Koutou Lagolago Ki Te Tēhina Taupau ʼo Takotou Ako Tohi
1 Ko tatou takitokotahi ʼe tou maʼu te ʼu fua lelei ʼo te Ako Tohi ʼo te Kokelekasio. ʼI te māhina ʼaenī kua ʼosi, neʼe tou talanoa ki te gāue ʼaē ʼe tonu ke fai e te tēhina taupau ʼo te Ako Tohi. Kae koteā ʼaē ʼe tonu ke tou fai moʼo tokoni kia ia, pea ke tou maʼu ai he ʼu fua lelei?
2 Koutou Kau Kiai ʼi Te Vāhaʼa Fuli: ʼE maʼuhiga ke koutou kau ki te ako tohi, koteʼuhi ʼe ko he ʼu kiʼi kūtuga e tokosiʼi. Koutou fakatuʼutuʼu ʼi te vāhaʼa fuli ke koutou kau kiai. Ko te tahi faʼahi ʼaē ʼe lelei ke koutou fai, ko takotou ʼōmai tautonu, ke feala ai ki te tēhina taupau ke ina kamata ʼi tona hola totonu.—1 Ko. 14:40.
3 He ʼu Tali ʼe Fakaloto Mālohi: Ko te tahi faʼahi ʼe feala ke koutou fai moʼo tokoni kia ia, ʼe ko hakotou teuteuʼi lelei ia te ako pea mo fai he ʼu tali ʼe fakaloto mālohi. ʼI te agamāhani, ʼe lelei age ke kita fai he ʼu tali ʼo ʼuhiga mo te puani tāfito e tahi, pea ʼe toe tokoni ai anai ki ʼihi ke nātou fai hanatou tali. ʼAua naʼa koutou faiga ke koutou tali ki te ʼu manatu fuli ʼaē ʼe talanoa kiai he palakalafe. Kapau ʼe ʼi ai he puani ʼi te alatike ʼe koutou leleiʼia, pea koutou fai he tali moʼo vaevae takotou manatu, pea mo lagolago ki te fai palalau.—1 Pet. 4:10.
4 Kapau ʼe tuku atu te pilivilesio ke koutou lautohi ʼi te Ako Tohi, pea koutou fai fakalelei te gāue ʼaia. Kapau ʼe lelei te lautohi, pea ʼe toe lelei anai mo te Ako Tohi.—1 Tim. 4:13.
5 Te Fai Faka Mafola ʼa Te Ako Tohi: ʼE lahi te ʼu koga meʼa ʼe fai ai te ʼu ako tohi, ʼe toe fai ai mo te ʼu fakatuʼutuʼu ʼo te fai faka mafola pea ko takotou lagolago ki te ʼu fakatuʼutuʼu ʼaia ʼe tokoni ki te tēhina taupau ki tana takitaki ia te gāue fai faka mafola. Koutou faka ʼuhiga te ʼu fakatuʼutuʼu ʼaia ohage ko he ʼu fealagia ke koutou fakaōvi ʼaupito ki tokotou ʼu tēhina pea mo fakaloto mālohiʼi nātou.
6 Te ʼu Kiʼi Pepa Tānaki Gāue: Ko te tahi faʼahi ʼaē ʼe feala ke koutou fai moʼo tokoni ki te tēhina taupau, ko takotou foimo foaki ʼo takotou kiʼi pepa tānaki gāue ʼi te ʼu fakaʼosi māhina fuli. ʼE feala hakotou ʼavage tonu kia ia takotou kiʼi pepa, peʼe koutou momono ki te kiʼi kesi ʼaē neʼe fakatuʼutuʼu kiai ʼi te Fale Fono. ʼE lava fakaʼaogaʼi e te sikalaipe te kiʼi kesi ʼaia moʼo tānaki kiai te ʼu kiʼi pepa tānaki gāue ʼaē neʼe tae e te ʼu tēhina taupau ʼo te ʼu ako tohi.
7 ʼO ʼuhiga mo te faʼahi ʼaia, ʼe fakamālo atu kia koutou ʼi takotou lagolago ki te tēhina taupau ʼo takotou Ako Tohi. Ko te faʼahi ʼaē ʼe maʼuhiga tāfito, heʼe feala hakotou ʼiloʼi ko Sehova “ ʼe lagolago anai ki te aga ʼaē ʼe koutou fai.”—Filp. 4:23, MN.