ʼE ʼAoga Kia Tatou Te Ako Tohi
1. Neʼe kamata feafeaʼi te fakatuʼutuʼu ʼo te Ako Tohi?
1 ʼI te 1895, ko te kau Fakamoʼoni ʼa Sehova ʼaē neʼe higoaʼi ko te kau Ako Tohi-Tapu, neʼe toe fakahigoaʼi nātou ko te kau Cercles de lʼaurore (Te Kūtuga ʼo Te Māfoatā) ʼo te Ako Tohi-Tapu. Neʼe fakaʼaogaʼi te ʼu tohi ʼe higoa ko te LʼAurore du Millénium (Te Kamata ʼo Te ʼu Taʼu e Afe) moʼo fai te ʼu ako tohi. Ki muli age, neʼe higoaʼi te ʼu fono ʼaia ko Te Kūtuga Pelea ʼo te Ako Tohi-Tapu. (Gaue 17:11) Ko te ʼu afiafi ʼaē neʼe nātou faigamālie ai, neʼe fakatahitahi te kiʼi kūtuga ki he ʼapi, pea neʼe ko te kamataʼaga ʼaia ʼo te fono ʼaē ʼe higoa ʼi te temi nei ko te Ako Tohi.
2. Koteā ʼaē ʼe tou lava fai moʼo foaki he “fefakaloto mālohiʼaki” ʼi te ako tohi?
2 Te Fakaloto Mālohi Pea Mo Te Tokoni: ʼE tokosiʼi te kūtuga ʼaē ʼe fakatahi ki he ako tohi, koia ʼe lahi ai te ʼu faigamālie ki te nofoʼaki ke nātou fai hanatou ʼu tali. ʼO tupu ai leva “he fefakaloto mālohiʼaki, ʼo tahi loto mālohi ʼi te tui ʼa he tahi.”—Loma 1:12, MN.
3, 4. ʼE tokoni feafeaʼi mai te ako tohi ke tou fakahoko fakalelei totatou minisitelio?
3 Ko te faʼahiga faiako ʼa te tēhina taupau ʼo te ako tohi, ʼe lava tokoni kia tatou ke tou “fakaʼaogaʼi lelei te folafola ʼo te moʼoni.” (2 Tim. 2:15, MN ) Tou tokagaʼi tana fakaʼaogaʼi te ʼu manatu faka Tohi-Tapu mai te tohi ʼaē ʼe ako. Kapau ʼe ʼaoga ke fai he kiʼi fakamanatu ʼaki te tohi ʼaē ʼe ako, pea ʼe feala ke ina fai he fakamanatu nounou ʼo ina faka maʼuhigaʼi te ʼu puani tāfito ʼaki pe te Tohi-Tapu. ʼAki tana faʼifaʼitaki lelei, ʼe lava tokoni mai ke tou hikihiki tatatou faiako ʼi te minisitelio faka Kilisitiano.—1 Ko. 11:1.
4 ʼO hilifaki ki tana takitaki te ako tohi ʼi te vāhaʼa fuli, ko te tēhina taupau ʼo te ako tohi ʼe ina tuku he faʼifaʼitaki lelei ʼi te gāue fai faka mafola. ʼAki te tēhina taupau ki te gāue, ʼe ina fai he ʼu fakatuʼutuʼu ʼaoga ki te gāue fai faka mafola. ʼE faiga anai ke tokoni kia nātou fuli ʼo tana ako tohi ke nātou fakahoko fakalelei tonatou maʼua faka Kilisitiano ʼaē ko te faka mafola ʼo te logo lelei pea mo te fai ʼo ni ʼu tisipulo.—Mat. 28:19, 20; 1 Ko. 9:16.
5. Koteā te tokoni ʼe ʼaoga kia tatou takitokotahi ʼi te ʼu ako tohi?
5 ʼE tokaga anai te tēhina taupau ʼo te ako tohi ki te maʼuli fakalaumālie ʼo nātou fuli ʼo tana ako tohi. ʼE ina fakahā anai te faʼahi ʼaia ʼi te ʼu fono pea mokā gāue mo ʼihi ʼi te fai faka mafola. ʼE ina toe fakaloto mālohiʼi foki te ʼu tēhina ʼi te faʼahi fakalaumālie mokā ʼalu ʼo ʼaʼahi nātou. ʼE tonu anai ke tou fakafiafia fuli mokā tokoni mai ia te tagata taupau ʼo te ako tohi ke tou mālolohi ʼi te faʼahi fakalaumālie ʼi te ʼu faʼahi ʼaē ʼe ʼaoga kia tatou.—Isa. 32:1, 2.
6. (a) ʼI te ʼu fono ʼaē neʼe nātou tokosiʼi ai, koteā te lotomālohi ʼaē neʼe maʼu e totatou ʼu tēhina ʼi ʼihi fenua? (b) ʼE fua lelei feafeaʼi kia koutou takitokotahi te ako tohi?
6 Tou Fetokoniʼaki: ʼI te ʼu fenua ʼaē ʼe tapuʼi ai te gāue ʼa te hahaʼi ʼa te ʼAtua, ʼi te agamāhani e tokosiʼi te ʼu tēhina mokā nātou fakatahitahi. ʼE ʼui fēnei e te tēhina: “Logola neʼe tapuʼi tamatou ʼu gāue faka Kilisitiano, kae ʼi te vāhaʼa fuli neʼe mātou fai tamatou ʼu fono pea neʼe mātou toko 10 peʼe toko 15. Neʼe mātou maʼu he mālohi fakalaumālie ʼaki te ʼu fono, mo tamatou ako te Tohi-Tapu pea mo tamatou fakatahi mokā ʼosi te ako. Neʼe mātou fefakamatalaʼaki te ʼu meʼa ʼaē neʼe hoko kia mātou, pea neʼe mahino ai kia mātou ʼe tatau fuli te ʼu fihifihia ʼaē ʼe tau mo mātou takitokotahi.” (1 Pet. 5:9) Koia, ʼofa pe ke tou fetokoniʼaki ʼo tou lagolago mālohi ki te Ako Tohi.—Ef. 4:16.