liliu anai ko he fakaloto mālohi ʼi te faʼahi fakalaumālie. (Taag. 18:24) Neʼe kua kotou faiga koa ke kotou feʼiloʼiʼaki mo te hahaʼi fuli ʼo takotou ako tohi, ʼe lagi feala ke kotou kole kiā nātou takitokotahi peʼe natou fia gāue mo koutou ʼi te minisitelio? ʼAki te fakatuʼutuʼu ʼo te ako tohi, ʼe toe feala ki te taupau ʼo te ako tohi ke ina ʼiloʼi te ʼu ʼaluʼaga ʼo nātou takitokotahi ʼo tana ako tohi pea mo foaki he ʼu fakaloto mālohi kiā nātou takitokotahi.—Taag. 27:23.
3. ʼE tokoni feafeaʼi e te ako tohi ke tou fai he ʼu tali pea mo kau kiai te kau ako Tohi-Tapu?
3 Kua kotou fakaafe koa takotou kau ako Tohi-Tapu ke natou kau mo koutou ki te ako tohi? Ko te hahaʼi ʼaē ʼe fia logo ki te moʼoni ʼaē ʼe mole natou fia kau ki he ʼu fono ʼe kaugamālie fau, ʼe lagi mole natou mātataku anai mokā natou kau ki he fono ʼe tokosiʼi, pea tāfito mokā fai ʼi he loto fale. Ko te felōgoi lelei ʼaē ʼe maʼu ai ʼe faigafua anai ki te kau tūpulaga pea mo nātou ʼaē ʼe foʼofoʼou mai ke natou fai hanatou ʼu tali. Pea ʼi te siʼisiʼi ʼo te hahaʼi ʼi te fono ʼaia, ʼe lahi age te ʼu faigamālie ʼe tou maʼu ke tou tali pea mo fakavikiviki ai ia Sehova.—Pes. 111:1.
4. Ko te ʼu faʼahi fea ʼaē ʼe feala ke lelei ai te fakatuʼutuʼu ʼo te ako tohi?
4 ʼI te agamāhani, ʼe fai te ʼu ako tohi ʼi he ʼu koga meʼa ʼi te telituale ʼe lelei ki te kau kaugā fai faka mafola. Logolā ʼe mole feala ke tou kau fuli ki he ako tohi ʼe tuʼu ovi kiō tātou, kae ko tatatou kau ki tatatou ako tohi ʼe lagi mole loaloaga age tatatou ʼolo kiai ʼi hatatou ʼolo ki te tahi atu ʼu fono ʼo te kōkelekāsio. Ko te potu ʼaē ʼe fai ai te ako tohi ʼe feala pē foki ke fai ai mo te ʼu fono ki te vahe gāue.
5. ʼE lava tokoni feafeaʼi mai te tagata taupau ʼo te ako tohi ki tatatou minisitelio?
5 Ko He Tokoni Ki Te Minisitelio: Ko te tagata taupau ʼo te ako tohi ʼe tokaga ʼo tokoni kiā nātou takitokotahi ʼo tana ako tohi ke natou kau tuʼumaʼu ki te minisitelio, ke natou maʼu hona fua lelei pea mo natou fiafia ai. Koia, ʼe faiga anai ke gāue mo natou takitokotahi, ʼo tokoni kiā nātou ʼi te ʼu faʼahi kehekehe ʼo te minisitelio. Kapau ʼe faigataʼa kiā koutou he faʼahi ʼo te minisitelio, ohagē lā ko te fai ʼo he ʼu ʼaʼahi, kotou palalau mo takotou taupau ako tohi. ʼE lagi feala ke ina fakatuʼutuʼu ke kotou kaugā gāue mo he kaugā fai faka mafola kua māhani ʼo te ako tohi. ʼE feala ke lelei age takotou fai ʼo he ʼu ako Tohi-Tapu mokā kotou tokagaʼi fakalelei te faʼahiga fai lelei ʼo te tagata taupau ako tohi ʼi tana fai te ako tohi.—1 Ko. 4:17.
6. He koʼē ʼe tonu ke tou faiga ke tou maʼu kātoa te ʼu lelei mai te fakatuʼutuʼu ʼo te ako tohi?
6 ʼE ko he toe tapuakina lahi ʼe tou maʼu ʼaki te Ako Tohi ʼo te Kōkelekāsio! Ko te fakatuʼutuʼu ʼofa ʼaia mai ia Sehova ʼe tokoni mai ke tou nonofo mālohi ʼi te faʼahi fakalaumālie, ʼi te ʼu temi faigataʼa ʼaenī ʼe tou māʼuʼuli ai.—Pes. 26:12.